重建家園 - 14 ~~ 大變身(III)

今日小倫short week, 所以有多d 時候去搞新屋d o野喇.....

起身無耐, 我地將琴晚趁HSBC 最紅星期五o向IKEA 買o既窗簾棍, 層板等雜物拎過新屋先, 上去之前, 小倫仲買多半打蛋撻慰勞下個油漆師傅, 順便催下佢做快d 嘛...我地星期三要入傢俬, 今日係星期六都仲未開始油油......真係有d 擔心呀!!!

(琴晚上去時, 間屋仲係咁o既款, 唉~~)

跟住, 我地再去埋屋苑o既客戶服務處將張按金單做埋轉名手續......好肚餓, 先食埋lunch, 再搭巴士出旺角繼續買o野...

一出到旺角, 先去design house 找o左條尾數先, 因為等到星期三送貨o既時候, 要俾cash, 無得碌卡, 所以今日先去碌o左個大數先, 留返少少到時再俾....碌卡又有得賺積分, 又有得遲d 先找, 好過俾cash 啦......出o左血, 我地再四圍睇下d 洗手盤同水龍頭啦, o向條街行o左好多次, 終於揀o岩喇......因為我地預o左間屋唔會住得耐, 所以唔敢買太貴呀, 只係簡簡單單, 夠平又放得落就成交lu......

搞掂呢樣, 又再行去花園街訂埋d 窗簾先.....俾錢之前, 梗係要食返串辣魚蛋先啦......

今次, 我地只係做兩幅羅馬簾用o黎放o向書房同睡房呀, 我地要厚身do既強勁遮光布呀, 因為間屋一有太陽就會好晒o架喇...今次真係好開心, 揀到d我鍾意o既暗花圖案, 算係我無得貼牆紙o既一個小小補償....加上, 小倫講價成功就更加開心啦......

咁樣o向個旺角行來行去, 原來都好攰呀....不過, 因為今日駛o左好多錢喇. 最後都係決定返屋企煮d 簡單o野食就算數lu......

為o左感覺上好似有少少蔬菜類o既食物, 我地o向jusco 買o左pack 秀珍菇炒, 買多兩塊醃好o既豬扒, 就可以粉烏冬喇....唔知呢餐會唔會係我地搬走前最後一次開火呢????

食飽飽之後, 我地又再上去新屋巡視下, 呵呵呵.....真係無聊透頂呀!!!

重建家園 - 13 ~~ 大變身(II)

尋晚掛住同阿咩 & Tammy 鬼混, 所以無上到新屋望下.

今晚放工, 一於同小倫上去又偷睇下間屋, follow up 下師傅o既進度先~~~~

就咁睇, 應該做o左第一次防漏同批盪lu, 唔知幾時做埋第二次呢???

做埋第二次批盪就可以開始油油喇!!!!!希望唔好再落雨啦!!!

重建家園 - 12 ~~大變身

今朝一早, 不停咁落大雨, 起身後, 先去屋苑o既客戶服務中心搞埋張裝修紙先.....

辦妥手續, 就返去同阿媽食早餐, 之後返上屋企執下屋啦, 事關夜d 有人上o黎睇樓呀, 費事俾人見到我地咁亂啦....

雖然下晝同小倫去o左一田運o左個大吉返o黎, 無買o野但都好攰呀!!!!

不過, 我地食完晚飯, 又再上去新屋, 睇下整成點啦...

估唔到, 一日d 師傅就已經做好晒剷牆喇....

進度唔錯, 希望可以趕得切完工啦!!!!

如果唔係, 我同小倫就要o訓街o架喇!!!!

重建家園 - 11 ~~終於到手喇!!!

今日又到我放whole day等收樓喇....

不過, 都預o左要下晝五, 六點先有得拎鎖匙, 所以, 同阿媽食完brunch, 就先出去一田迫下先...

迫完好攰, 所以返屋企抖一陣, 無幾耐就收到經紀Alice o既電話, 叫我去佢公司拎鎖匙喇!!!Yeah!!!!

於是, 我就去地產公司拎鎖匙啦......一路行緊去新屋o既時候, 點知唔識趣o既香港寬頻又打o黎同我傾renew boardband d o野喎.....跟住, 又電話無電喎, 又不停有人打o黎入線, 總之就煩爆啦...

想一個人上去試下enjoy 下間屋係屬於自己o既感覺最終都係做唔到.....

結果, 就係要飛甩我阿媽, 等埋小倫放工, 連埋佢一家人同埋個油漆師傅一齊上去, 見證住呢個歷史時刻, 相當無引呀!!!!!!!!!

收樓o既興奮心情無晒!!!小倫同油漆師傅傾埋d details , 揀埋顏色, 我地就去食晚飯lu.....

食飽飽, 我同小倫就帶埋掃把, 同埋一d 簡單o既清潔用品上去新屋, 兩個人享受下間屋係屬於我地兩個o既感覺....

見成屋都係塵, 我地就忍唔住手開始掃下地呀, 抹走dd 塵先.....

係咁易掃完, 即刻覺得間屋無咁樣衰喇.....感覺好好多呢~~~

(分別係客廳 & 飯廳)

(左面o既大房會用o黎做衣帽間 & 書房, 右面o既就會做睡房)

希望油完油, 入埋d新傢俬之後, 間屋會靚仔d 啦.....雖然唔知會o向度住幾耐

重建家園 - 10 ~~ 火滾驗樓

之前一早講好o架, 今日可以去收樓啦, 咁因為我要full day 去會展上HKICS o既Annual seminar, 咪唯有小倫放一日假啦.....

如果唔係要出o黎上堂, 我都放O左假啦....一心想做d 驗好樓, 萬一有乜問題都可以早d 搞掂丫嘛....結果呢.....

唉, 個經紀話個業主仲搬緊o野, 叫我地八點先上去驗樓喎.....

聽日之後, 真係一肚火呀!!!!

小倫仲放一日annual o添, o徙晒d 時間!!!!

而且, 我之前約o左妹妹食dinner, 因為今日係佢農曆生日, 原先plan o左7點驗好樓就可以一齊食飯開心下啦.....俾佢地咁搞法, 飯都食唔到...真係唔開心呀!!!

最後, 我地都係7點半上去驗樓, 因為個業主話喎, 佢地有兩個櫃d 裝修師傅話係入牆喎, 拆唔到, 經紀就叫埋我地上去, 當面同個業主講啦...上到去, 小倫就同個業主講, 果兩個櫃根本就唔係入牆, 叫佢地拆埋先好走呀!!!其實人地都好慘o既, 間新屋裝修o左幾個月都仲未得......

傾掂數, 係咁易開下d 水o候, 試埋d電制就當驗好樓啦...始終又唔係買一手樓, 驗樓都真係無乜好搞啦.....

又有新玩意

趁住今日下晝放假, 於是就出發去拎今次訂Cosmopolitan 雜誌o既禮物啦.....
以前成日都想等書展o既時候訂, 但係等到書展呢, 通常d 禮物又唔多合心意, 今次見d 禮物都ok, 一於就訂一年啦....
首先去Quarry Bay 太古坊, 拎o左RMK 先, 跟住再去PP 拎serum....

重建家園 - 9 ~~ 準備就緒

今日下晝放半日compensation leave, 原先一早plan o左用o黎驗樓, 點知賣家o個邊仲未搬清晒所以o野, 咁唯有聽日先去驗樓, 今日就上去律師樓簽埋d 文件啦...

過程好簡單, 加上呢個律師流流地, 簽好晒d 文件, 開埋cheques,就搞掂lu......文件上o既o野已經辦妥喇......Yeah!!!

成個下晝我都唔得閒o架, 因為要遊地鐵河呀!!!先去太古坊, 後去金鐘, 尾站荃灣.

小倫見我尾站去荃灣, 於是佢都安排自己出job, 咁就可以去荃灣meet 我啦....

因為我地仲欠一盞燈for 睡房呀.....其實早兩晚o向大埔都已經睇中, 不過, 想睇下荃灣有無平d靚d, 終於, 我地去返買飯廳果間問下個老闆有無得賣啦, 點知佢好好人, 自己舖無得賣, 打去第二間舖問人有無, 仲賣平o左好多俾我地o添.....好o野, 依家一屋o既燈都搞掂喇, 仲約埋裝燈師傅o添....

聽日再搞埋d 電費, 煤氣費轉名手續就七七八八喇!!!!

依依不捨

雖然一邊o向度計算住幾時搬去新屋, 又好期待有屬於自己o既家, 但係, 一邊又好唔捨得依家住緊呢度....

即使呢度只係租, 不過, 我地真係好鍾意呢度o架.....因為方向好, 又夠高, 所以成日都有風, 朝早又有陽光入室......風景又靚, 因為成個屋苑唔係有好多座可以望到海o架...所以, 平時我地都當正間屋係自己咁o架, 無話因為間屋係租o既, 而將佢搞到好殘囉....d 傢俬, 廚房都keep 得好新淨o既....成日都會抹.

因此, 就趁今日天氣好, 影低窗外o既風景留念啦.....

重建家園 - 8

琴晚去到design house, 睇完圖, 用o左兩粒鐘傾好埋d details, 終於都confirm 晒d 傢俬喇....

今日上晝, 小倫亦都同agent 約埋驗樓o既時間, 連油漆師傅都confirm 好.....

終於, 新屋大部份o既o野都in good progress 喇!!! 希望一切順順利利啦.....

依家暫定:

20/5 : 上律師樓簽文件
21/5: 驗樓
22/5: 收樓, 油漆師傅site visit
23/5: 開始剷底, 批灰
31/5: 傢俬起貨
2/6: 油漆完工
3/6 or 4/6: 傢俬送貨
6/6: 搬入新屋

我地亦都未趁呢個星期要執拾好晒所有行裝lu.....仲要夜晚放工去新屋做清潔..............

重建家園 - 7 ~~ 火滾篇

自從3/5 度完呎之後, 我都好有耐性咁等design house 果邊覆我個second draft 啦...

好喇, 等o左一星期都仲未見有動靜, 加上, 我地發完夢, 一齊照原定計劃進行o既時候, 我就開始要plan 下d 時間要點安排啦....

星期日打去, 個designer 問我星期二得唔得閒去睇圖啦.......咁我星期二約o左班靚太食飯嘛, 梗係唔得啦, 於是就改做星期三啦....好喇, 我星期一打去同個designer 講, 叫佢不如email o左d 圖俾我望下先, 咁我有足夠時間諗清楚先至傾咪會efficient 一d 囉...

心急o既我, 星期二不停咁check emails 啦, 等極都唔見有喎, 咪再打去follow up 啦, 個designer 就話佢好忙, 但係星期三佢放假, 最多佢o向屋企做好再email 俾我. OK, 我俾多一次機會你啦....

結果, 我琴日等足一日, 都係收唔到email , 我真係火都o黎埋呀!!!!唔知佢係唔係想我去燒佢間舖呢?? 定係佢見我平時對佢都好聲好氣, 以為我無乜所謂啦.....我今次真係忍無可忍喇!!!!

我係客o黎o架嘛, 我話之你有幾忙, 放唔放假都唔關我事, 你答應得話email 俾我, 我就一定要收到啦......俾o左兩日時間都仲未有...有無搞錯!!!!坦白講, 我唔係有奄尖, 只係我要先睇draft  o者, 我o既要求一d 都唔過份丫....

頭先lunch hour 打去, 話佢知我今晚落去舖頭傾, 佢都仲記得話差我份圖o架, 但係都無話send  返俾我!!!!!我真係好鬼嬲.......

竟然係唔係我份人太nice , 所以佢蝦我呢???

Meeting with ESD friends - 五月聚會

今晚放工約o左一班靚太o向旺角食飯聚下呀!!!!

好難得, 大家結完婚都仲有心肯出o黎見下面, 唔會結完婚之後就做隱形人......

原先, 我係plan o左一夠鐘就執袋走人, 點知, 遭奸人所害, 加上自己on 十十信人, 所以要七點先得啦....仲以為可以去接埋阿茄放工, 又或者同阿咩去行下街先....

不過, 最後, 都係我, 阿咩同阿茄最早到, 開定茶等佢地幾個到......無幾耐, NN 就帶埋路痴o既小呆出現喇...估唔到阿kiu 轉o左工又係要咁晏先收得工, 慘.....

人齊就開飯喇!!!!

石家小B 出世喇!!!

琴晚食完飯返到屋企之後, 收到格格sms 話佢入o左院喇, 聽日一早七點幾就會做手術, 開刀將佢同石先生o既小寶寶帶o黎呢個世上喇!!!

從阿sa 口中得知, 佢o既情況, 雖然唔算係大件事, 但係都有d 擔心呀!!!始終, 格格經過咁多波折, 咁難得先有呢個BB....

重建家園 - 6 ~~ 夢一場

好多朋友當知道我地買o左樓之後, 都恭喜我地, 替我地開心. 但係反而我地無乜特別o既感覺, 我地o既睇法只係為o左解決住o既問題, 加上供樓o既支出又比租屋平, 而且又遇上一個覺得值得買o既樓盤, 於是就買o左樓啦. 當然, 呢間屋唔係我地o既dream house, 我地亦都預o左唔會長住o向度, 過兩, 三年再換樓 (當然要經濟狀況許可啦~)

其實我一直心儀o既單位, 係同一個屋苑另一個則, size 比依家大一百呎啦, 但係間格會較依家o既呂字廳好用, 會有兩房兩廳. 可惜, 因為呢個則都算係屋苑o既則王, 所以呎價一直都高企, 仲要估唔到價.....
五一假期前, 我地o既agent 講俾我地知, 有一個單位應該我地會鍾意, 問我地有無興趣, 梗係有啦...於是叫佢約啦, 點知個業主要去旅行, 我地唯有等佢地返o黎啦....

o向呢幾日o既假期, 我地日日望住呢間屋, 因為我地廳o既窗係對住呢個單位o既睡房o架, 睇下個業主返香港未啦, 又大家傾下究竟搏唔搏得過換樓啦, 夠唔夠錢用, o向乜o野情況要決定買, upper limit 去到邊咁啦......

終於, 今日中午, 個agent 打o黎話約到今晚去睇.....反正我地無乜o野做, 就約好七點上去睇啦.....我地準時上到去, 點知, 屋內已經有另一間地產公司o既經紀, 同埋3個睇樓o既人 (佢地o既年紀睇上去, 同我地差唔多), 咁我地o向門口等o左一陣,佢地都未出o黎, 個業主就叫埋我地入屋, 一齊睇啦...

入到屋, 我同小倫都覺得比我地expect o既好, 因為查過呢個業主買入o既時候已經係十年前, 假設中間無裝修過的話, 間屋都唔算係十分殘, 不過我地都預o左會大執呢間屋 (如果買得成o既話).

我地望完廳, 房, 廚房同toilet, 就同埋個agent 入房傾, 後來個女業主就同我地講, 話廳出面o既人佢地已經confirm o左話ok, 價錢同我地一樣, 我地再同個女業主傾下計, 佢知道我地都真係有心買, 只係timing 問題, 無辦法啦, 真係遲過人地睇嘛....

加上, 之前已經同小倫傾好, 講o左唔會再追價, 坦白講, 我地係覺得個單位ok, 但未至於鍾意到值得我地加錢去買o既, 唯有再等下次, 睇下幾時又有人放盤啦....

就係咁, 我o既換樓夢就咁完結了...都好o既, 唔駛再日諗夜諗, (傻下傻下o既我, 已經一早諗好d 傢俬要點放呀 : p ) 專心搞埋新屋o個邊o既o野, 入o左伙再算啦!!!

一年一度企到腳仔軟o既股東會

今日又係一年一度o既股東會.

一返到公司, 就已經要進入作戰狀況啦....

明明我唔係floor manager, 唔知點解, 我要負責埋主場地o既物資安排囉....真係岩有此理呀!!!

早知, 我就扮晒懵啦, 好似其他人咁, 阿姐唔吩咐, 講到明, 就乜都唔理啦....

反正, 我努力與否, 結果都係一樣, 一樣都係咁唔公平o架啦...

重建家園 - 5

琴日睇完牆紙, 令我成日都心掛掛.

琴晚上網search 過, yahoo 同ebay 都唔見有人賣呢個牌子o既牆紙, 而且check到呢個牌子o向香港o既代理, 就正正係我地琴日見到o個間牆紙公司, 唔通註定我要買貴o野???

心心不忿之下, 就send o左email 去北京o既代理問下啦, 睇下會唔會大陸訂會平d 先....

今日將呢件事同o左咩咩講, 佢叫我去淘寶網搵下, 於是, lunch time 一夠鐘, 我就用自己部netbook 上去淘寶網search 下啦...果然皇天不負有心人, 終於俾我搵到有人賣呢個牌子o既牆紙喇, 可惜, 唔見佢有post 我想買o個款喎, 唯有send email 去問啦....

來來回回o既emails,個條友仔都仲未話實我賣幾錢, 都講到我有d 火火地呀!!!唯有再send email 問啦.....

點解我會想貼牆紙, 其中一個好大o既原因就係我諗唔到油油o既顏色. 因為我唔想成屋都係用白色咁悶, 又大路, 一d style 無, 我想將兩間房油深紫色, 同淺灰色, 但係又無人贊成我o既諗法, 令到我非常唔開心.......唯一解決o既方法, 就要貼牆紙啦....當係有d 點綴啦.....

不過, 都仲要計下成本先得...因為我地唔預o向新居住得耐, 我地expect 住2-3年o架嘛, 如果要用好多錢去搞, 就好似唔係太化算囉.....

唉, 真係煩呀!!!

五一假期@第三天 - 度呎篇

約o左幾次, 今日終於約到個賣家俾我地帶埋designer 同個師傅上去我地o既新屋度呎喇!!!

雖然佢地一家三口都仲未搬走, 而且仲好似未有跡象開始執o野, 但係都影響唔到師傅度呎.....

加埋睇樓o個兩次, 今日只係我地第三次睇下間屋呀...所以, 今次我好留心望下d 地磚, 廚房同埋個toilet 呀!!!結論係, d 地磚可以唔駛換, 同我地o既design 都match 到, 因為都係白色, 至於廚房都唔駛執, 而且, 仲應該夠位俾我放個大焗爐. 不過, 個toilet 就或者可以搵人做下翻新, 始終toilet 做得新淨d, 會用得開心d.....

度完尺之後, 我同小倫先去買定餸預備今晚玩煮飯仔. 搞掂晒, 我地又出去旺角行下街....我地一直都無諗過舖牆紙, 但係見到有牆紙店, 都行入去八下啦...

Oh, 點知, 俾我一眼就見到一款, 好鍾意呀....之前, 成日睇人地d 乜裝修設計, 覺得依家好興o既深色有花紋牆紙, 但係, 今次我見到o既就完全係另一個style, 係好淺色帶淡淡o既粉紅色, 仲要有好多好多蝴蝶o既圖案, 我又點會唔鍾意丫.....多口問下個sales 啦, 嘩, 原來呢款係瑞典o野, 比平時一般o既牆紙厚, 叫做牆布, 而且上面d 蝴蝶圖案係絲絨, 所以價錢比較貴, 仲要唔包由瑞典運過o黎o既費用....不過, 真係好靚呀, 連小倫都話唔錯.....

行完街街, 我地就返屋企lu....小倫今晚又落廚呀!

今晚又有兩餸一湯 : 竹笙粟米羹, 蒜蓉豉汁蒸排骨, 清炒北京菜心苗, 瑤柱蝦乾蒸水蛋.....

(P.S. 因為部相機借o左俾媽咪拎去台灣旅行影相, 所以無得影o添)
好o野, 聽日又有得帶飯呀!!!

五一假期@第二天 - 大食一餐

話說琴日hea o左一日, 無乜o野做, 夜晚同pingu 傾開msn 先發覺, 原來我地兩pairs 都無乜特別o野做, 於是就約不如一齊食tea buffet/dinner buffet 啦...

點知, 我地玩即興唔成功, 幾間酒店都fully-booked, 既然去唔成食buffet, 我地就相約不如一齊打邊爐啦....

首先, 我地先由Pingu帶領去大圍街市買餸, 原來今晚仲有Queenie 妹妹同埋阿星一齊食呀, 真係好喇, 多d 人可以買多d o野食呀..買完o野我地就上去Pingu屋企預備今晚豐富o既晚餐lu...

經過運動人同小倫o既努力, 無幾耐我地就差唔多開餐lu.....而Queenie 妹妹同阿星亦都o黎到喇...
今晚好開心, 我地一齊打邊爐,  一邊睇波, 一邊傾計~~~~~

食飽飽之後, 仲去埋食糖水先返屋企呀!!

五一假期@ 第一天 Hea~~~

今日係假期o既第一日, 難得妹好去o左大連打hockey 未返, 媽咪同細佬又去o左台灣旅行, 今朝無人叫醒我地.  我同小倫可以舒舒服服咁o訓到十一點先起身lu.....

起o左身之後, 早餐都懶去食, 我地兩個又匿o向書房玩我瘋狂迷戀o既遊戲 -- AOE....呢隻game 已經過o左期好耐o架喇, 但係唔知點解, 我好鍾意玩o架, 隔一段時間又會load 返隻game 出o黎日打夜打....

我地一玩又4粒鐘呀!!!玩到連敏敏同堅堅o向深井都返埋大埔我地先收手, 落樓下同佢地一齊食tea (即係我地o既早餐+ lunch + tea )...

大約7點, 我地就買埋半隻燒鵝返去奶奶度食飯兼預祝母親節!!!

食飽飽, 我地又打麻雀, 今晚原先我好叻o架, 得我一個人贏, 點知我無後繼, 打完兩圈都係輸o左少少呀!!!

儲o左一個星期o既眼o訓, 今晚終於可以盡情地o訓喇!

第一日o既假期就係咁hea 就完結了!!!