呢d 咪就係我呢個麻煩港女需要o既service 囉!!!!
其實由酒店去BTS 站好快o架喇, 2分鐘啦, 既然有車坐, 就梗係坐下車啦.
落車後, 搵o岩方向, 就o向水門雞飯進發喇!!!沿途人多車多, 空氣真係唔多好.
路經Central World, 小倫提議不如穿過商場過, 好過沿馬路行吸廢氣. 一入到商場, 哈哈, 就到個擺booth, 有曼聯波衫喎, 仲遇見幾個曼聯球員o添, 一於埋去打過招呼先.
(有星仔, 貝比托夫, 小豆同傑斯呀!)
反正o黎開, 順道打探下蝴蝶袋o既位置! 嘩, 駛唔駛咁誇張呀!!!成間舖都迫滿人呀!既然盤纏有限, 唔好行街住, 快d 搵地方唱錢先啦.....唉, 女人就係咁o架喇, 呢頭話肚餓, 無錢, o個頭見到有個運動用品公司擺booth, 賣巴塞波衫, 仲要3折o添....於是, 阿媽同小倫就俾呢個booth 吸o左埋去喇. 揀o左一輪, 加上無錢, 所以只係買o左一件波衫俾細佬先.
所謂"財散人安樂", 清o左袋之後, 真係要"的"起心肝去搵錢啦, 如果唔係, 真係"無銀用" o架!!!!o向Central World 門口, 面向對面o既Big C, 好易就見到"李海泉"o既招牌, 轉右直入, 行到尾 好易就見到橙色o既Super Rich 喇. 入到去, 俾低本passport 佢地copy, 之後個職員會俾張號碼飛你等叫number. 聽唔見泰文都唔緊要o架, 因為好似銀行咁, 有個LED display, 睇住你個number 去相對o既counter 就得o架喇. 果然, Super Rich 個rate 真係高d, 今日係HKD 1 = THB 3.88, 高過機場好多.
有錢就身痕喇! 首先梗係要醫下個肚先啦!!!
望下隻錶, 大件事, 已經2點半喇, 要行快兩步先得. 由Super Rich 1965 行去水門雞飯 (Kaiton Prathunam) 其實好易行, 因為沿路一定會見到其他遊客向同一目的進發, 只要跟人行就一定搵到.
仲以為o向佢3點鐘落場前o黎到, 就可以一嘗人人讚o既雞飯啦, 點知去到門口, 個粉紅色衫職員話已經賣晒!!!!吓, 咁我點算呀!!!!唔制, 我要食雞飯!!!!
於是, 小倫就提議不如行返去前面, 試下o個間老翻水門雞飯啦. 試下都好丫嘛, 可以作比較. 記住, 粉紅色衫o個間係真o既, 老翻呢間d staff 係著螢光綠色衫o既. 雖然話係老翻, 但係都幾多人食o架, 我地差d 都無位, 咁o岩有人走咋. 我地3個人, 叫o左兩碟飯, 半打沙o爹, 兩支可樂.
(非常抵食, 只係THB 140 咋, 即係36蚊港紙!!!)
味道都唔差丫, d 雞都好滑, 湯係味精湯, o岩我口味! 只係沙o爹比較乾, 差o左d
填飽個肚, 有氣有力, 就梗係去血拼啦....下一站, 就係附近o既Platinum Fashion Mall. 呢個商場幾好行, 每一層賣同一類o既o野, 即係一層賣衫, 一層賣鞋, 一層賣袋. 呢度d 舖頭主要係做wholesale o既, 如果買兩件以上, 就可以有折, 或者叫佢平d. 當然啦, 呢個商場賣o既o野, 比較平民化, 似旺角中心, 要俾d 心機搵下, 先會見到有好o野. 呢度d o野咁平, 媽媽買得好開心, 我同佢每人買o左兩對鞋, 平均港幣60蚊, 真係抵過去淘寶呀!!另外, 買o左一d t-shirts 啦. 另外有一間賣自家製皮袋, 好平呀, 一個銀包只係THB290-390 咋, 我地係咁易買o左3個, 老闆就俾o左少少電視框我地喇. 小倫又買o左幾件得意o既盒仔t-shirts. 弊, 唔經唔覺行o左兩個幾, 三個鐘, 要走喇!!
下一站, 要去Big C 行下先得. 睇下有乜好賣, 預算下先. 就係咁, o向Big C 睇下o野, 執下零食, 媽咪見到有新鮮燒魚, 扭計叫話買條返酒店食, 好啦, 我地就買一條返房試下啦. 就係咁, 買下無聊o野, 都駛o左4百幾Bath 喇.
(好多生果呀!新鮮到呢, 睇見都流晒口水呀!!!)
返到酒店, 入到房, 已經見有職員已經幫我地收埋o左張additional bed 喇. 大家都要休息一下, 由於份雞飯份量唔係好大, 所以都有d 餓餓地, 條魚好快就俾我地消滅o左喇.
其實已經7點幾喇, 係時候出去食晚飯喇. 原訂計劃係傍晚去Red Sky Happy Hour, 飲下o野, 睇下日落o架, 睇人地影o既相, 覺得好有型o架. 可惜, 我有一個港媽, 掛住買o野, 買到唔知時間. 無得去喇....wuwuwu~~~
第一晚, 梗係要去食下泰菜啦. 於是就揀o左o向Siam 附近o既建興酒家 (Somboon Seafood) 喇. 今次又俾旅遊書老點我喇, 又話o向BTS National Stadium 站落車, 繞過國家體育館後街就到. 點知, 由酒店行到去BTS National Stadium 都已經要一段距離, 加上已經入夜, 好多夜晚o既攤檔開始做生意, 條路又窄, 又多人. 而且愈行愈少人, 又黑, 不停又俾馬路旁o既tuk tuk 撩我地坐佢地車去建興. 大約行o左半個鐘, 去到街燈都唔多一盞o既街, 終於都望見家鄉喇.
唔知係唔係已經9點幾, 過o左食飯時間呢, 一d 都唔多人, 空枱多過客. 我地一坐低, 就俾4-5個waitor 圍住, 問我地食乜, 搞到我連偷影本menu o既時間都無. 我地order o左咖哩炒蟹, 粉絲蝦煲, 炒通菜, 生蝦刺身同埋冬蔭公, 仲有每人一杯Lime Soda, 同埋兩碗白飯.
唔知係唔係我地一副餓樣呢, d 餸好快就上枱喇. 好忙呀, 又要食蟹, 又要食蝦!!!不過, 估唔到個咖哩炒蟹令我地失望, 至於個生蝦刺身亦都唔見得好出色. 不過, 冬蔭公就幾好飲, 個粉絲蝦煲亦都好惹味. 最後, 食剩o既梗係碟蟹啦....都唔知係唔係一早煮定一大鑊, 一有人order 就拎出o黎o既.
雖然水準比較失望, 但係今餐一d 都唔貴, 埋單只不過係1,300 幾Bath 咋, 俾埋tips, 齊頭THB 1400, 即係5百蚊港幣都唔駛, 3個人食, 都算幾抵啦.
由於條街太黑喇, 同埋有d 攰喇, 所以我地打的返酒店.
返到酒店, 小倫仲話要買埋D 大樹菠蘿先瞓喎! 我同媽咪就飽到連今日個welcome fruit -芒果都食唔落喇.
返到酒店, 輪流沖涼, 執行今日o既戰利品同plan 下聽日o既行程就瞓覺lu~~~
是日戰利品, 當然唔係全部都係我O架啦, 有大部份係媽咪O架....
沒有留言:
張貼留言