車廠fun fun fun

今日, 我地帶埋bebe豬去港鐵O既荃灣車廠O既員工中心玩. 其實係堅堅帶我地去至真.

話時話啦, 港鐵O既staff benefits 都唔錯啵, 大家都係香港數一數二O既大公司, 但係比福利, 港鐵好似俾我地銀行還要好, 真羨慕呀!!!幾時都話, 大樹好遮蔭, 做O野一定要入大公司先至好, 不過, 大公司一定有好多唔做O野, 白逗人工O既冗員, 我見到就會一肚火.

單係呢一個員工康樂中心就正過"弊"公司多多聲啦, 有羽毛球場, 卡拉OK房, 麻將房, 兒童遊戲室, 仲有multi-purposes room, BBQ場同tennis court O添....簡直係應有盡有呀.....

今日, 我地就同bebe豬O黎呢個兒童遊戲室玩. 呢度好正呀...成間房都鋪晒好厚O既軟墊, 任D bb 點爬點跌都唔會親, O岩晒bb 呀, 真係好過返playgroup 呀!!!

所以, bebe豬O係呢度玩得好開心呀!!!!

呢度咁安全, o岩晒佢O係呢度學行呀!!!!

唉, 呢個只係得9個月大O既人仔, 點解可以成日都擺出呢個咁招積O既樣O架.....

O向車廠玩完, 我地就帶bebe豬返去屋企, 俾佢熟習下環境, 遲下佢要試下返屋企渡週末喇....

好叻, 唔知佢feel 到呢度係佢屋企, 竟然唔怕生補, 入屋無喊喎, 叻叻~~~~

我好鍾意呢兩張相, 影得佢好趣緻呀!!!! (烏鴉媽媽病又發作喇.....)

變變變, 魔術師

Bebe 豬今朝又上O左O黎我屋企借地方飲奶, 係呀, 我屋企係佢O既中轉站O黎O架.....

但凡係佢媽媽同奶奶過O黎我地呢邊行街買O野, bebe豬有需要, 就會上O黎我屋企飲奶或者換片片. 始終, O係我屋企搞會方便同埋乾淨過O係商場O既......而且, 我又唔介意, 平時我屋企甚少對外開放O架, 連屋企人都絕少可以上O黎我屋企, 不過, 我O既心肝寶貝係exceptional case, 最好佢唔走O添啦.....wakaka

既然佢一場上到O黎, 我又要搵D 玩具俾佢玩下喇.....

O岩佢玩O既, 只有我上次O係荷蘭買O既Miffy 沖涼波波, 佢好鍾意,  (其實呢個人仔係無乜O野唔鍾意玩啦......)

抹乾淨就可以俾佢玩喇.....

睇佢玩得幾開心~~~~~

我同小倫都好鍾意呢張相, 因為呢個角度睇到bebe好似玩緊魔術, 將D 波波變到凌空咁, 好得意......wakaka......兩個正傻人

晴晴識企喇^ V ^

又到O左星期五喇, 依家差唔多每個星期五晚當敏敏返去自己屋企過夜O既時候, 就到O左我呢個託兒服務出動O既時候喇....呵呵呵.....又有機會俾我過下湊B 癮, (真變態)....

努力工作O左一日, 差唔多七點先可以閃人, 於是又飛快咁趕返屋企見晴晴喇.

一返到去, 第一時間, 入房叫下晴晴先, 佢依家已經好叻, 認得我把聲, 我一叫佢, 佢就會望住我O架喇. 跟住, 我要洗乾淨手, 埋去抱下佢, 錫下佢先.

入屋第一時間洗手, 已經成為我地每個人返到去小倫媽媽屋企要做O既第一件事喇, 因為唔洗手, 係唔可以掂BB O架.....

開好奶, 要餵佢食呀, 因為今日佢無乜胃口, 唔係好想食, 所以, 又要變返new born階段咁, 要小食多餐.

我餵奶O既同時, 小倫無得爭同BB 玩, 佢要去整光波雞翼.

我地大人食完晚飯 又到O左BB食飯後小食, 今餐舅母揸主意, 俾佢食蘋果baby food, 因為就快要瞓覺, 所以唔好食咁多, 只可以食3匙羹咋.

跟住, 我就同晴晴返入房玩啦. 又到O左我獨霸BB O既時候喇....哈哈哈
因為小倫媽媽日頭一個人湊住晴晴太攰喇, 所以, 食完飯要小睡幾個鐘, 小倫爸爸就要做其他家務, 小倫就負責洗碗, 所以, 無人同我爭BB 喇!!!呵呵呵....

同BB玩, 真係好開心O架....O左大床玩O左一陣我手軟喇, 放佢返入床仔先.

依家BB 會好似隻狗仔咁, 一放佢返落床仔, 就會望住你, 有時仲會大叫, 想人抱佢. 於是, 我教佢扶住床欄啦,奶奶話佢今日已經識得跪O向度,於是, 我再氹佢企啦. 叫埋老爺入O黎睇啦....晴晴好似真係明白我講乜咁喎.....(哈, 我又幻想喇!!!)

BB先可以一隻腳企, 一隻腳半跪, 我不停叫佢加油, 用力啦, 點知, 佢突然間真係可以兩隻腳仔一齊出力, 企O向身喎.....

嘩, 果一刻我真係好開心呀, 成個心都跳O左出O黎, 感覺好興奮呀.....拍手讚晴晴好叻, 攬住佢錫錫錫呀!!!!好開心, 我有呢個機會見證佢呢個moment 呀!!!!

不過, 見佢開始有D攰喇, 唔可以再叫佢企咁耐. 於是我抱返去去大床爬爬下啦.

餵埋10點餐奶, 今晚唔駛我唱twinkle twinkle little star, BB 飲飲下奶奶就瞓O左喇. 慳返唔少功夫!!!!

唔好以為BB瞓O左, 我就好得閒呀, 仲要幫佢清潔口腔, 換瞓覺衫仔同著袍仔, 同埋睡袋, positioner, 我先可以收工O架...

坐O左床邊睇住佢瞓耐D我先會行開O架.....因為, 有時BB 會嘔返D 奶奶出O黎, 所以一定要睇下佢, 我先放心.

雖然BB唔係我個女, 但係我真係當佢係我個女咁湊O架, 並唔係O個D拎人地O個BB玩下, 要換片, 或者喊就俾返人地父母O個D 人.

今晚, 有幸見到BB 識企, 真係好開心呀!!!上次佢識爬第一步, 因為我無返去,而miss O左覺得好可惜呀!

(後記: 尋日太過興奮, 趕唔切影低佢, 後補第二日再記錄得bebe企高高O既一刻!!!)

Hello 晞晞

終於又到我放假喇...

今日O既行程又係湊B 啦.....不過, 今次唔係湊我心肝寶貝, 而係去湊晞晞呀!!!!
Pingu 坐緊月, 得佢一個人O係屋企湊住個B 都幾攰O架, 而且我又特別變態, 鍾意抱newborn baby, 難得有newborn 俾我抱, 梗係要去啦.......hahaha

晞晞都算乖呀, 幾易湊, 佢同bebe豬唔同, 佢好肯飲奶, bebe 豬一餐奶食得好慢O架.....果然, 男仔同女仔好唔同.

不過, 晞晞瞓覺就差D, 成日好似好驚咁. 唔知係唔係早幾日俾O個個工人姐姐大力"栓"門驚親, 所以要成日抱住, 安撫佢.............

Lunch, 我地就去同埋Pingu 媽媽, 仲有大隻謙一齊食茶.........大隻謙真係好鬼趣緻.......

等到小倫收工O黎接我走, 我今日做babysitter O既工作又完成喇......

晴晴半歲了~~~

眨下眼, 我寶貝O既bebe 豬已經半歲喇.....

所以, 我地又要簡簡單單咁同佢慶祝下, 其實都只不過係買個蛋糕返O黎, 我地一家人切下咁O者.....

6個月O既晴晴已經大個O左好多喇, 有少少唔捨得佢大得咁快O添........

半歲大O既佢, 最鍾意就係食佢自己隻手指公 同埋牙膠, 百厭O左, 識得四圍爬, 亦都開始試食米糊喇, 亦都同之前一樣, 都係唔多鍾意食奶奶, 一口氣唔會飲得完一支奶. 總括O黎講, 暫時都仲係屬於好湊, 未會認人, 唔會成日喊.

另外, 好在, 直到依家, 佢都仲好痴我, 唔知再大個D O既時候, 仲肯唔肯痴住我玩呢???

小寶貝百日宴

O岩O岩忙完個result announcment, 日日仲O向公司忙對稿, 做到一頭煙, 另外仲要忙搬屋O既O野, 晚晚要pack 箱. 不過, 今晚我特別申請O左準時放工, 因為今晚係bebe 豬O既百日宴.

原來應該係早兩個星期食O架喇, 不過, 因為我根本無可能predicted 到我幾多點放工, 所以, 唯有delay到今晚至食啦.

其實, 今晚O既所謂百日宴只係我地一家人一齊出街食餐好O架咋, 我地認為始終bebe仲係細, 要佢面對咁多對佢O黎講係陌生人O既人唔多好, 而且, 為一個咁細O既人仔搞party, 佢都唔知O架啦, 純粹為O左大人O既交際應酬, 好似唔多好. 因此我地就決定唔搞呢D 門面O野喇.

由於堅堅入O左M-dinning, 所以我地去美麗華集團旗下O既餐廳都有折, 我地就揀O左The Mira O既Yamm 食buffet 喇, 其他credit card 呢間都無discount, 只有M-dinning members 先有八折.

準時6點半我地就去到喇.....今晚O既theme 係海膽同帶子, 所以, 有好多菜式都係用呢款食物做材料.

我食得最多O既就係生蠔喇, 食O左差唔多兩打呀. 另外, 海膽都好好味呀!!!鵝肝就比較細舊喇, 不過, 都好, 因為我唔多鍾意食foie gras O既. 除O左凍盤, 其他熱葷都唔少O架, 不過, 我已經掛住食, 唔記得影相lu......甜品O既款式都唔少, 有chocolate fondue, 仲有macarons.


當然唔少得舅母同O爹O爹bebe啦.....

小寶貝滿月了!!!!

時間過得好快, 小寶貝滿月喇!!!!

佢媽媽今日申請O左去同爸爸出街, 拍下拖, 所以, 今日湊bebe O既責任就落O係我同小倫身上喇.

嘻嘻嘻.....其實我一D 都唔介意O架. 我好鍾意湊bb 呀, 尤其係new born baby, 抱住佢地好開心. 即使要我開奶換片, 我都唔 mind O架.....

成個下晝, bebe 都好乖, 唔扭計, 咪話我賣花讚花香, bebe 都算幾好湊, 唔喊, 又唔扭計, 亦都唔會扭抱, 只係唔多鍾意飲奶, 餵奶係最O徙時間O者.

由佢一出世返婆婆屋企開始, 我地事先講好o左, 唔可以成日抱住bebe, 更加唔可以抱住瞓, (不過夜晚除外, 夜晚通常都係我負責抱住佢一陣, 大約15分鐘至半個鐘, 佢一瞓o左, 就放佢返床仔, 或者high chair). 目的係要俾佢知道, 唔可以一喊就有人走埋去抱佢, 又可以習慣自己瞓覺覺豬, 暫時呢個方法都幾wor.

(bebe瞓o左真係好甜!!!!!呢個衰人舅父仔, 見到女仔就流晒口水, 成日同我爭抱bebe)

今日係bebe 滿月, 不過, 佢爸爸媽媽都唔打算大搞喇, 始終bebe 太細, 我都唔贊成擺滿月, 尤其係去酒樓擺O添. 又嘈, 又多人, 唔應該俾bebe 接觸咁多細菌, 加上一個月O既人仔, 乜反應都唔識, 擺佢上枱, 有D 無謂. 所以, 今晚我地決定唔出街食, 加上大時大節出街食, 人又多, 又貴, 又要趕住交枱.

簡簡單單O係屋企食下蛋糕同sushi 都唔錯丫.

話晒都係滿月, 又點少得同bebe 影第一張全家福留念呢!!!!

另外, 今晚收到敏敏同堅堅送俾我O既聖誕禮物, 真係好surprise!!! 就係Miu Miu 銀包一個, 雖然係好開心, 但係真係有D 唔好意思囉, 幾千蚊一個銀包, 實在太重禮喇.

我的小寶貝出世喇!!!!

大家睇到呢個標題, 千祈唔好誤會, 唔係我個bb 出世, 個bb 係小倫妹妹O架! 應該恭喜佢至O岩.

由於下星期一我要出board papers for O黎緊12月O既Board meeting, 所以, 今日係bb 出世O既大日子, 一向事業為重, 唔多顧及親情O既阿姐, 梗係唔俾我請full day 去醫院睇bb 啦, 最多只可以放half-day.

一早返到公司, 我已經開摩打手努力工作啦, 點知, D O野做極都做唔完, 阿姐仲要死催爛催.

另一邊箱, 小倫不停whatsapp 我, 佢梗係去做現場直播啦, 小倫好得錫佢個妹O架, 加上佢又好鍾意bb, 所以一定會去等第一手消息啦. 不過, 事前醫生已經話, 成個過程好快, 只需要15分鐘就可以O架喇, 唔駛擔心. 一向都係緊張大師O既小倫, 見個妹15分鐘後都未出O黎, 又驚喇, whatsapp 我, 問我點解會咁耐O架, 好擔心咁話喎, 我又唔係醫生, 又唔O向個手術室入面, 點知咁多啦, 唯有安慰下佢. 過多5分鐘, bb 出O黎喇, 哈哈哈, O岩O岩出世O既bb, 成舊飯咁, 不過, 好百厭呀, 識得伸隻手指仔出被仔喎.



我真係好想去現場睇住佢呀!

我O向公司愈急, 我阿姐仲係打斷催我喎, 我又唔係放好多日假, 只不過係放半日O者, 唔駛咁緊張下話. 於是, 我發脾氣, 連lunch 都唔想, 做晒D emails 俾佢啦, 做到差唔多兩點, 佢好好意思咁走O黎問我喎, 乜你唔係放下晝咩.....我真係氣頂呀. 好負氣呾答佢囉, 唔放喇, 咁晏, 點去喎, 你又話多O野做丫嘛.

今日O向公司, 簡直係渡日如年呀!, 終於等到放工, 9秒9咁即刻走人啦, 去到太子, 立刻飛的去St Teresa, 好在, 事先, 已經拎O左籌排隊有得睇bb. 場面好搞笑, D 大人個個隔坐玻璃咁同bb笑, 但係入面D bb個個都係瞓緊覺, 直頭係"睬你地班大人都傻O既"....睇完BB, 就去同敏敏傾下計啦, 見佢都幾精神, 問佢傷口痛唔痛, 佢話可以D 藥力未過啦, 唔覺得痛.

都係私家醫院好, 唔駛限住D時間, 可以有多D 時間睇bb, 而且, 家人又可以陪住耐D, 唔駛得個產婦一個人孤令令O向布ward 入面. 尤其係好似我呢人咁O既人, 又怕痛, 又怕悶, 一定要成日有人陪O向身邊至得.

真係好想快D 可以抱住bb 呀!!!

夜D到我去睇佢, 已經好醒目喇, 仲學人單眼O添, 正一八厭妹~~~~