由於我出發之前去o左電髮, 髮型師姐姐吩咐話d 頭髮唔可以俾泳池水整濕, 如果唔係, 就唔鬈o架喇. 加上, 我o既泳術有限, 唔曉得抬起個頭游水, 所以, 要用水泡先可以游到喇.
游完水水, 沖完涼, 我地就帶埋小黑去食tea 喇. 幾好, 今日唔多人, 去到仲可以揀梳化位, 正!!! 呢餐tea 係酒店送o架, 入住2晚, 就會送兩位afternoon tea, 我見人人話二人份量都夠食, 所以, 無額外order 多一set, 只係order 多一個茶就算喇.
又真係3個人都食唔晒呀!!! 舒舒服服嘆下茶, 真係爽!
食完tea, 媽咪諗諗下, 話第一日買o既3折波衫好抵, 好想買多幾件, 於是, 我地就好懶咁坐車去Central World 喇, (其實只不過係車程2分鐘咋!!!) 左揀右揀, 終於, 人人有份, 屋企每一個男仔都有一份波衫喇!!!幾十蚊一件, 真係好過買街邊貨!
買完波衫, 我地再去Plantinum Mall 對面行下, 有幾個商場仔都係好似Plantinum Mall 一樣, 做批發生意o既, 呢幾個商場入面賣o既o野都一般啦, 唔算太精美, 要耐心d 搵下, 先有好o野. 行到其中一間飾物店, 買o左6對耳環, 每對THB 10, 即係唔駛港幣3蚊就有交易. 抵都爆!!!
行到差唔多時間, 我地返酒店放低o野, 再坐的士去JW Marriott 食我o既生日buffet. 點解要去食buffet? 事關之前有人介紹話呢間buffet 好食, 又有蟹腳又有鵝肝, 加上AE card 有 buy 1 get 1 free, 即管去試下啦.
睇地圖, Marriott 好近之嘛, 都唔明點解個的士司機行咁耐都唔到.好明顯, 呢個無鬼用司機同尋日車我地去Divana O個個好唔同, 呢個簡直係阿"茂"!!!!茂炳個茂呀!!!!叫佢轉彎就話no u turn, 叫佢打電話去酒店問路, 又唔睬我, 激到我火都O黎埋呀!!!行下行下, 仲車O左我地去條酒吧街, 呢度成條街都係酒吧, 仲有好多外國人同埋搵食O既女仔O添. 呢度人多, 路窄, 我四圍望, 終於俾我見到Marriott 個招牌喇.
終於, 我地都到O左酒店喇....我真頭唔想俾足全費呢個咁O既司機呀!!!人地生日流流遇著你, 激到我噴火, 阿媽同小倫就猛咁叫我算啦, 仲想叫佢免找喎, 簡直豈有此理呀!!!!唔識路就咪學人做司機啦. 一係一早就出聲話唔識路, 我坐過第二架好過呀!!!!
家下搞到我地俾原定時間遲O左半個鐘喇!!!幸好, 今晚唔係好多人, 所以仲有枱俾我地. 唔知酒店係唔係專登安排d 香港人坐埋一堆, 我地四周o既人都係香港人o黎.
可能係自己o既expectation 太高啦. 以為會有香港間JWo既水準, 所以有dd 失望. 不過, 以呢個價錢, 即係THB 1350 buy 1 get 1 free, 算係不過不失啦, 叫做有生蠔, 鵝肝同蟹腳. 不過, d 生蠔就認真麻麻地, 太瘦, 又無海水味, 所以, 我只係食o左半打就收手喇. 至於蟹腳就弊喇. 好似我對腳咁, 瘦到呢........另外o既鵝肝叫做唔錯. 雖然人多, 但係供應不斷. 趁人潮散去, 我去拎o左一碟試下, 我覺得比較乾身. 由於, 平時我唔食鵝肝o既, 所以都唔知點為知好食o既鵝肝.
不過咁, 其他食物o既質素係唔錯o既, 係一貫5星級酒店o既水準, 只不過係無驚喜o者.
(D 蠔比較瘦, 蟹腳又太瘦, 呢幾隻已經叫做大隻O架喇.....不過, 魚生就唔錯)
(除O左食生O野, 食得最多O既, 就係生果, 西瓜同芒果最出色)
(人地話必食O既鵝肝, 都算幾闊佬, 夠大片, 而且又不停供應)
(staff 好好人咁幫我地影合照)
(不停食芒果, 泰國最好味O既就係芒果!!!!)
食到咁上下, 媽咪覺得個胃唔係好舒服, 搞到我都無乜心情繼續食, 其實我仲未食夠o架!!! 由於都已經成十點鐘喇, 未食夠都要走人喇. 因為聽日就要返香港, 我地今晚要夜逛Big C 呀! 唯有打的走人.
今次呢個司機睇佢個樣好鬼古惑, 一上車, 我地就擔心都唔知會唔會俾佢搵我地笨o既. 原來, 古惑有古惑o既好, 就係夠醒目, 見塞車, 佢曉得攝位, 帶我地好快就去到Big C 喇!!!!
左逛逛右逛逛, 唔覺唔覺就買到人地夠鐘收檔喇....拿拿林排隊俾錢先....我地主要係買下零食同冬蔭公米粉, 咁都買o左THB 760 喎....
(買O左幾件迪士尼衫仔俾晴晴, 正牌貨都咁平, 真係抵!!)
返到酒店就要為聽日返香港做準備喇....就係要執行李喇!!!英明o既我地一早帶定個30o寸o既大o急, 所以, 我地好輕鬆咁放晒我地o既o野喇. 另外, 再加埋媽咪自己一個細o急, 仲有兩箱食物, 同埋一個走佬袋喇.
沒有留言:
張貼留言