我唔明白, 我真係好唔明白.......

話說, 尋日約o左我所剩無幾o既朋友一齊慶祝生日啦.

地點就梗係去生日o既朋友A 屋企慶祝. 尋日下晝1點鐘多d, 就收到主人家o既sms, 話明4時入席, 去club house 食飯的話, 就6時入席, 外賣的話, 就幾時都入得席啦.

咁好啦, 收到朋友B o既電話, 大家夾時間出現, 朋友B就話佢地一家大約5點幾到啦. 咁我心目中都預5點到啦.

公司新policy

之前收到風, 公司又改HR grading system, 今日終於都出o左memo 喇.

美其名係跟group policy, 精簡架構, 方便大家, 實際係同你地班友仔講, 以後唔駛旨意扭計要升職.

以我地呢個job title o黎計, 以前係分4 個grade,人生比較有希望, 因為可以透過升grade o黎個大幅加人工, 以後就無呢支歌仔唱喇! 以後想加人工, 慢慢等每年全公司一齊加o個一千幾百啦......

English scones & 柚子蜜蛋糕

今日確實無聊得閒, 加上去完旅行咁耐, 都未開過爐, 一決定開下爐.

小倫要返工, 阿媽約我飲茶又俾我耍走佢, 十點幾醒O左就開工喇....之前, O向網上面都search o左好多整scones o既食譜, 但係好多都係加汽水O既, 我個人覺得唔係幾好, 又要無啦啦去買罐汽水, 而且汽水糖份太高. 搵O左好耐, 終於搵到個比較O岩心意O既, 一於試下. 自己再改量少少, 第一次整, 唔好整咁多, 少少地, 整住6個先啦.

結婚兩週年

由於仲有D 假未清, 所以我mark O左今日同聽日都放假. 但係, 小倫今日就唔可以放假陪我, 佢要聽日先可以放假陪我去玩喇.

今日O向屋企hea O左一日, 等到小倫放工, 我地先去旺角行O左一圈, 跟住先去銅鑼灣食慶祝飯. 今晚我地揀O左Agnes b le pain grille 試下, 雖然上網睇人地O既comments麻麻地, 但係都即管搏一搏啦.

以前新開張, 好難book 枱O架喎, 可能真係comments 麻麻地, 所以今晚都幾疏落, 仲好啦, 靜靜地食下飯,傾下計, 學人扮下romantic 丫嘛.

坐低就梗係睇下menu 諗下食乜好啦.....咁就出事喇....駛唔駛咁長呀.....D 餸名, 睇完都只係明7-8成咋, 唉, 都怪自己英文差. 努力完一輪, 終於諗好食乜.

(坐低之後, 會有少少麵包食先.....味道唔錯. )

今晚唔叫salad喇, 試下呢個煙肉紫椰菜, 加O左少少black pepper 之後, 一D 都唔難食喎, 不過, 塊煙肉就咁食有d 咸, 加埋D 菜一齊入口, 好好多.

前菜, 就梗係要食escargots, 法國蝸牛啦, 上次去巴黎, 食飯時, 唔記得O左order 試下地道O既味道, 今次當補數.

Main dish, 我地就order O左一隻波士停頓龍蝦, source 就梗O左最穩陣O既garlic with olive oil, 同埋聽個waiter 介紹O既燒onglet, 個waiter 話呢個部份係牛O既橫隔膜附近O既肉, 所以最好係食3-4成喎, 聽到有D 驚驚地喎, 不過, 都聽下個講啦. 呢個waiter 好細心, 雖然見我地order O左兩個main dishes, 但係佢話不如將兩樣都分兩碟, 咁我地可以每人有兩個main dishes 啦.

首先隻龍蝦, 比我想像中大隻, 味道好好味!!!平時多數都係O向中式酒樓食, 今次要用刀叉, 好有難度, 所以食O左好耐先食得晒我O個碟.

食完龍蝦, 坐一陣, 就到牛喇. 估唔到, 一D 都唔覺得生, 而且好腍, 無筋, 正呀!!!

其實食完呢兩個main dish 已經好飽喇, 不過, 為O左今晚有個完美O既結束, 一於order 埋甜品啦~~~

今餐真係食到好飽呀!!!!而且都有d surprise, 可能之前預o左麻麻地, 結果又唔係想像中咁差, 仲好好味o添!!!!

2010 歐洲之旅 - 法國 Day 3 (27/9) - Part II

放完血之後, 我地繼續一直行到街尾, 就到o左凱旋門 (Arc de Triomphe de I'Etoile) 喇 !!!哈, 沿途俾我地見返第一日落機, o向AMS 同我地住埋同一間酒店o個幾個香港人喎, 咁當然我地無同佢地打招呼啦, 人地咁寸.

o向凱旋門底下影完相之後, 我地又再利用我地張 Paris Museum Pass 免費行上去頂層喇!!!!如果自己俾錢上去, 都唔算貴o既, EUR 9 o者.....因為我地覺得已經一場咁遠o黎到, 唔好為o左慳錢而唔上去囉. 

(上面o個兩張相好驚險o架, 我地企o向馬路中間小小o既位置影o架, d 車o向我地身邊經過, 好驚驚呀~~~)
行o左大半日, 再行二百幾級樓梯上去瞭望台都幾甘下.....事關入面條樓梯好窄, 僅僅夠一個人扶住欄杆行, 而且又係圓形咁行上去, 轉多兩個圈, 頭都暈埋...... 好在, 行o向我地後面o既係兩個外籍婆婆, 佢地行下抖下, 唔怕我地行得慢阻住佢地.

(估唔到都幾貼心喎, 行完樓梯, 有幾張石櫈俾行到索晒氣o既人透行氣!!!)

凱旋門係拿破崙o係1805年打敗o左俄奧聯軍, 1806年下令修建, 起o左30年先完工呀!!!

我地o既行程, 到o左今日都仲未上鐵塔, 所以第一次o向咁高o既地方睇番巴黎o既景色, 好震撼!!!! 人人都話巴黎多小偷, 唔知點解, 呢一刻我地無諗過小偷呢個問題喎, 我地同其他遊客都好互相合作, 大家互相幫對方影合照.....影飽喇, 就落返去lu....

(企到咁高, 可以睇到遠處o向小山丘上o既聖心堂, 又可以見到設計modern o既新凱旋門)

原訂計劃, 我係打算先返酒店放低d 戰利品, 跟住行返去巴黎鐵塔, 上去睇日落巴黎, 不過, 行o左一整日, 對腳仔已經走o左佬lu, 唔再聽話, 加上聽日一早要趕車去整個法國之旅o既重點節目 -- Mont St Michel, 所以, 我地決定行plan B, 即係提早放飯, Yeah!!!!呢個節目, 小倫最鍾意, 因為有得食, 唔駛再行喇.

腳仔軟呀, 唔再四圍搵o野食喇, 一於就去返o向Champs Elysees o既 Leon de Bruxelles 食佢馳名o既青口. 相信大部份去過Paris o既人都一定有幫襯過Leon 呀, 作為遊客, 點都要做下d遊客必作o既指定動作o既....雖然好唔型呀, 人人去做, 我地又做, 但係總好過俾人問起有無食過, 無食過咁燶丫......除非我係o個d 去Paris 去到爛o左o既人啦, 根本就唔駛再做遊客必做o既o野.


Leon 係chain shops o黎o既. 所以, 就算唔o向Champs Elysees, 巴黎其他地方都有分店, 好似尋晚我地去搵生蠔店都曾經經過. 由於時間尚早, 只係六點幾, 未係好多人, 所以我地唔駛等位呀!!!!睇下menu 先, 有好多唔同煮法o既moules, 於是我地order O左兩個唔同O既set, 大家share. 我叫o左一個main dish + dessert, 小倫就叫o左一個starter + main dish + dessert.

Starter 係三文魚, main dish 呢, 我就係 mariniere, 即係平時我好鍾意食o既,普通口味, 有garlic, onion, 同white wine. 小倫就係Leon Mussels, 即係餐廳精選. Dessert 呢, 我地就揀O左3個scoops o既ice cream. 單係食晒成煲青口, 已經好飽, 仲有美味o既french fries 呢. 果然Leon 有d 料到, d 青口好好味呀!!!!!而且又唔算貴.

食飽飽, 雖然唔係好夜, 只不過係8點, 但係拎住d 戰利品, 又加上腳軟軟, 都係搭的士返酒店啦, 費事夜晚o向Paris 搭metro 喇, 聽聞好雜, 治安唔多好, 而且, 有尋晚O既經驗, 由呢度返酒店應該唔係好貴, 千金難買心安丫嘛. 既然都係要搭的士, 一於就揀架Benz坐.....超無聊, 哈哈哈.....況且又真係唔係好貴, 呢一程只不過係EUR10 咋. 抵呀!


返到酒店, 我地執下o野, 就要乖乖上床瞓喇, 因為聽朝未天光就要出發喇!!!!

2010 歐洲之旅 - 法國 Day 3 (27/9) - Part I

由於尋日去凡爾賽宮 activate o左我地張Paris Museum Pass, 所以今日o既行程將會繼續利用呢張pass.

一如前幾日, 我地o向房食飽早餐先出發. 出發去第一個景點之前, 先去位於酒店街口o既麵包店買定麵包先. 據Maggie o既recommendation, 佢話呢間麵包店d 蝴蝶酥好味喎, 所以我地除o左買麵包之外, 亦買o左蝴蝶酥試下...... 又真係幾好味喎, 不過, 俾我一拎上手, 就整爛o左喇...... :P 真係無鬼用!!!

2010 歐洲之旅 - 法國 Day 2 (26/9) - Part II

順路, 我地坐RER出返o黎Paris, 開始落雨喇....雨雖然唔係好大, 但係好密, 都算不幸中之大幸o架喇, o向頭先outdoor 遊花園o個陣, 如果落雨就掃興喇.

下一個行程, 就係去Musee d'Orsay睇畫. 呢度原身係火車站o黎o架, 已經有過百年歷史o架喇, 之後改建為博物館, 所以呢度好光猛, 空間感十足, o黎呢間museum o既主要目的, 又係睇梵高o既名作, Starry Night 喇. 當然除o左梵高, 仲有其他印象派o既畫作啦. 不過, 我地行程咁緊湊, 唔可以好悠閒咁每幅畫都慢慢駐足欣賞. 假如有生之年, 再有幸o黎巴黎的話, 一定要再o黎多一次Musee d'Orsay!!!!!

(呵呵呵, 由於我地有Paris Museum Pass, 今次終於真係唔駛排隊入館喇!!!!!)

2010 歐洲之旅 - 法國 Day 2 (26/9) - Part I

今日正式展開我地o向巴黎o既旅程喇!!!!


一早起身, 我地o向房食個簡單早餐. 因為我地book o左淨房咋, 要o向酒店食埋早餐, 每人要俾多十幾蚊歐羅呀, 雖然係一般酒店價錢, 但係身為寒底組, 就梗係慳得就慳, 唔會幫襯啦. 呢間酒店唯一唔好處就係房間無kettle or coffee maker, 所以, 我地想要熱水, 就要自己落去café 拎.
今日o既主打, 就係去凡爾賽宮 (Chateau de Versailles) 參觀喇. 因為今日係星期日, 無得shopping, 所以就去遠少少o既地方喇.
要去凡爾賽宮一d 都唔難. 坐RER 去就得啦. RER 好似輕鐵咁, 不過係行走巴黎市郊, 某部份o既metro station 係RER 轉車站. 最近我地o既RER station 係 Champ de Mars Tour Eiffel, 由於呢個站都好近我地酒店, 所以, 我地決定慳返一程metro, 直接行去啦. 唔知今日係乜o野特別日子呢, 沿路都見到好多人跑步, 愈行近鐵塔o個個方向, 就愈多人. 可能今日有跑步比賽啦. 去到個站, 只得一個售票處, 同售票員買o左去 Versailles-Rive Gauche o既 return tickets, 就去月台等車喇. 車費加o左價, 之前上網打探得知每人每程 EUR2.95, 依家要每人每程 EUR3.05 喇.
我地估今日o既跑步比賽都幾大型喎, 因為對面月台o既車, 成車都係參賽選手呀! 簡直係 people mountain people sea.

2010 歐洲之旅 - 法國 Day 1 (25/9) Part II

行完百貨公司, 就要醫肚喇!!!根據google map 所指示, 由Opera 站行去食晚飯o既餐廳好近, 大約行17分鐘就到. 於是, 我地由春天百貨行返去Opera 站再出發啦. 點知, 我地行錯路, 加上又無地圖, 只係靠旅遊書上唔太仔細o既地圖行, 結果行o左無九個字都有半個鐘頭, 腳仔都軟埋, 天都黑埋, 小倫又鬧爆我….嘗試去問人啦, 連人影都無一個, 好在, 終於都搵到一個人問下, 指o左個o岩o既方向俾我地. 終於搵到喇!!!!

今晚, 我地要o黎試下呢一個24小時營業, 馳名燒豬腳o既餐廳. 餐廳叫做 “Au Pied de Cochon”, 早排杜如風o向佢o既節目 “風行全世界”都有介紹過.

2010 歐洲之旅 - 法國 Day 1 (25/9) Part I

我地落車o既地方, 係巴黎o既北站 – Paris Gare du Nord. 呢度o既感覺同阿姆斯特丹好唔同, 好多好多人, 亦都俾Centraal Station modern. 聽聞巴黎有好多小偷, 所以我地一路搵路, 一路要打醒十二分精神小心行李.

2010 歐洲之旅 - 荷蘭 Day 3 (25/9) Part I

由於要趕火車同check-out o既關係, 我地o既荷蘭之旅, 只係得返今日半朝早留o向阿姆斯特丹喇. 所以, 又要一早出發喇. 出門前, 我地要先執好晒d行李, 等行完街街返o黎, 就可以即刻拖o急走人check-out. 今日早餐, 又係好似尋日咁, 一人一杯cup soup, 另外加多一個月餅呀, 我就食由香港帶o黎應節o既半島奶黃月餅, 小倫就食飛機上派o既美心迷你月餅.

第一站, 我地去Bloemenmarkt 辛格花市, 話就話係花市, 實際上只係一條街, 有廿幾間舖, 感覺有d 似香港o既花墟. 每間舖都係賣同花有關o既o野, 有d 賣種子, 有d 賣鮮花, 有d 賣屈金香o既bulbs. 可能我係太早o既關係, 唔係好多人, 係咁易我地就行完喇.

2010 歐洲之旅 - 荷蘭 Day 2 (24/9) Part II

由Centraal Station 沿Damark 大街行, 就會見到Sex Museum. Damark 應該都係其中最熱鬧o既一條街喇, 事關成條街都係人. o向Sex Mesum 門口, 考慮o左2秒, 我地都係決定唔入去喇. 入場費又唔係平, EUR 4 一個人, 又勁多tourists, 好迫, 唔想俾錢入去睇埋d 核突o野.

2010 歐洲之旅 - 荷蘭 Day 2 (24/9) Part I

o黎到第二日, 可能尋晚早瞓, 所以今日好知醒, 暫時未有jet-lag o既問題. 既然係寒底旅行團, 我就梗係唔會加錢食酒店o既早餐啦. 如果o向酒店restaurant 食buffet breakfast 要每人EUR 16 呀!!!百幾蚊一個早餐, 可見荷蘭o既生活指數幾高!

梳洗完, 我地就沖尋晚o向Albert Heijn 買o既cup soup 做早餐, 一人一杯, 加多條麵包, 對於我地平時唔多食早餐o黎講, 呢個份量都夠飽. 呢間cheap cheap 4星酒店有個好處, 就係房內有kettle, 之前聽過有d 人講, 話歐洲酒店無kettle, 要自己帶cookset 去, 但係我地已經有太多o野帶喇, 亦都唔想再o徙錢買一套cookset 或者kettle返o黎只為一個trip. 另外, 房門外, 每層都有冰機, 我地飲果汁可以出去拎一杯冰返o黎自己加.

2010 歐洲之旅 - 荷蘭 Day 1 (23/9) Part II

影完風車, 下一站就到o左所謂o既芝士"廠"()喇. 未入去之前, 就已經俾d 走地雞嚇死喇…..d 人傻o架, 將d 雞放到四圍走, 仲要鬼死咁大隻, 好得人驚呀!!!會有禽流感o架嘛….避過o左d 雞終於入到去喇. 果然, 又係一間搵遊客笨o既手信店. 入面有一間玻璃房做demonstration o既, 唔知乜原因, 或者timing 唔o岩啦, 無人做示範喎, 所以, 就咁影下間demonstration room 就算喇.

2010 歐洲之旅 - 荷蘭 Day 1 (23/9) Part I

可能平時實在太攰喇, 所以一上到飛機, 我連電影都無睇, 就決定眠一眠先. 而小倫就好似平時o向屋企咁, 邊有咁早眼瞓丫, 佢就決定睇下電視先.

過o左唔知幾耐, 我開始醒醒地, 空姐亦都派晚餐喇. 唔知係因為我真係太飽, 定係今晚o既飛機餐唔o岩胃口呢, 對住我o個份飛機餐竟然食唔落. 係咁易食o左幾啖就放棄了. 相反小倫揀o左雞飯就幾好味喎. 可能因為今日係中秋節o既關係, 每人都有一個迷你美心月餅喎.

好在, 我地今次放棄window seats, 而改mark corridor o既位, 坐得耐, 瞓得耐可以起身行下, 去washroom, 如果坐得入, 就無得起身行來行去喇.

2010 歐洲之旅 - 出發喇 (Day 1 23/9)

吹水吹o左咁耐, 我地o既年度大project - 歐洲之旅終於o向今晚月圓之夜成行喇!!!

是日乃係中秋節, 我阿姐放o左大假, 我成team 人只有我同另一個同事返工, 大阿姐一早就同AM 講, 其實我地兩個之中可以有一個人放3點半o既. 嘩, 簡直係皇恩浩蕩呀!!!雖然我今晚趕飛機, 但係都唔可以自己主動開聲, 始終人地係大, 佢有話事權, 點都要等人地安排o既.

我o既outstanding list 一早就做好啦, 交低晒d 手尾就開始將我本精美o既旅遊天書做finalization 同埋偷偷地做賊仔用公司部laser colour printer print 靚佢, 仲bind 好o添.....由於只可以暗地裡進行, 呢個行動要等到lunch time d 老闆同其他同事出去食飯做節, 留低我呢個無朋友唔同人埋堆social o既人做自己o野啦.

2010 歐洲之旅 - 籌備篇 V

講講下, 籌備o左差唔多半年o既2010 歐洲之旅三國遊終於望見家鄉喇!!!!

仲有幾日就出發喇!!!! 去旅行要預備o既o野已經ready 好晒.

所有行程亦都已經confirm, 每個預計會去o既景點資料都大約搜集好, 我花o左好多心機時間整o既旅行小冊子亦都終於做好喇.......

放血呀!!!!

唔記得究竟係HKBN 定係NOW TV喇, 話說某年某日小倫收到張sogo $100 coupon, 好乖o既小倫, 就梗係唔會落格, 一定會上緻中央, 即係我啦....

張coupon 到o左2011年1月就會到期, 所以, 我地今晚終於"的"起心肝, 放工後去o左尖沙咀sogo. 買乜好呢???

My First French Cooking Class ~~~

今日雖然係星期六, 但係我都好似平時返工咁早起身. 因為今日會同咩咩一齊去學整髮腳菜呀!!!係唔係好高檔呢??!!

首先, 第一個節目就係迷路喇!!!! 雖然拎住部iphone 可以睇住個google map 搵路, 不過, 路痴真係路痴, 始終都係要搵好耐先搵到條奧卑利街.

去到餐廳, 我地比原定o既上課時間遲o左10分鐘, 但係去到餐廳竟然無其他人喎, 只係有個圓碌碌廚師. 佢話今日只有3個人上堂, 即係除o左我地兩個, 仲有一個人啦.....開頭, 仲好驚法國佬英文唔多好, 十句一定有九句聽唔明, 好在, 佢d 英文都唔算難聽.

閃閃手鍊, 頸鍊

尋晚放工, 出旺角除o左去拎聾貓, 仲約o左我間中都會幫襯買飾物o既姐姐交收.
今次, 買o左兩條好誇張o既閃閃手鍊同頸鍊, 好靚呀!!!

不過, 我條手太幼喇, 就算扣到最埋o個格都仲有鬆, 要扣入去條鍊入面先得呀!!!!!

收到喇! 收到喇!! 收到喇!!!

等o左差唔多一個月, 今日一放工就趕去旺角拎聾貓o既accessories 呀!!!

好耐之前, 只要集齊兩期o既U Travel magazine o既印花, 再加錢就可以換到一個聾貓Baggage Tab 同埋相機帶, 貪心o既我, 就梗係一次過換晒兩樣啦.....

個baggage tab 好趣緻呀!!!相機帶都唔錯o架, 可惜, 我部s90 用唔著, 唯有放住o向度封下塵先, 遲d (at least 都要兩年之後)換相機先再用條相機帶.

妹妹流浪去了!!!

今日, 我請o左一日假, 一早起身, 先同媽咪, 妹妹去彩福飲茶! 我地食o左好多好多點心呀, 真滿足!!!

飲完茶, 行下街, 就返媽咪屋企休息下, 我就幫細佬 install 埋個anti-virus, 哈哈, 好在有小倫o向度遙遠控制我咋!

點解今日我會無啦啦放假? 因為妹妹今晚就要坐飛機去意大利喇!!

佢話暫時9個月後返香港喎!!!真係令人擔心呀!!!平時, 佢都唔多用腦去留意身邊o既事, 意大利o既治安又唔多好, 唉....都唔知佢點算...

所以, 呢排我除o左忙著預備自己去旅行o既事, 仲要忙著幫佢打點遠遊o既o野.....

我擔心佢都事少呀, 最唔捨得佢o既, 一定係媽媽啦. 雖然妹妹成日都唔痴家, 走o左去打hocky, 但係, 佢平時夜晚返屋企間中會陪媽媽瞓覺, 或者陪佢玩下.....妹妹走o左之前, 我要用更加o既時間去entertain 阿媽喇.....時間真係唔多夠用.

夜晚8點半, 妹妹就入閘踏上漫長o既旅程喇....希望佢能夠一切平安, 順利啦!!!!

妹妹就係咁, 帶埋佢o既細菌小妹出發了~~~

2010 歐洲之旅 - 籌備篇 IV

仲有唔夠一月就出發喇!!! 好緊張呀!

到o左今時今日, 我依家係每日上網搵資料, update 下最新o既info, 參考下人地o既blog 介紹o既地方. 因為我對今次o既旅程好有期望, 好想能夠預備得好d, 計劃好周詳一d, 令小倫同我都有難忘o既回憶.

旅程要住o既酒店同埋要坐o既火車, 我地都已經book 好晒喇.

除o左呢d 資料性o既o野, 基本每日o既行程已經俾我排得密密麻麻, 行程緊湊. 要開始預備去旅行用品喇.

原來我張AE CX card 有呢張Priority Pass member o架. 呢張卡係好o野o黎o架, 有o左呢張卡, 就可以o向全世界o既機場lounge 食免費餐喇. 另外,  做空姐o既大學同學 - 大妹, 有好o野益我, 就係Lafayette 同Printemp o既9折卡呀!!!!唔知到時會唔會買o野, 但係, 有so 幾大都帶到去先.

另外, 小倫一直都擔心歐洲o既治安唔多好, 所以今晚去買o左個money belt. 揀o左幾款, 都係覺得呢款比較o岩心水, 因為間格好, 而且又透汗.

至於去旅行要用o既cash, 我都趁最近歐羅跌番d而入o左貨喇.

日式芝士蛋糕

今日小倫繼續要去會展o既電腦展返工, 所以又得番我一個人.

一早起身, 過去阿媽o個邊食早餐後, 先同阿媽去行supermarket, 之後, 返o左阿媽屋企繼續瞓多一陣.

瞓醒再去大埔墟街市買定d 凍肉, o岩o岩好, 買夠一星期要食o既肉, 方便一放工就可以返去煮喇.

免費相

今晚放工, 打開信箱, 收到o既唔係bank statements, 水費單, 電費單, 而且法國婚紗寄o黎俾我o既信...

佢地好少會用郵寄宣傳品o架喎.....

究竟係乜東東呢????

哈哈, 原來係一張家庭攝影禮券呀!!!仲話價值$3088 咁多呀!!!

好識做生意呀! 賺完我婚紗相咁多錢, 依家又想打我主意!!! 我當然唔會上當啦.

講下張coupon 包d 乜先:
1. 家庭成員4-10人 (如果additional 加人, 每位$300 <-- 好過去搶呀! 影多一個人, 佢o既cost 唔會大o左, 所以同搶錢無分別)
2. 1小時拍攝 (如果我帶住個B, 限時一個鐘, 點會成功影到相o架)
3. 可選15款數碼影像 (呢樣就多過酒席送o既婚紗相coupon 喇! :P)

最搞笑係, 唔包化妝同服飾o架. 咁服飾唔包都正常o既, 但係連化妝品都慳返呀! 既然係咁, 又點駛幫襯你呢?! 婚紗相我肯俾咁多錢去買相, 其中一個原因都係因為個妝化得靚過我平時個烏where 樣o者, 連呢樣最大機會吸引我俾錢買相都唔包....

雖然我唔會用o左呢張coupon, 但係, 都好多謝我法國個sales, Stella 咁有心, 專登搵人send 張coupon 俾我. 可能佢見我介紹o左咁多客仔俾佢啦.

新玩具 - Canon Selphy C780

自從, 上幾個星期行過log-on, 見到呢部canon selphy  大減價, 同佢邂逅之後, 令到我籮籮攣o左幾個星期. 成日都心思思好想買, 但係又怕o徙錢買多一樣o野返屋企阻地方喎.

今日趁得閒, 陪小倫行下旺角, 睇下相機o野, 因為佢想買一個backpack 同買多支鏡去旅行用. 點知, 咁都出事!!!!

Earl Grey Tea Cookies

今晚趁小倫約o左佢d 中學同學聚舊食飯, 我可以返媽咪屋企食下飯.

食飽飽返到自己屋企, 無無聊, 不如又試新o野啦.

今次, 我o既實驗品係Earl Grey Tea Cookies (伯爵茶曲奇).

Chocolate Milk Muffin

早幾日, 上網睇人地o既煮o野食blog 時, 見到有一個好簡單o既Chocolate Milk Muffin, 好吸引呀!!!

於是, 心思思想試下啦, 終於, 今朝唔駛返工開OT, 所以, 就決定try 一 try 啦....

大部份o既材料, 我都已經有, 只要買多一盒維他朱古力奶就搞掂.

2010 年書展

今日又無啦啦走o左去書展, 去到尖沙咀join 埋小倫, 一齊食完lunch 就坐天星小輪過灣仔.
點知, 一上到去鷹君中心, 我地就有少少後悔喇...嘩, D 人多到嚇死人...

於是, 我地先o向7 仔買o左兩張飛先, 跟住再行返去灣仔天橋, 由呢道繞過中環廣場, 再行返上去華潤, 過去鷹君, 左兜右兜, 迫o左9個字終於都入到去會場喇.

其實我地都無乜目標, 都唔知睇乜書好, 所以, 先去cosmopolitan o既 counter 睇下有乜禮物, 點知都係睇唔o岩.

於是我地四圍行, 但係個個counters 都係人, 好迫呀, 根本都睇唔到書. 不過, 最後我地都買o左少少書.

好無聊, 我地買o左4本"今日家居", $80 咋, 抵呀! 唔知買o黎做o野, 睇下人地d 屋點裝修. 另外, 買o既書都比較有建設性, 我買o左兩本cook books, 小倫買o左一本影相書同一本教執相o既.

可惜, 我地最想睇有關荷蘭o既旅遊書, 搵來搵去都搵唔到, 來來去去都只有東南亞o既旅行書, 超無引.

不過, 下年仲o黎唔o黎書展就真係要諗清楚喇. 因為實在太多人, 好迫好辛苦呀!

志明與春嬌

我毫無興趣o既世界盃終於都曲終人散喇, 加上各大歐洲球賽又抖暑, 所以, 小倫終於唔駛再俾個波霸住喇.

星期日晚o既電視比平時更加悶, 所以又走去睇下有無新戲睇, 租下碟返屋企喇. 終於等到”志明與春嬌” 出碟喇, 呢套戲我想睇好耐喇, 上戲院時又無時間去睇喎, 咁o岩今個星期新出, 又無人租喎, (唔知係唔係因為三級o既關係呢?)

新"煮"意 - 蕃茄薯仔牛尾湯 & 砂窩魚頭煲

今日好熱呀!!!!

無乜心機行街, o訓醒之後, 上下網, 睇下電影台d 舊戲, 執下屋, 唔覺唔覺又四點, 於是, 我同小倫落街食我地o既早餐+晏晝+Tea. 食飽飽就行下百佳同街市買餸玩煮飯仔啦.

今晚, 我地又試下新菜式, 就係煲蕃茄薯仔牛尾湯, 同埋整砂窩魚頭煲, 炒多條菜就ok 喇....

2010 歐洲之旅 - 籌備篇 III

唔知點解咁近o既一程由Amsterdam 去Paris 都要咁麻煩, 首先, 係無得坐Eurostar O既, 跟住, 我地package 送O個兩程短程機係唔包呢條線O既.

好啦, O向網上搵下料, 知道只可以坐Thalys train (大力士火車)啦. 終於等到開售日子喇. 都係O個句啦, 雖然要早D 俾錢, 但係早D book, 有著數呀, 因為可以訂到價錢較平O既tickets.拿拿聲quote 下兩張由Amsterdam 去Paris 要幾多錢啦, 嘩, 只係70蚊Euro. 真係好抵喎, 仲平過Paris 去London o個程Eurostar 喎, 唔理咁多, 即刻confirm, 入埋credit card 資料過數啦......

新"煮"意 - 避風塘炒蟹

早排一直都好忙, 又攰, 大大話話都有差唔多兩個月無煮過飯喇!

終於今個星期無約人, 又有d 精神, 一於等小倫放工, 一齊行下街市, 買餸煮飯仔啦...

嘩, 發生乜事呀, 今日d 海鮮平o左咁多o既......

於是, 我地決定今晚煮下新菜式 -- 避風塘炒蟹

2010 歐洲之旅 - 籌備篇 II

近日歐洲低企, 我地不停check 住心目中想book o既酒店啦, 另外, 我地又要不時check 下Eurostar o既價錢喎, 終於等到出9月底o既價錢喇.....

掃平貨

話說, 上個月, 透過傻豬, 我可以搭上搭訂o左d 特價o既Sofina products, 今晚終於有得拎喇 .....

由於係搭上搭o既關係, 我都唔敢order 太多, 而且又唔想有太多stocks keep o向屋企, 所以只係訂少少cosmetics 啦...skin care o既products 屋企仲有好多其他牌子, 唔駛買lu...

於是, 我買o左兩個粉餅, 平時我都係用Fine Fit 呢條line, 貪佢遮暇度比較高, 另外o既Primavista 想試o左好耐呀, 敏敏話Primavista o既base 都好好用, 所以都幫佢order 一支...

大仔入廠 + 新歡登場

 最近幾日, 發現o向用部netbook o既時候, 不時會出現成個mon 變白, 於是趁住warranty 仲有幾日到期, 拿拿林拎部netbook 去Samsung check 下先.....

尋晚, 正想搵返張單出o黎o既時候, 就發現左搵右搵都唔見張單呀!  平時, 所有單, 文件我都keep 得好好, 分好晒files 做filing o架嘛, 今次竟然老猫燒鬚, 唔見o左張單呀!!!!!

好在, 小倫今日幫我打去百老滙問下, 可唔可以幫我print 返張單, 估唔到百老滙咁好, 真係肯幫我print 單喎......小倫今次真叻仔!!

所以, 一放工就即刻出去旺角, 帶埋舊年買機時簽卡張receipt上去百老滙, 上到去表明意思, 個staff 真係好好, 二話不說就幫我print 返張單喇....

拎返張單, 就再上去 Samsumg o既維修中心等啦.....都唔算等好耐, 就到我地喇. counter o既姐姐都好有耐心咁幫我處理部netbook 啦, 佢話最快可以星期五有得拎.....搞掂我部netbook, 就係時候順口complain 一下佢地電話o既customer servic喇!!!!簡直係unacceptable 呀!!!!整一部電視o徙我咁多時候, 仲要每次都係要小倫自己打電話去follow up, Samsung o既CS 係唔會主動打俾客o架!!!!超爆離譜!!!!

太耐無行過旺角喇, 又去行下, 睇下相機, 今晚終於肯去帶我o既新歡 -- Cannon PowerShot S90. 我想買佢好耐o架喇, 不過, 自己本身部富士機我又好鍾意, 唔捨得唔要佢喎, 可惜, 佢俾我跌o左太多次喇, 有間歇性唔聽話, 於是, 今晚就把心一橫去帶個新歡返屋企, 等我下個月同媽咪去旅行時, 可以影相影得暢快d....

格o左成條街, 最後都決定去豐澤買, 因為用渣打卡有回贈, 連分期都有, 而且, 仲俾我lur 到個sales 哥哥送多一粒代用電俾我o添......

2010 歐洲之旅 - Confirm 篇

經過詳細考慮之後, 我地決定唔理三七二十一, 一於Confirm 我地o既歐洲之旅!!! 去完旅行, 還o左心願先....

我地行程將會係:

Meeting with ESD Friends - 31 Mar 2010

放工約埋Pingu o向中環地鐵站等, 一齊去尖沙咀, 事關今晚又約o左一班ESD o既jm 飯聚呀!!!

因為實在人多, 約一次食飯都要約一頭半個月先得, 終於揀o左今晚o向尖咀新開 o既Apple Green 食飯喇!!!

今晚出席o既靚太有: 我, Pingu, Kathy, 兔兔, 阿檬, kkcy, Winnie, Prettyangel, Bobo, Kiki, 如果 Ada 同Jenny 都o黎到的話, 我地就齊人喇!!!!

2010 歐洲之旅 - 籌備篇 I

我呢個歐洲夢繼續發落去, 難得連小倫都支持我, 好認真咁同我商量, 究竟應該去邊幾個國家好呢.

暫時, 我地會去16日. 基於我超級唔鍾意join 旅行團遊歐洲, 即係o個d 10天8國遊, 因為都唔會有機會真正feel 下當地o既文化.

出門遇貴人

Annual Results 過後, 終於有少少時間可以鬆一口氣....

於是, 我見悶悶地, 不如搵d o野俾自己忙下, 打發下時間都好丫....

就係咁, 同小倫講, 不如就當我9月尾o既annual leave 我地真係會去歐洲, 俾我無聊地plan 下行程啦....

我o既無事忙就係咁開始喇.....

講o左等於無講o既Annual Bonus

今日係公司公佈annual results o既日子, 亦都係同時HR 公佈我地呢一年度o既bonus o既日子.
往年, 大家都會收到一份Memo, 講每人appraisal 時收到o既grading. Game rule 大概係唔同職級唔同grading 就會有一個基數, 同呢個基數計埋自己底薪, 就會知道自己o向3月尾出糧時收到o既bonus 有幾多.....

煮飯仔 - 07/03/2010

實在太耐太耐無煮過飯喇, 趁今日係星期日, 個人無咁懶, 終於要"的"起火肝煮飯喇..

小倫話好耐係食過豉椒炒蜆, 一於就整啦.

另外, 買o左隻臘鴨脾返o黎放o向雪櫃咁耐, 不如都蒸埋o黎食啦....再煮多一碟西芹炒帶子雞柳就夠餸喇!!!!

大澳遊

新年無時間返大澳拜年, 所以今日趁得閒少少, 同埋小倫一齊請假陪阿媽返大澳行下, 當係拜年啦...

返到去咁o岩見到四舅父o既魚檔有生猛龍疐喎, 幾大都影下相先.....

Free Units & Friends 虎年團拜

去完西貢探花師奶同Momo之後, 我同小倫就趕住轉場去荃灣. 趁住未過正月十五, 我地Free Units & Friends 又o黎一年一度o既團拜喇......

當然, 事日晚餐梗係離唔開我地o既至愛 -- 打邊爐啦......

大年初二 Wii Sports Resorts Day

今日年初二, 就輪到陪下媽咪喇....

一早起身, 就要返媽咪屋企食開年飯, 食飽飽, 媽咪, 妹妹同細佬就上o黎我地屋企同我拜年喇.....
其實佢地係上o黎玩Wii Sports Resorts 呀!!!

當然, 主力係媽咪玩啦...佢好似玩極都唔攰咁......我都無佢地咁好氣, 由得佢地玩, 我要o訓下晏覺先.....

六點幾, 就叫細佬去和民搵位食飯.....

Yeah, 食o左幾日o個d 冬菇呀, 雞o個d, 真係有d 厭厭地....今晚終於有得轉下口味...

唔知點解, 我真係好鍾意食和民o架.....

大年初一四圍走

今日一早就同小倫出去土瓜灣小倫婆婆屋企拜年喇....為o左慳時間, 同免卻大家行來行去o既時間, 小倫媽咪同舅父佢地興團拜, 只要大家帶齊利是同禮物, 見面大家互相拜年, 交換禮物就ok.....

今年算係我地第一年派利是, 所以有d 混亂呀, 我同小倫就分工, 佢負責派俾佢d 表弟, 我就負責收長輩派o既利是. 嘻嘻, 我呢招醒喱, 我負責收, 即係連小倫自己o既利是都落埋我袋呀!!!哈哈哈!!!

同婆婆拜完年, 食完早飯, 我地就要趕去下一場, 要去油塘小倫伯伯o既屋企喇.....好在大家都係o向九龍東咋, 如果一家o向西邊, 一家o向東邊, 就真係新春行大運, 轉到頭都大埋喇......

o向伯伯屋企拜完年, 又要馬不停蹄, 要去下一站, 入將軍澳呀.....今次o既目標人物係去小倫佢地以前一個舊街坊, 佢地話呢一家人同佢地好close 喎, 細路時常一齊玩....但係, 我一個人都唔識, 全程都係陪笑, 又或者搵d 小朋友玩下, 打發下時間.......

終於完成o左今日o既拜年之旅, 於是, 我, 小倫, 奶奶同埋敏敏一齊去APM 食個tea 先返屋企.....食完tea 就返大埔發個新年財喇!!!!

呵呵呵.....同上年一樣, 我又打麻雀有所斬獲, 抽利是我又俾我抽中大利是呀!!!!希望今年全年都咁好彩啦~~~~

今日利是o既收獲都唔錯呀!!!!