(仲有, 是日水果 -- 火龍果!!)
各人瞓o左一陣晏瞓之後, 回復精神, 又再出動喇!!!首先, 我地再去 Super Rich 1965 唱多少少錢, 好似有多D cash 有安全感多D, 阿媽買O野又可以買得開心D....哈哈哈...之後, 我地決定再去食水門雞飯, 人人講到咁好味, 唔食過唔心息呀!!!反正都已經四點幾啦, 行得到去, 都差唔多五點, 夠鐘再開檔喇.
Yeah, 我地終於都食到水門雞飯喇!!!!都真係好多人o黎食o架喎. 當然大部份人都係慕名而來o既遊客喇. 今次我地就一人食一碟喇.
(就係咁, 一人一碟, 加多兩支冰凍可樂, 都只係港幣30蚊咋. 抵到笑!!!!)
今日連人地話O向水門雞飯前面o既賣芒果糯米飯O既小販都有開檔呀! 不過, 我見呢檔o向正條馬路側邊, 沙塵滾滾, D 車仲要架架都噴黑煙, 點買o黎食呀!!!太過dirty 喇.
填飽個肚, 我地又再返去尋日行過o既Plantinum Fashion Mall, 媽咪仲有兩件衫想買喎. 就係咁, 又o向樹消磨O左成粒鐘.
(行到天都黑埋, 月亮都出埋, 女人真恐怖!!!!)
(原先我想趁Happy Hour上去Red Sky 飲下O野, 睇下黃昏O架....可惜, timing 唔O岩!!!唯有等下次再O黎曼谷O既時候先啦....)
今晚, 我地再去行下Central World, 尋日只係經過咋, 都無時間慢慢行. 因為已經入夜, 路邊D 食檔都開始營業喇, 有好多本地人幫襯, D 炭燒魚都好香呀!!!
(影下夜晚O既Big C 先!)
去得曼谷, 又點少得港女至愛 - NaRaYa 蝴蝶袋丫......受好友所託, 要幫佢入貨, 所以點都要入去朝下聖至得!!! 每個顧客都好忙, 各人都拼命地揀自己鍾意O既款式. 鬼叫蝴蝶袋顏色多, 款式又多, 最重要係價錢大眾化. 連媽咪都忍唔住買O左大, 中, 小各一個呀!!!至於我呢, 就叻咯, 忍到手唔買!!! 事關平時蝴蝶袋都唔係我杯茶, 再加上我屋企實在有好多袋喇, 唔應該再買.
買完蝴蝶袋就到我放血O既時間喇....就係去Boots 買O野喇.....真係好唔明自己點解會咁做, 舊年O向英國可以咁忍手, 一支Boots o既產品都唔買, 但係O黎到泰國反而要買喎.....女人真難明......經魔鬼sales 介紹之後, 買O左一堆, 好多O野咩, 又唔係丫, 但係咁就買O左5千Bath.
(其實我地只係拎住一袋戰利品步出NaRaYa 門口, 都真係好犀利O架!!!!!仲有呀, 我地覺得O向NaRaYa 對面, 開正Starbucks 實在係太聰明喇!!!!為千千萬萬O既無奈先生提供一個理想休息地!!!!哈哈哈!!!)
(唔知點解, 商場四周都有好多英超O既廣告, 連電梯都唔放過)
所謂財散人安樂, 既然安樂晒, 就係到O左醫肚O既時候......上到去Central Food Hall 呢一層, 見到好多舖都好似就快收舖咁, 有無搞錯呀, 家陣九點咋喎, 就想收檔. 行入去一間越南餐廳, 落order 啦, 點知第一樣叫O既炸軟殼蟹已經賣晒喇. 好弊......於是, 我地好無品咁起身走人.....
拿拿臨去supermarket 睇下有乜好賣啦....結果, 飽肚O既食物就無買, 只係買O左芒果糯米飯同榴槤咋. 落返下一層, 睇下其實食肆有無好O野食啦. 有好多日本O野餐廳, 估唔到泰國人都幾鍾意食日本O野O架喎, 而且, 價錢仲唔貴O添. 嘩, 仲有鼎泰豐呀!!!好想食小籠包呀!!!!可惜, 已經last order, 想食呀? 唯有明天請早!!!
最後, 我地都係返去Siam Paragon Food Court 買O左盒豬脾飯返酒店房慢慢嘆!
由於榴槤係偷運返酒店, 雖然已經pack 住, 但係為免影響其他人, 我地決定經過泳池直接上房, 而唔行過lobby.
實在太飽喇, 唯有食d 紅肉柚子幫助下消化啦....
另外, 呢兩位唔守規距O既人, 就被我迫佢地企出去balcoy 食榴槤, 食完之後, 仲要包幾層膠袋, 連個垃圾桶都要放出去balcony 過夜.
是日戰利品:
1)抵到喊飾物一堆
2) 唔知有無買貴O左係Boots 產品
3) 平過香港好鬼多O既蝴蝶袋
4) 3折波衫, 平到我以為係假貨
沒有留言:
張貼留言