煮飯仔 - 4

呢兩個星期, 真係忙到傻呀!!!!

好耐都無開過火煮飯喇...見今日行完街, 有少少時間, 一於煮少少o野食下啦...

買o左一隻蟹同一斤花甲做湯底, 加埋d 墨魚丸 豆腐, 金菇, 烏冬, 正呀!!!個湯好甜呀!!!

早到的聖誕禮物 - II

上星期送o左聖誕禮物俾小倫, 今晚就到我收喇!!!!

o向99屋企食完美味o既海鮮邊爐之後, 返屋企前小倫帶我去豐澤喎....

唔係呀, 上星期先買完o野, 今晚又買???我破晒產lu wor...

原來, 今次佢有我o黎, 係送聖誕禮物俾我呀!!!

就係一隻暖手蛋呀!!!

話呢隻暖手蛋可以用500次喎, 環保過做平時個d 用完即棄o既暖包, 加上, 呢幾日天氣轉冷, 遲d 又要去honeymoon, 今晚送俾我真係o岩晒時候!!!!

多謝小倫......

早到的聖誕禮物

今晚同玩阿sa, Phoebe, Dorothy 佢地o向APM 食完飯, 預祝阿sa 下星期生日快樂後, 我地就各自各散lu...

見時間尚早, 我地就行下街啦...咁就弊喇...

無啦啦, 又提早買Christmas Gift 喇...

仲要係大大大出血呀!!!

為著去小樽影靚相同埋北海道o既雪景關係, 小倫買o左新鏡頭同flash light 呀!!!

唉, 今次去旅行, 又要拎多d o野去喇....

跟住, 仲去埋無印買o左幾本輕身d o既相簿, 返屋企入晒當日婚攝影o既standard 相, 5本o岩o岩好入晒過千張相呀!

入好晒一本本, 整齊d, 又好拎d, 唔駛散修修東一本西一本呀!

之後, 行過Crabtree, 見到HSBC 信用卡做緊promote 喎, 行入去一個圈, 唔覺意又買o左少少hand cream 當係送俾兩個媽咪o既聖誕禮物啦, 另外買多一支俾自己.

買鏡頭放o既贈品呀!!!有華仔o既仔仔, Andox 同黑仔bookstands, 一黑一白,好襯我地屋企呀!!!哈哈

12月生日會 & BD 相片分享會

阿sa 下星期六生日, 為免阻住佢地一家人慶祝, 所以我地就提早一個星期, 今日同佢食生日飯喇....

哈哈哈...之前又話各有各上去佢屋企, 點知最後大家都係o向apm join 埋一齊呀, 仲o向KFC 食少少o野先...

跟住, 我地就坐Kenneth 車上去佢地屋企喇..佢地依家間屋要有車先方便, 如果唔係, 只有搭van 仔或者坐的士呀...但係, 呢度地方夠大嘛, o岩晒俾婧婧玩呀!!!

美味大閘蟹

忍o左口好耐呀, 今晚終於可以大解放喇!!!

由於要籌備婚禮, 儘量以最佳狀態見人 (可惜到最後都只係以一副殘樣面對大家), 加上實在太忙, 我同小倫今個秋天, 一隻大閘蟹都無食過落肚呀!!!

琴晚, 突然慶起, 約埋Pingu 同運動人兩公婆今晚一齊食大閘蟹....

朋友仔, 歡迎你!!!

今晚, Pingu & 運動人佢地兩個o黎探我地, 唔單只係上o黎一齊食下o野, 睇下video, 佢地仲帶o左我個朋友仔送俾我, 同埋佢個新歡上o黎玩呀!!!

講起呢個朋友仔, 佢就慘喇, 原先, 佢應該早幾個月前, 我地入伙o既時候就o黎到成為我地屋企o既一份子, 但係, 佢因為無錢買船飛呀, 所以一直都o黎唔到香港...

不過, o向上天緣份o既安排, 竟然俾Pingu o向我地結婚o個日, (i.e. 11月8日, 怕大家老人痴呆, 唔記得, 所以順帶一提)發現朋友仔偷偷地o黎o左香港呀! 所以, 佢就立即帶佢返屋企, 留番今日送俾我呀!!!

真係多謝晒!!!!

究竟朋友仔有乜用處? 你地自己估下啦...kekeke

妹妹變了直豎拇指

今晚放o左工, 我先一個人去睇下d 旅遊資料, plan 下honeymoon 跟邊間旅行社好...雖然我有好長o既假期, 但係小倫公司實在有太多jobs 要做, 所以應該唔可以去好遠玩lu...唯有近近地, 去北海道就算啦...

睇下旅遊資料我地就食飯啦, 點知, 差唔多食完o既時候, 妹妹打俾我, 話我知佢打hockey 整傷手指, 流o左好多血, 但係無乜大礙, 唔駛擔心, 佢個朋友仔陪佢去法國醫院睇醫生....

即使明知應該唔會有太大問題, 但係我都有d 擔心o架..妹妹由讀中學開始, 一直都係業餘運動員, 咁多年都無受過傷, 連拗柴都未試過o架.....今次, 佢話流血喎, 都有d 驚驚呀!!!

過o左一陣, 妹妹再打電話o黎講我知, 佢同朋友仔由法國醫院哲的士去QE 喇, 因為法國咁夜骨科, 所以要去QE睇急症呀....

我地去到ER, 已經見到妹妹同佢個朋友仔坐o左o向度等喇...於是, 我地就出o左去外面, 一路睇台慶, 一路等....

最後, 等o左一個鐘頭, 妹妹就出o黎喇...好在, 佢無乜事, 只係縫o左5針, 但係妹妹話打麻醉針就好痛喇!!!睇完醫生, 無晒事之後, 我地先打電話講俾媽咪知呀, 因為佢一定會好擔心o架...

睇下, 妹妹隻手指大隻o左幾好...哈哈哈

婚後首個Shpping Day

完成o左婚禮之後, 終於到o左今日有自己o既時間, 可以兩個人悠閒地休息下喇 !!!!

過去o既一個星期實在太疲累喇, 無論係physically 定係mentally, 所以, 今日我地o訓到十點幾先起身呀!!!無無聊聊, 就到十二點幾喇.

妹妹返完church 打俾我, 話想叫下姐夫請佢食lunch喎, 於是, 我地兩個拿拿聲梳洗好, 就去樓下o既珊瑚堡join 埋佢, 媽咪同埋細佬一齊食個lunch!!!真開心, 好似好耐無同佢地一齊食o野咁呀!!!

食飽飽就同媽咪, 細佬去揀手提電話呀!!因為媽咪個電話成日都收得唔好, 所以今日我地買過新電話俾佢, 而細佬都要換電話呀! 佢成日心大心細,揀o左幾個月先揀到心頭好......

之後, 我地兩個就出o左沙田, 因為要陪敏敏揀notebook 呀! 佢地部電腦又壞o左喇, 所以要再買過新o既...佢地未到之前, 貪得意下行Agnes B 喇...弊, 我又要買o野喇!!!!好唔好彩地, 俾我睇中送俾我阿姐做生日禮物o既o野, 佢份生日禮物應該上星期要送俾佢喇, 但係我又睇唔o岩, 而且又唔夠時間, 今日總算買到一樣o岩佢用o既禮物喇!!!

左揀右揀, 敏敏都係想買sony o既notebook, 不過, 最後都係唔買住, 叫佢拎返部腦返o黎大埔俾小倫整下先啦....

之後, 我地又各有各行街lu...

今日o既收穫都幾豐富o架...

o向無印買的雜物架...用o黎放我的護膚品呀!!!

小倫都o向無印買o左個腰bag 呀!!!

下星期開始轉涼, 買定件fleece 俾自己先...o向uniqlo 買, 又平又靚!!!

11月第一單 : 雀之婚禮

今日係11月o既第1 日, 亦係我地成班11月姊妹當日, 虹姐 -- 小雀同英俊瀟洒o既Hug 生o既大喜日子呀!!!
好緊張呀, 踏入11月, 代表我地各人勞心勞力o左咁耐o既project 埋尾o既時候到喇~~~希望大家都順順利利啦!!!

婚前聚會 ~~ 趙氏伉儷

今晚係Halloween, 我地約o左運動人同Pingu 一齊去大圍食小肥牛呀!!!

上次同Priscilla & 花師奶食得好開心, 所以今次再食多一次呢間!!

o向羅浮宮好趕咁拎完相, 我同Pingu 兩個就拿拿聲趕去大圍喇...

真係激死人, 趕時間o架啦, 但係等極都無巴士喎, 搞到運動人一早去拎枱, 要自己一個人坐喇....sorry

坐低, 大家又掛住不停咁傾傾傾, 拎住個menu得個望字, 但係又好肚餓喎...

新造型

由今日開始, 我放一連12日o既婚假喇....

公司只有5日婚假, 再加上自己本身OT o既補假同埋星期六日, 就可以放一個長少少o既假期喇...
我一定要提早放假o架, 因為仲有好多o野都未有時間搞, 唔放假我一定會發癲啦...

一早起身, 同媽咪去覆診, 之後去埋飲茶同佢買埋girdle...

然後, 我地兩個就去整靚靚個頭呀!

媽咪只係成個頭做colour, 我就做highlight 連底色.

所以, 媽咪好快就搞掂, 佢返屋企先, 梗係我後數啦~~~..~

不過, 中間都有段小插曲呀! 就係我d 頭髮唔上色呀!!!

可能因為有耐無染頭髮喇, 所以要麻煩髮型師妹好幫我從頭再上一次色, 搞o左好耐, 終於成功喇!!!

我只係做o左暗紅色highlight, 因為唔想做得太誇張呀! 底色就做o左深啡色, 但係真係太深喇, 出o左o黎似黑色多d, 死啦, 有d 後悔o添....唔係我心目中想要o既啡呀, 我想要似日本雜誌果d model 咁淺色呀!!!

弊喇, 要再同Emman 傾下個頭點set 喇!!!

做facial 失敗篇

真係慘, 懶到出汁o既我, 難得的起心肝去約做facial 啦...

明明金融海嘯o架, 點解都仲有咁多人去做facial o架...

今個星期, 我約o左幾日, 要約到星期三晚先做得成咋....

真激氣!!!

大Project o既日子臨近, 我要每隔2日去做一次o架喇..

yeah! 過o左之後, 就唔駛再去做facial 喇!!!

唔知點解去睇樓喎

今日o訓醒之後, 約o左惜惜交收d 兄弟呔呀! 我仲有幸得見亨利一面, 呵呵呵....

之後, 同o左小倫出旺角四圍行, 行乜o野, 梗係行金舖啦....周大叔週年大減價嘛, 唔買都睇下啦...因為妹妹同細佬兩個見我之前唔見o左對鑽石耳環, 非常傷心, 就話夾份送對耳環俾我o黎換取佢地下半生o既自由同寧靜喎!!!

深水埗鬼混記 + 石府痴餐記

今日真係我自由活動o既日子呀!!!

中午約o左咩咩一齊行深水埗呀!

第一站, 我地先行珠仔街, 幫小呆買d 粉紅珠珠呀, 跟住咩咩帶我去搵絲帶阿叔, 嘩, 估唔到個市咁差, 絲帶阿叔都加價喎....可惜只係買幾蚊o野啦, 無機會講價o添.....

第二站, 我地去睇手套喇....Yeah, 咩咩帶我去呢間舖就係上次小倫憑我好簡單o既形容帶我去o個間一樣呀, 不過, 都係睇唔o岩呀....無引....

第三站, 就去到德祥呀! 我地一心想買布同咩咩對可愛肥狗扮靚啦, 點知有個師奶o向樹, 又黑口黑面喎, 我地其實只係想問下個賣布阿叔意見o者...激死.

就係因為呢位阿太, 我地決定先去行下玩具街先....

因為上次有朋友仔結婚, 我地賣o左一早搞掂o既花炮, 所以我要自己再買喇....無乜所謂啦, why?
哈哈, 我今次除o左買俾自己, 仲幫埋朋友仔o既妹妹呀, 由於一買就要50支喇, 所以個花炮阿姐俾o左個靚價我呀, 抵到爛呀!!! 唔駛俾錢金都賺呀! 金都真係搶錢o架...

行完玩具街, 我地返轉頭去德祥搵賣布阿叔, 阿叔話原來要買一卷卷o個d 紗俾肥狗喎, 車, 早d 講嘛, 唔駛o徙我地時間走來走去呀...

搞掂之後, 我地行返去黃金買SD card 同埋CDR, 唉, 平時同小倫o黎行有佢帶住, 今日佢唔o向樹, 好驚o向黃金變成"迷失黃金"呀, 所以唔係行o左好耐, 無乜點格價就買o左呢兩樣o野lu....

買完o野, 肚仔餓, 但係我又唔知有乜好食喎, 就同咩咩一齊去食碗麵就散lu...

弊, 上o左小巴先發覺自己唔記得行賣布o個條街呀, 因為我想睇下自己買毛毛地毯要幾多錢呀, 俾錢人地舖要2千蚊咁貴...

唉, 拎住咁多o野, 原先book o左去荃灣做facial o架, 唯有改聽日啦....想返去放低o野先呀...

唔去做facial, 又想去剪頭髮, 但係又唔夠時間, 唯有o向屋企hea 一陣就入盈翠半島探下格格兼痴餐啦..

石先生o既手勢唔錯o架....我地三個差唔多食晒所有餸呀!!

睇埋與敵同行, 就落去join 小花同凌楓呀, 因為小花借兩本日本o既set 頭化妝俾我呀, 真係唔該晒呀!!!

我家的鐘

話說, 上次去深圳, o向老翻Franc Franc 買o左個古惑的鐘返o黎, 開頭見佢唔捨$50, 個樣又靚靚仔仔, 就算啦...點知, 個鐘勁玩o野喎, 一係唔郁, 一係行得慢, 總之, 無一次見佢係o岩時間o架喇...

其實, 我地一早就睇中心水o既鐘o架喇, 不過太貴, 唔捨得買喎, 過千蚊一個鐘真係唔多抵囉...
點知, 終於俾我地搵到一個大家都鍾意o既鐘喇!!!

咪睇佢個款咁簡單呀, 係designer clock o黎o架....估下點解我會鍾意佢啦???

明天開估

突然買金鬼混記

今日無工好得閒, 因為原先約o左個大學同學仔食飯派帖, 但係琴晚改o左期, 所以今晚放工就好得閒咁陪咩咩o向中環近近地睇下金....

佢想買條鍊呀, 咁我地首先去周大叔睇下啦, 有一隻細d o既豬牌, 但係得8錢幾, 豬媽媽又唔cute, d 豬B B 又唔夠趣緻喎, 而且又唔大體, 再睇下一兩幾o既豬牌啦, 唔, 似d 樣喇, 比之前o個條大體好多, 但係大叔收o既手工好貴呀! 所以都係走人啦...

又話香港金舖多過米舖o既, 都唔係o既....行o左一陣,先再到一間唔似有金賣o既周生記喎.... 入到去, 問個姐姐拎d 鍊o黎睇下啦....豬牌有條好正o架, 不過, out o左咩咩o既筆直, 所以得個睇字,

再望下d 龍鳳鍊同傳統o既花花鍊都係一般, 最後講o左俾個sales 姐姐聽佢個筆直, 叫佢搵d o岩o既o黎睇下啦, 試o左3條, 其中一條又ok 喎, 有個好modern o既心心, 襯褂又得, 襯晚裝都得, 得o左, 於是就成交lu....
好o野! 生哥o既手工貴平過大叔好多呀!!!!大叔食水真係深喇...

搞掂都差唔多七點幾lu, 所以我地去o左附近o既D'elifrance 撐下枱腳, 談下心就走lu.....

心靈補償

由於俾Marco Polo 放完我血, 個心有d "硬"住"硬"住, 所以小倫帶o左我地Haagen Dazs 食我o既favourite -  High Tea Set 呀!!

Yeah!!我覺得呢個set 真係好鬼抵, 又好好味o架...一次過可以食咁多款唔多口味o既雪糕, 正!!!

第一層係我地揀o既四個球雪糕 (My choice: Belgian chocolate & Bailey; 小倫's choice : Mango sorbet & strawberries)

第二層係甜點;

第三層係新鮮水果

食完個set, 一人仲有一杯drink, 小倫o既lemon tea, 我就梗係要美味Iced Mocha

食飽飽之後, 我地四圍行下啦...

夜晚返到大埔, 竟然仲可以走去吉野家食牛肉火鍋呀!!!

麻煩女人心大心細, 好煩呀!!!

琴晚先搞掂o左個decoration, 駛突o左, 今日又搵o野俾自己煩喇....

今回又係煩d 衫囉.....唉, 女人心多多, 真係好#@&*(&( 麻煩o架.....

事緣係, 上次上去hold 衫, 已經揀好晒3件eg 啦, 婚紗最好, 舊年一試就揀o左, 小倫好滿意, 之後都無再睇其他款lu....講真, 揀o左o既eg, 唔係唔好, 只係覺得好似無其他人咁講, 有好大o既變化囉....總係"型" 住有兩件都係同色系o既衫, 好似唔多好囉....

心大心細, 之前同姊妹gathering o既時間, 佢地都覺得最近試過o個件淡粉紅色都唔錯o既..我都鍾意, 但係諗唔掂點安排囉...做席前又好似麻麻地, 用o黎送客會好d, 但係好似用勾手指好d 喎....

小倫終於抵唔住叫我打去問下Connie加多一件eg 要幾錢喎, 果然, 佢俾o左個好開心o既價錢俾我呀, 好好好吸引呀, 但係, 再諗深一層, decoration 已經駛突o左喇, 唔想呢個item 都再駛突呀, 而且, 我怕當晚d 時間難control, 萬一到時唔夠時間換唔切第4件eg, 咁咪o徙o左囉, 如果件eg 只係幾百蚊租返o黎就無所謂o者, 千幾二千蚊喎, 用o黎食o左佢仲好啦...

於是, 我都係決定唔要4件eg, 暫時都唔轉衫住lu!!

好多謝最近不斷俾我煩o既朋友仔呀, 我成日唔係問佢地邊件衫好, 就係邊個頭好, 真係幾惡頂呀!!!我都唔想成日搵咁多o野諗, 但係我真係控制唔到自己呀...Sorry

原來世界真係細喎.....

得閒睇下Kathy 個blog, 見到佢最近做朋友婚宴o既mc 喎, 梗係留心d 睇下啦...

好奇怪喎, 個新娘o既中文名叫"真真" 喎, 原本都無乜特別o架, 點解, 再望下d 相, 發覺個女仔o既英文名又叫做"Ruby", 咦, 咁似我以前一份工個reception妹妹個名o既?

咁我梗係要落足眼力睇清楚d 相先, 又真係幾似喎....

於是, 趁今日唔駛返工, 咁得閒, 就msn 問下Kathy 先....嘩, 不得了....真係我識得o個個真真o黎o架.....仲有, 原本Kathy 同我都係做過同一間公司o架....只不過係時間唔同, 佢早我三個月, 佢走o左之後, 我先去做, 不過, 我都做唔長, 捱o左半年, 就走人lu....

呢個世界真係咁細? 定係我地咁有緣呢, 咁都撞得返喎.....

真係要搵個時候, 三個一齊出黎食下飯先得喇.....

我要靚靚

距離結婚o既日子日漸迫近, 睇怕都唔可以繼續懶落去, 係時間要臨急挽佛腳o架喇...
上星期, 我已經好乖咁走o左去做好耐無做過o既facial....

無論做facial o既姐姐, 定係化妝妹妹Emman , 佢地兩個都話我塊面好乾....

之前, 有探子回報, 話我用開o既Clinque Moisture Surge Extra o向Duty Free 有個好抵o既package, 叫我去買.....咁今日難得經過就去睇下啦....

雖然, 龍城係賣平$2 咁多, 但係, Duty Free o既counter 買, 有保證一d 嘛, 所以就o向Duty Free 買o左一set 喇...

阿姐家訪

講o左好耐, 我阿姐終於同佢老公兩個入o黎我地間新屋探我喇..

今日, 小倫要返工, 所以我陪完媽咪食早餐, 之後就自己一個上新屋, 收衫同埋打掃下, 費事俾阿姐見到我間屋咁亂啦.....哈哈

好快手, 我就已經吸完塵, 拖好地, 執好屋喇....仲有時間上下網...

無幾耐佢地兩公婆就o黎到喇...

佢地以前都係住大埔o架, 不過, 因為返工唔方便, 所以佢地搬返出九龍. 哈哈, 佢地仲話我呢度真係唔錯呀, 間屋好闊落, 唔似咁細, 同佢地d 新樓差唔多咋....

我地傾下計, 睇下相, 坐o左一陣, 四點幾佢地就走lu....

下次, 等我得閒d, 上去佢地新屋做下家訪先.....

 好開心, 佢地買o左好好味o既朱古力俾我食呀!!!!哈哈哈....

粒粒都唔同味o架....

太子 - 小肥牛打邊爐

今晚又約o左Priscilla 同Grushenka 兩位書友仔食飯喇...

好開心, 天氣開始涼, 我地幾個邊爐精精又可以打邊爐喇!!!!

我地又order o左好多o野食呀.....好在, 我地都食得晒jak.....

呢間d o野都好好味呀, 好新鮮, 下次可以再去呀!!

Meeting with ESD friends - 呻訴大會

由於奧運同家好月圓o既關係, 吹o左好耐o既呻訴大會終於o向咩咩o既帶領之下完成喇!!!
所以, 我一放工就拎袋走人喇....

開飯前, 我同咩咩先上o左去化妝公司搞亂檔一番, 可惜, 都係無緣見到老餅娘一面呀! 之後, 我地用o左9秒9o既速度 + "你睇我唔到, 你睇我唔到" o既技術, 衝入去搵蔡太買束褲呀! 幾驚呀, 事關今晚條龍又好長, 有好多對眼"bear" 住我地呀...驚驚, 怕怕...

完事, 我地就上酒樓會合其他美人喇....

今晚都總算齊人呀, 不過, 又係差o左惜惜無o黎囉.....下次佢一定要出席呀!

今晚o既agenda 就豐富囉....
1) 研究茄佬;
2) 欣賞小呆好特別o既花茶; (聞落d 味好清香呀)
3) 阿雀介紹佢o既新朋友 -- Joby 俾我地識;

4) 重頭戲就梗係各位呻訴下受受埋埋o既姊妹伴娘o既怨氣啦;
5) 臨時仲特別加插"甩"ID o既活動呀! 過程十分緊張刺激

(可惜事晚羊生sick sick, 羊女要返去溫仔, 早走無影到大合照呀!)

呢班友仔丫, 出o黎之前, 個個都話唔好咁夜返屋企, 但係又雞啄唔斷咁傾傾傾, 埋o左單, 食埋糖水都仲未捨得走呀!

P.S. 好多謝小呆陪我同阿喬等亡命van 呀!!

0920 - Pingu & 運動人的大日子

今日係另一對ESD o既朋友仔 - Pingu 同運動人結婚o既大日子呀!!!

琴日無啦啦落大雨, 我幾驚呀!!好擔心今日o既天氣, 好彩, 今日天氣好好呀!!!!天公造美呀!琴晚呀, 佢地幾個 (即係Pingu, Queenie 妹妹, 仲有運動人呀) 好夜都唔o訓, 我凌晨兩點o訓, 佢地幾個都仲未肯去o訓覺呀, 幾驚佢地今日齊齊變做大panda 呀!!!

好在, 今日見到佢地幾個都精神奕奕, 果然人逢喜事精神爽呀!!!

嘩, 今日真係迫爆Hall 6 呀! 有好多小朋友, 仲有家長呀! 佢地好興奮呀!!!換轉係我就怕怕lu..不過, 有咁大班小朋友又真係好熱鬧, 好開心, 夠晒氣氛!!!

幾經辛苦先攝到位影到一張無人阻住o既相呀!

趁其他人未落o黎, 影返張全女班大合照先!!!

好開心, 成班ESD o既朋友仔一個一個咁結婚, 感覺好奇妙呀!

煮飯仔 - 3

買完printer返到新屋, 都已經七點lu, 唔想再落街食, 打開個櫃見到有d 罐頭同埋長通粉, 今晚o個餐, 一於就小倫下廚啦.....

小倫最拿手o既白汁吞拿魚蘑菇長通粉....雖然好簡單, 但係好好味o架....

最近新聞話金寶湯有事, 咁o岩我地都有一罐喎, 所以一路煮, 一路擔心, 好彩最後都無事咋!!哈哈

又駛突lu....

去完My Memory 之後, 就梗係去旺角行街街啦...

首先, 我地上o左金都一轉, 去印帖間衰o野問下有無得拎, o個個無表情阿姐又係o個句, 張單上面寫住, 叫你地15號先o黎問, 就15號先啦....我夠知啦, 你估我唔識字o架!!!豈有此理, 就係想睇下會唔會早d 有, 同埋知道你唔打俾我, 我先自己上o黎問o者...真係衰喇....睇住o黎. 我d 帖你千萬要印得好好地, 否則我拆o左係間舖就知味道, 哼!!

跟住, 就去o左樓梯底搵阿蔡生, 諗住求其買對平平地o既3吋高踭鞋for 婚紗著啦, 因為Connie 同Vita 都叫我最好著對高d o既鞋, 會show 到件婚紗個拖尾靚d 喎, 揀o左一陣, 頂, 又無貨, 仲要唔知幾時返貨o添....我真係命苦喇, 今日究竟發生乜事, 點解個天要咁對我?!

無o野做, 同小倫四圍行下啦, 行去百老滙, 見到我地琴日o向黃金睇o個部printer 呀, chur, 呢度都唔夠黃金平喎, 差o左一百蚊呀! but, 呢樹有d 分期喎, o向我唔想再額外用多一分一毫o既時刻, 呢個offer 真係好吸引喎!!!每個月只係六十幾蚊, 就有部hp printer 喎, 我知小倫好想買呢部printer 俾我 (佢不愧為駛突組副組長) , 因為佢最大o既吸引力係scan 相超強, 普通o個d all in one printer o既resolution 比較低, 呢部係暫時HP, Canon, 同Espon 入面最好o既, 咁考慮o左一陣, 都係買啦...於是, 我地就搬住咁大舊o野返大埔喇!!!

單身中秋節

今年o既中秋節係我結婚前最後一個中秋節, 其實我好想留o向屋企同阿媽一齊過節o架....

不過, 因為琴晚已經返o左大澳食飯, 如果我仲出聲話今晚想留o向屋企做節, 唔去小倫度做節, 我知小倫一定會唔開心, 所以唯有唔返屋企食飯啦...

呢d 唔知係唔係做人個女同女朋友o既難處呢? ! 男仔好似唔會明白女仔呢d o既諗法, 佢地唔會明白女仔痴住自己阿媽o既心情o架! 始終母子o既關係同母女o既關係好唔同.....

今年中秋好似特別熱咁, 所以都無心機四圍去, 連落街行去海濱公園都唔想去lu....只係食完飯打o左3圈牌都未夠就返屋企lu...真係唔夠喉呀, 打得3圈咁少, 因為小倫個妹要返深井, 唔可以打咁夜, 其實中秋節個個都會玩得夜o架啦, 搭的士返去咪得囉, 咁無引.....

仲要我係輸錢o個個o添 >.<

雀打唔成, 返屋企上下網, 玩o左一陣就o訓lu....

婚前最後一個中秋節就係咁平平淡淡咁過o左lu.......

中秋日 - Kiki肥牛大喜之日

今年中秋hit 爆金句就一定係 "家好月圓慶中秋", 今日唔只係家好月圓呀,仲係良辰吉日 Kiki 同肥牛o既結婚好日子o添呀!!!

一早起身, 我同小倫早餐都無食, 就出發去大會堂觀禮喇!!!十二點未夠, 我地已經去到大會堂喇...(好少有咁準時 :p) 仲打電話俾Pingu 問佢同運動人點解遲到咁失敗o添.... 不過, 點解呢樹水靜河飛呢?? 等o左5分鐘, 發覺唔對路喎, 無理由佢地未o黎做手續o架?! 突然俾我醒起, 原來傻Ron 又出事!!!

記錯地點呀!!!係紅棉道至真!!!於是, 我同小倫即刻飛的過金鐘啦, 好彩, 趕得切, 未遲到咋.... 仲有機會o向Kiki未做牛太前一齊影張相o添!!!

今日真係好熱呀! 見到肥牛成頭大汗...佢讀誓詞時, 仲要抹一把汗, 真搞笑!!!
歷史性一刻, 情深o既一吻!!

成個儀式都o向一片歡樂o既氣氛下完成呀!!!途中仲有小插曲, 就係突然有人手提電話o向, 鈴聲仲要係"上海灘"呀!!!大家不禁細細聲講, 唔通許文強o黎o左?! 究竟呢段係唔係主人家o向到開小玩笑呢? 睇怕要問肥牛先知喇...哈哈

我地影完大合影都走Lu....

迎月夜 大澳行

二舅父o既生日就係農曆八月十四日, 今年又適逢係weekend 喎, 所以就可以返大澳做節兼同佢慶祝生日喇!!!

美麗的棚屋..我細個返o黎渡假o既時候, 就係住o向呢d 棚屋到o架...不過, 2000年一場大火, 燒o左我地間棚lu....

煮飯仔 - 2

好耐未試過煮飯仔喇, 所以今晚一放工, 就同小倫一齊返大埔, o向百佳求其執幾樣o野返上樓煮喇...

今晚o既餸都係以簡單為主, 所以好快就搞掂lu...
竹笙粟米湯

煎豬扒午餐肉

蠔油清菜

煎釀三寶

原先仲想煮埋烏冬o架, 不過好似已經好多餸, 都係唔煮喇....

又做好一樣喇!!!

今日約o左JenJen, Prettyangel 同埋Seven Dwarfs 一齊食lunch 呀!!!好耐無見過佢地喇!!!

我地今日去o左諾士佛台o既Munch 食lunch, 呢度人少少, 環境唔錯o架!!而且, d o野食都幾好呀!!!
傾下傾下, 又兩點幾喇!!!之後,JenJen 趕住返學, 我地三個就join 埋Pingu 一齊去百利行下喇!!!
唔知點解, 又有收獲喇!!!

買o左好抵o既手花, 襟花呀!!!

我揀o左玫瑰花, 因為要襯花我個紅玫瑰B 仔花球呀!!!

婚紗展行極都唔厭~~~

今日又係一年一度同時有電腦展同婚紗展o既8月婚紗展喇!!!!

我同小倫就係2006年8月o個次婚紗展之後決定結婚o架...

首先, 約埋Angel 一齊去買麥當當俾o個幾隻大青蛙做lunch, 之後就搭free shuttle bus 去新翼o既電腦展....好多人呀!!!!傻o架.....好迫呀!!!去到, 我就梗係唔多願去行啦.

等到佢地3個放工, 齊人我地一行6人就轉地盤, 去婚紗展lu.....

真係唔好意思, 咁多人要麻煩FB 個sales - Stella 帶我地咁多人入場...得閒要請佢食o野先得喇...
今日目的, 就係幫Dave & Angel  同埋佢地o既朋友恆哥& Isabella 搵當日攝影, 由於佢地兩pairs 人一齊join, 所以我地好成功地講到一個好抵o既價錢, 仲包晒所有charges, 不過, 我地就講到口水乾喇!!!

搞掂呢樣o野, 都已經差唔多8點lu....於是我地就走去德興大刷一餐喇!!!哈哈哈

妖雀襲港

呢隻鸚鵡, 正如阿咩所講, 正一妖雀o黎o架!!! (阿雀, 我地唔係話你呀!!!!千祈唔好嬲)

琴日, 一直都留意住究竟幾時掛八號呢, 簡直係萬眾期待呀!!!

夜晚,成晚都睇住電視, 聽朝會幾多點掛八號呢? 真係好擔心.....天文台又玩o野喎, 話未必會o向凌晨掛八號, 唔好啦.....萬一返到公司先掛, 有排先返到屋企o架...

所以, 今朝就算鬧鐘響,我死都唔起身, 最多咪玩遲大到囉....

好在, 咁都俾我搏到...Yeah! 繼續o訓覺.......

就係咁,無啦啦今日就多一日假喇...

可憐o既小倫, 就算八號風球都要去會展做電腦展呀!!!!

起身食完碗粉, 上o左陣網同阿咩研究下人地BD set 乜頭, 就去o訓晏覺lu...成日都只係播奧運, 真係好鬼死悶o架.....

電視台o既人有無考慮過世上係有人唔鐘意睇o架!!!!!!!!!

心情坐過山車

話說, 星期三, 即係掛八號風球o個一日, 我個心情同天氣一樣咁差, 因為我部買o左唔夠三個月o既新電話竟然發我脾四, 俾個黑面我睇, 唔睬我喎.....

既然佢咁醒目知道我星期四放假, 幫我安排節目, 我咪順佢意, 星期四送完機就一個人去o左sony ericsson 整機啦....

呆等o左一個半鐘頭之後, 到我喇...埋到counter, 放低部機, 唔夠5分鐘就離開啦....

個CS 話星期五有得拎, 咁我就吩咐小倫幫我去拎啦....

佢都等o左個幾鐘呀....個customer service 哥哥同佢講, "先生, 部機整好喇, 你check 下!" Oh, 有無搞錯, 部機同之後一樣, 根本無整過.......咁小倫梗係叫佢再整過啦....好, 再等....

等多半個鐘, 唔對路, 小倫就走去催個CS 啦, 點知, 個CS 哥哥就話, "先生, 不如我換過部新機俾你啦!!"

Yeah!!!正呀!!!有部新機用!!!雖然之前save o向部機入面o既相無晒, 但係我部機比我玩到有少少花同埋凹o左少少, 依家有部新o既, 仲要一毫子都唔駛俾喎, 真開心....

我o既心情非常之靚, 所以就同小倫去行花墟買花花啦......

返到屋企就拿拿聲執埋星期六去影相o既用品啦......臨出門口o既時候, 小倫叫我返入屋, 拎埋對耳環啦, 或者聽日有時間去街, 可以帶丫嘛....好, 就返入屋拎啦.....

點知, 事隔o左十幾個鐘頭, 即係星期六o既早上, 當我執o野o既時候, 就發現搵唔到我對耳環呀!!!!!!

一直以為, 或者o向我間房無拎到o者, 星期六一返到屋企就再搵啦, 反轉間房都搵唔到呀!!!!!!!新屋o個邊, 小倫搵過又話無.....

我真係好唔開心呀!!!!!心情跌到落谷底呀!!!如果只係一對普通耳環就話無所謂o者, 但係呢對係鑽石耳環o黎o架!!!仲要價值五位數字o架!!!唔單只心傷, 肉痛, 直情出晒血喇~~~~~~~~~~~~~~~~

雖然我都知搵得返o既機會好渺茫, 但係, 我都好多謝安慰我o既一班好朋友呀!