好合心意的生日禮物

今晚, 相約O左兩位同學仔, 花師奶同埋Priscilla 一齊食飯. 今次我地試下去九龍城打邊爐, 估唔到其貌不揚O既利得火鍋, 味道又幾OK 喎, 材料好新鮮, 尤其係D 蝦丸, 好美味!!!

我無乜幾多個朋友仔, 呢兩個算係最好O既其中之二喇, 因為佢地對我真係好好, 好有心O架, 成日都會記住我....唔似得我其他朋友咁, 好日都唔會打一個電話, 又或者send 一個message 俾你, 都唔知佢地心入面仲有無我O架.....

好難得, 呢兩個朋友係大個O左, O向讀master o既時候認識, 畢業之後, 仲可以keep 住聯絡, 我地每隔一, 兩個月就一定會約出o黎食飯, 傾下計.....

2011 生日曼谷自由行 - Day 5

O黎到曼谷之旅O既最後一日, 有d 唔捨得走O添.......真係"快樂O既時光過得特別快喇!!!"
由於今日會享用埋酒店送O既lunch buffet, 所以, 早餐唔食咁飽喇, 係咁易食少少就算數.
有乜好做呢.....終於俾我諗到喇!!!O黎O左咁多日, 都未試過去做gym, 一於玩埋呢樣. 換好衫就上去gym room 喇......呢度地方唔大, 幾部跑步機, 一D 健身器材, 勝在人唔多, 所以都唔會覺得迫.
跑O左一陣步, 就入去toilet 玩喇!!!有乜好玩???呢度有steam room 同sauna room, 鍾意乾蒸又得, 濕蒸都得.....我同媽咪就揀O左濕蒸......蒸完, 我地就去浸下個jacuzzi 喇...

真係爽, 玩O左咁耐, 成個toilet 得我地兩個, 人少少真開心!!!!

2011 生日曼谷自由行 - Day 4 (Part 2)

返到酒店, 我地又小休o左一陣, 因為未夠鐘食tea, 於是, 我地又換泳衣落泳池hea 下喇!!!!日日食咁多o野, 真係要郁下, 消耗下d calories 至得.

由於我出發之前去o左電髮, 髮型師姐姐吩咐話d 頭髮唔可以俾泳池水整濕, 如果唔係, 就唔鬈o架喇. 加上, 我o既泳術有限, 唔曉得抬起個頭游水, 所以, 要用水泡先可以游到喇.

游完水水, 沖完涼, 我地就帶埋小黑去食tea 喇. 幾好, 今日唔多人, 去到仲可以揀梳化位, 正!!! 呢餐tea 係酒店送o架, 入住2晚, 就會送兩位afternoon tea, 我見人人話二人份量都夠食, 所以, 無額外order 多一set, 只係order 多一個茶就算喇.

又真係3個人都食唔晒呀!!! 舒舒服服嘆下茶, 真係爽!

2011 生日曼谷自由行 - Day 4 (Part 1)

眨下眼, 已經o黎到旅程o既第四日喇, 首先要同自己講聲 "Happy Birthday" 先...哈哈哈

今日o既行程, 又係無行程, 無節目o既. 起身之後, 排隊梳洗, 哈, o向我等緊人o既時候, 發現o向部notebook 隔離, 點解多o左盒o野o既呢???? 好明顯, 呢盒o野係我o架啦. 一睇個包裝, 就已經知道係乜, 打開o黎睇, 哦, 原來係對Agnes B 耳環. 出手咁低, 一定唔係小倫啦, 原來係我細佬同阿妹送俾我o既, 佢地真係孤寒呀!!!!!兩個夾份先送對耳環仔俾我!!!!哼!!!佢地吩咐媽咪記得趁我未起身o既時候, 擺好份禮物, 等我一起身就發現. 估唔到, 今次我個懞盛盛阿媽又記得喎!!!

之前兩日, 食早餐o既地方都係o向Brasserie Europa, 但係, 今朝我地去到, 有個staff 就話full o左, 叫我地行過去隔離Kempinski Residence 果邊o既Bistro 食, 話d 食物係一樣o架喎. 無所謂啦, 最緊要有得食o者, 行多兩步都ok 啦. 點知, 我地行到去, 見到有一個中年港女o向樹發爛渣喎, 猛咁鬧個餐廳經理, 話點解咁大間酒店o既餐廳會無位......要個經理帶返佢地去Brasserie Europa 食, 真係麻煩呀!!!

呢邊都幾好丫, 無人, 除o左我地一枱客之外, 就只有兩枱, 所以, 我終於有機會偷影下buffet breakfast 有乜o野食喇. 平時o個邊人多, 如果我行埋去d 食物枱旁邊, 拎住部相機影相, 好似好無禮貌咁. 話晒呢度都係5-star hotel 丫, 收歛d 好.

2011 生日曼谷自由行 - Day 3 (Part 2)

上o左的士之後, 行o左無幾耐, 又開始有塞車o既跡象, 搞到我好緊張喇. 架車一路行, 我一路睇地圖, 又望住d building, 睇下似唔似要去o左地方. 呢個司機唔識英文, 不過我估佢feel 到我好緊張同心急, 所以, 差唔多到o既時候, 個司機打電話去間spa house 到問路, 好彩, 最後都可以準時四點鐘到達.

(Spa house 隔離係新開O既clinque, 我估都係做一D 美容treatments 啦)

2011 生日曼谷自由行 - Day 3 (Part 1)

原先, 未出發之前, plan o左尋日去Khao San Road 報local tour, 今朝一早出發去Damnern Saduak Floating Market, 不過, 最後因為大家都覺得d 河水好dirty, 而且, 又唔會夠膽幫襯o個d 賣小食o既攤檔, 所以就cancel o左呢個唯一o既觀光活動.

經過尋日先游水, 後食早餐, 搞到差唔多last order 先去餐廳食, 所以, 今日就改一改schedule, 先食早餐, 再游水.

今日食過返尋味, 再order egg benedict. 另外, 見有香檳, 幾大都要扮下O野, 飲番杯champagne 襯下D parma ham 至得!!!

2011 生日曼谷自由行 - Day 2 (Part 2)

返到酒店有乜好做, 梗係hea 下先, 小休一番啦. 入到房, 又見到凌亂o既房已經俾人執得齊齊整整喇 !!!真係辛苦晒!!

(仲有, 是日水果 -- 火龍果!!)

2011 生日曼谷自由行 - Day 2 (Part 1)

既然今次旅行o既目的在於hea, 梗係唔會咁早起身啦. 瞓到8點幾先至施施然起身.

(由房balcony 影O既酒店園景)

2011 生日曼谷自由行 - Day 1 (Part 2)

根據其他人o既blog所記載, 酒店係有免費車來往酒店同BTS 站o既, 於是行去main door 問下bell boy 喇. 熱心o既bell boy 哥哥即刻話無問題, 問我地想去邊之後, 叫我地o向lobby 坐一坐先, 3分鐘後, 架車返到o黎先叫我地出去上車, 唔好o向出面熱住等喇. 真細心!!!

呢d 咪就係我呢個麻煩港女需要o既service 囉!!!!

其實由酒店去BTS 站好快o架喇, 2分鐘啦, 既然有車坐, 就梗係坐下車啦.

2011 生日曼谷自由行 - Day 1 (Part 1)

好耐未試過坐咁早機喇, 好眼瞓呀!!!

本住死唔蝕底O既寒底組精神, 我梗係book 早機去, 晚機返O既機票啦......wakaka~~~就係咁, 搞到我地要5點鐘就起身, 6點鐘搭E41去機場喇. 預算7點鐘到機場啦. 點知, 唔知點解, 今日竟然要7點半先到機場喎!!!於是, 仆崩鼻咁去CX o既counter check-in 同寄行李啦. 跟住, 就要入閘喇.....嘩, 駛唔駛咁多人呀!!!!都唔知今日發生乜事, 咁多人出trip o既, 搞到過immgration要排長龍呀!

2011 生日曼谷自由行 - 準備篇

舊年生日之旅已經想去曼谷行下o架喇! 千祈唔好笑我, 呢個大部份香港人去到熟晒O既地方, 我竟然一次都未去過, 正一大鄉里!! 點知, 遇著紅衫軍, 唯有避o左佢地, 將目的地轉為東京啦.

話說, 3月O既時候, 國泰話乜o野慶祝航空100週年喎, 推出特價機票, 我地心目中o既首選墾丁並不呢次推廣o既目標, 可以揀o左, 只有曼谷o向我地心水, 於是, 就乜都唔理, 半夜三更匿O向電腦前面 book o左機票先啦.

機票已經有喇, 跟住就到煩惱O既酒店喇......需知道曼谷O既酒店多的是, 但係點揀好呢.......點揀好呢........住酒店定係好似人地咁住service apartment好呢????於是努力上網搵下資料又問下人啦.....不時又要去travelzoo睇下有無筍o既promotion咁.............

經過一番努力, 得出O既結果係, 住Siam區會比較方便, 行街食O野都有齊晒. 縮窄範圍之後, 就要shortlist一D 心儀O既酒店喇. 由於我地今次呢個trip 係同埋阿媽一齊去, 所以三人房O既選擇真係唔多. 而我偏向想住新D O既酒店, 最好facilities 比較完善啦, 因為今次想試下舒舒服服享受下悠閒O既感覺.

最後, 終於俾我揀中O既就係舊年2010年年中新開O既Siam Kempinski Hotel Bangkok 喇. 睇相已經吸引住我喇. 不過, 價錢略貴,作為寒底組O既組員, 梗係要落力四圍格下價啦. 果然, 皇天不負有心人, 俾我搵到個好agent, 不但只價錢令我滿意, 而且仲俾到人地book package先有O既o野我O添.

既然萬事俱備, 只欠東風. 一如以往, 我要編排行程喇. 其實今次O既行程好易編, 因為不外乎行街買O野, 同食O野之嘛. 但係, 因為最近公司超級多O野做, 做到我死死下, 令到今次O既旅行行程表做得麻麻地咋.

最後, 都上機前一晚, 終於都print 好部份O既coupon, 地圖同booking email喇.