早排, 小倫忽然對墾丁有興趣, 話不如有機會去下呢個地方喎.
講真, 我對台灣呢個地方無乜特別好感, (基本上, 我對所有講普通話o既地方都興趣不大) 雖然好多香港人都好鍾意去呢度旅行. 行夜市我o既興趣不大, 當地o既地道小食又唔o岩我食, 可能平時o向香港我都唔多會食街邊o野, 覺得唔乾淨呀! 加上, 我份人太老土, 唔鍾意試新o野. 台北只係好多年前去過一次咁大把.
既然小倫想去呢度, 都要做下資料搜集, 睇下有乜好玩啦. 於是, 提議不如租套"海角七號"睇下墾丁o既景啦. 未睇之前, 我完全唔知呢套戲講乜, 平時, 就算d 戲唔睇, 我都會睇下故事大綱同影評, 不過, 呢套我真係乜都唔知, 只知道呢套戲o向台灣好收得.所以, 好驚悶到嘔.
可惜,由於太多人租的緣故,隻碟好花, 所以, 睇完成套戲後發覺好似斷斷下咁, 有D 片段skip O左. 於是, 小倫行O左好多地方, 連信和都搵埋, 最後O向屋企樓下另一間up dup租碟舖買到隻碟返O黎. 我地可以由頭睇多一次. 結果, 睇O左幾多次都已經唔記得喇.
點解要睇咁多次, 因為我地需要一D 時間去睇清當中O既細節同埋消化當中O既內容.
最吸引我O既唔係當中講O既兩段愛情故事, 可能我太冷血, 我唔係覺得太感動. 遲了60年O既說話, 究竟仲有無意義呢? 如果老友子已經忘記O左日本老師, 依家無啦啦又俾返D 信佢, 又點喎. 阿嘉與友子之間O既故事,又發展得好離奇.
