(由房balcony 影O既酒店園景)
第一個活動, 就係落去樓下泳水水, 試下個泳池喇. 其實, 我第一次住酒店真係會用酒店泳池o架咋. 各人換好泳衣, 著多件T-shirt o向面就搭lift 落泳池喇.
我地間房都幾方便, 住lift, 所以, 一出lift, 推門出去就到泳池喇, 完全唔駛經過其他地方, 又唔怕俾人見到, 正!!!!
落到泳池, 揀返個好位, 做埋熱身, 開始玩水喇!!! 由於我o岩o岩電完頭髮, 唔可以濕水, 所以只可以係咁易撥下水就算. 同埋幫大家影下絕密泳衣影!!!哈哈哈!! 有水玩, 媽咪好開心, 佢最鍾意游水!
呢個泳池水唔深, 只係 1.2 m, 一定浸唔死. 曬太陽o既椅又有樹蔭, 唔駛開太陽傘. 由於呢個係咸水池, 所以池水無氯氣. Good!!! 另外, d staff 一見到有客人o黎到, 就會走埋o黎幫你鋪好毛巾, 同埋拎d 水俾客人, 服務好欣勤!
(左上: 非常非常淺水O既BB 池, 右上: 有D 幾淺O既按摩池; 小黑拎埋可樂落泳池曬太陽!)
玩到差唔多十點, 就返上房沖身同換身去食早餐喇!!!!
玩o左一輪, 胃口特別好! 見到咁多樣食物, 樣樣都想試呀!!!一坐d, waitress 姐姐就會俾個menu 你, 因為有部份食物係要order o既. 上網聽人講, 話呢度o既Egg Benedict 好食, 一於試下先! 我order o左一份 egg benedict, 媽咪同小倫就食egg white omelette.
Breakfast buffet o既種類唔算太多啦, 各類麵包, cereal, jam and honey 都有, 有少少中式早餐, (唔知係唔係太多香港人住o既關係呢??), 有白粥, 叉燒包同燒賣; 生果. 既然呢度早餐都會serve Parma Ham, 就梗係唔好蝕底, 一於試下啦. 正! 味道唔錯! 可惜生果只得木瓜同蜜瓜, 無honey dew, 如果唔係, 夾埋一齊食仲正!!!!
食飽飽就要出發喇!!!!
第一個目的地 -- 唐人街喇!!!
點去? 由於唔可以直接坐BTS 去到, 我又懶得搵地圖, 鬼咩, 上google map search, 全部都係寫泰文, 搵阿水睇得明呀!!!!其他旅遊書又講得好含糊喎, 咪o向酒店麻煩bell boy 幫我地call 的士啦. 出路遇貴人, 今次遇著個曉過英文o既司機, 雖然佢d 英交唔算好叻, 但係起碼溝通到, 佢講到complete sentence, 而唔係只靠單位溝通啦. 原本佢以前o向Peninsula 做過, 唔怪得之啦. 仲話係頭先幫我地call 車o個個bell boy 哥哥o既friend o添. 司機哥哥咁醒, 梗係識做生意啦, 即刻派片俾我地啦, 又話我地走o既時候可以車我地去機場喎, 不過,佢quote 我地THB500, 又好似貴o左d 喎. 一於同佢吹住水先啦!
o黎到唐人街, 就梗係去買手信喇. o黎到呢間合記林真香, 真係好, 無人喎! 可以慢慢揀, 又試下食, 短短20分鐘, 我地就掃o左一大箱o野喇!!!!呢度果然係做遊客生意, 快快手就幫我地pack 箱, 俾低酒店名, 地址同埋房號, 佢地就會幫我地送返酒店, 一d 都唔駛客人擔心點樣大包細包咁拎住走喇. 真係要多得Lulu 醒o左張9折coupon 俾我地, 咁又慳返d, 我見之後o黎o個幾個香港阿太買o野都無9折o架, 所以, 我地找數時細細聲, 老闆娘亦都好快咁收埋張9折coupon 喇.
除o左呢間合記林真香, 隔離仲有一間叫老舖林真香, 兩間有乜分別我唔知道呀. 上網見兩間都有人幫襯, 或者有機會要試下老舖先得.
買o左手信, 四圍行下. 行到一條街好似深水埗d 批發街咁, 有平o野買, 就梗係行下啦. 雖然質素就同大陸o野無分別, 但係真係平. 買o左一大堆髮夾, 都唔駛THB 200. 再行下, 見到有賣首飾o既批發, 話買夠6件當wholesale, 買o左6件只係5百幾銖咋. 抵抵抵!!!
買到口渴, 揀一檔唔o向馬路邊, 樣似乾淨d o既果汁檔幫襯. 原本買一支柑桔汁3份飲, 點知, 一試就愛上, 好好味, 唔酸, 甜甜地, 最緊要夠冰凍, 所以買多一支飲.
買o野買到傻o左, 見d 砂爆魚肚好似幾好咁, 咁都買o左一大包!
雖然已經差唔多兩點, 但係, 我地o既早餐實在太飽喇, 都仲未肚餓. 咁點算好呢!!!一場o黎到唐人街, 唔通唔駛魚翅咩.........所以, 都係走去南星食翅漱口啦!!!! Priscilla 話南星抵食喎, 之前睇小高個blog 又介紹南星, 話好味, 一於死跟, 無蝕底!!!
一入到去, 只係得一枱客咋, 係一pair 香港情侶. 坐低, 服務員就斟杯冰凍菊花茶俾我地解下渴, 爽呀!!!!我地真係好飽, 食唔到太多o野, 唯有叫o左一煲中size o既翅, 一碗燕窩, 同埋一碟炸蟹餅, 叫做淺嚐一下就算喇!!!
估唔到d o野食真係幾好味喎! 而且, 仲好足料o添!!!!基於我同小倫都唔多鍾意食燕窩, 所以只係食o左幾啖就算喇. 可惜, 今次真係太飽, 食唔落, 唯有下次再o黎曼谷o既時候再幫襯啦. 最估唔到o既係, d 冰凍菊花茶係有得不停添食o架, 我地飲完一杯又一杯, 真係好味道! 呢一餐真係又平又抵食, 埋單只係THB 1230 咋!!!
原本o向網上search 到話有一間本地檔, 唔知叫乜名, 話食粿汁粉加胡椒湯好好味喎, o向耀華力路街尾, 我地真係搵到呀, 但係, 去到望住個menu, 都唔知叫乜好, 聞都有好似肉骨茶o既味道, 但唔識order, 睇得明o既, 只係有豬雜, 由於我同媽咪唔食豬o既內臟, 加上頭先d 魚翅仲o個個口入面, 最後都係唔買喇. 揀o左部的士, 打的返酒店.
話時話, o向曼谷搭的士真係好方便, 最重要係平, 唔駛自己行到身水身汗.
沒有留言:
張貼留言