小玩意

星期三(26/9/2007), 我同小倫行完金都睇鞋之後, 去o左深水埗, 打算睇下o的防潮箱同相機鏡頭, 不過都係睇唔o岩, 買唔成.

橫掂行開鴨記, 我地就去埋行賣珠仔o個條街, 我地買o左三包Swaroski 水晶返屋企試下自己穿手鍊. 妹妹果然厲害, 手作仔呢d o野對佢o黎講簡直係零難度, 好快佢就幫我穿好一條, 不過今次係穿俾媽咪o既, 所以帶上我隻牙簽手就梗係鬆好多啦, 大家睇下幾十蚊貨仔, ok 唔ok ?

又一城 - SimplyLife

今晚放o左工, 就要趕去City U, 因為約o左Phoebe陪佢買laptop, 佢諗o左好耐先至醒起我係讀CityU, 所以可以用student ID 以discount 去買lenovo o既notebook.

搞掂之後, 我地同埋Dowson 一齊去o左一間好舒服o既餐廳 --SimplyLife Bakery Cafe 食dinner. 張sofa 非常舒服, 而食物o既水準都好good, 龍蝦湯好夠rich, d pasta 好正, 肉眼扒都好好味. 原本我地仲想食cake, 但係實在太飽, 食唔落.

今晚Phoebe 講開, 佢個同事話: 老公同小朋友一樣, 佢地o既缺點係無得改變, 你只可以接受, 而你要做o既就係要去發掘仔佢地o既優點" 我覺得佢都好o岩.

而家咁多人離婚, 都只係因為唔接受大家一d 一早已經有o既缺點o者....

又病喇!!!

最近天氣已經有少少秋意, 本身都覺得有少少作感冒.

加上, 星期六, 日兩日舟車勞動, 我今日喉嚨痛到死, 而且仲有發燒, 簡直辛苦到想死 !!

最衰今日o係Billie 放完假第一日返工,因為我知道佢一返工就會心情唔靚, insurance 公司單o野又煩到死,  如果唔返工就唔係幾好, 佢一定會塊面黑到爆!!

所以, 我成朝都無行埋過佢個位度同佢吹水.

姊妹裙 - 揀衫篇

琴日下晝, 約o左Miu Miu, 小花, 同蘭子, 仲有幾個姊妹一齊上去度身揀款做姊妹裙.

今次呢間舖頭都幾平喎, $280 就有一條, 仲係度身訂造, 不過款就少D, 其實都無所謂啦, 姊妹裙來來去去都係果幾個款, 無得點變.

小花第一個揀先, 佢最快, 一試就ok喇. 係一條泡泡裙. 跟住到我, 麻煩o既我揀o左款都仲要改來來去, 我其實想做條好似TFE 粉紅色o個條咁, 所以我下半身要加紗, 但係姐姐話可能要加錢, 如果唔係要加好多o既, 幾十蚊就算數啦, 加就加啦....之後, 其他姊妹都陸續揀好款度身.

我見到有一條白色紗裙, 簡簡單單, 乜都無, 但係我覺得影外景都唔錯. 我問姐姐幾多錢, 佢話訂造都係$500. 考慮得過, 唔知造一條紅色出o黎效果會係點呢?但係無現貨睇都真係幾驚, 萬一造o左出o黎完全唔係果回事咁點算喎.

好心急, 唔知幾時有得試衫呢?

Meeting with ESD Friends - 915韓燒夜

琴日下晝, 陪Miu Miu 同阿餅上去小花媽咪舖頭揀完男禮之後, 我就去o左銅鑼灣等小倫收工, 因為我地又約o左ESD o的朋友仔一齊去食韓燒.

琴晚有好多人呀, 仲多人過上次打羽毛球, 除o左上次見過o既Kathy & 阿鵝, 檬檬同檬少, seven & 大俠, Kiki 同肥牛, 兔兔, Pingu, 靚太, 仲有第一次見o既kkcy, prettyangel 同三眼仔.  之前, Kiki 一路都話仲等緊師父擇日, 原來肥牛已經有日子o架喇, 不過特登等到星期五先至同Kiki講 "我地出年今日結婚喇", 真有心思!!!!

琴晚真係好開心, 唔覺唔覺, 我地都食o左3個幾鐘, 我地仲一齊影o左大合照o添!!!

APM - Roma Roma

我, Grushenka  同埋 Priscilla 琴晚又一齊食飯喇, 因為如果再postpone , 就要等多兩個星期至約到. 次次都係咁, 得三個人o者, 約食飯都咁困難.

今次, 我地終於衝出又一城, 去o左APM o既Roma Roma, 哈, 又係Italian food, 上次先至食完Amaroni's Little America. Grushenka  仲帶埋黃小B 出o黎o添. 呢個小朋友真係好趣致, 2歲半識咁多o野, 已經好叻叻啦......最衰無帶相機, 如果唔係, 就可以同黃小B影相相啦...

不過, 帶住小朋友食飯都真係幾麻煩, 掛住照顧佢食o野, 自己都無得食.....但係, Grushenka 都真係幾有天份做好媽媽o既....

呢間餐廳o的食物都唔錯呀, 幾好食,我地四個大人叫o左兩個2人餐, 都差D食唔晒, 而且一D 都唔貴. Service仲好好o添......

婚禮花球速成

今日o向公司上網o既時間, 睇到浸會o黎緊秋季課程其中有一個course 叫"婚禮花球速成", 詳情如下:-

本課程為一速成班，旨為使學員可於短期內學懂以鮮花及絲花紮作新郎、新娘襟花及新娘、伴娘花球。使用的材料包括：襟花、雪球手花、頭飾、新娘花球、伴娘花球、花枝膠帶及鐵線等。學員須自備刀、鉗及一堂鮮花花材上課。
（本課程只發聽講證書）

授課語言 : 粵語
名額 : 25
全期小時 : 8
學費 : $400
其他費用：全期材料費約二百五十元 (學員可自購或由導師代購；如須代購，須於首堂繳交費用)

編號	導師	開課日期	週次及時間
08HLS1155A	本院導師	十一月五日	週一晚7:00-晚9:30
09HLS1155R	本院導師	十一月三日	週六早10:00-午12:00
34HLS1155A	本院導師	十一月一日	週四晚7:00-晚9:00
59HLS1155R	本院導師	十一月一日	週四早10:00-午12:00

雖然我o既美術天份唔高, 但係我見咁平, 4百蚊學4堂, 好似幾抵, 不過材料費都要成$250, 好有興趣呀. 而且仲可以學下點樣紮花球, 手花. 但係我都唔知學o黎做乜o架, 都唔會有下次有用o既時間, 個個都結晒婚, 妹妹又唔會結婚住, 就算結都唔會搞咁多o野.....

無聊的我

對於工作, 我其實係十分之熱愛, 甚至乎有D工作狂o添! 我很喜歡自己的職業, 唔好問點解, 鍾意就係鍾意, 縱然係閹悶.

而家呢間公司, 外界人睇o黎, 十分理想, 每日準時返工, 放工, 毫無工作壓力, benefits 又好, 份雙糧又唔錯. 可惜, 呢度o既制度唔得, 制度唔得都無得complain, 鬼叫係大公司, 大公司自然有佢o既一套不公平制度同規矩, 遊戲規則係咁, 你唔可以say no, 只可以揀自己唔玩.

每當變幻時

琴日, 因為天氣唔好, 而且星期六又已經行o左尖沙咀同旺角, 所以我地無出街. 只係留番o係大埔.

去o左大埔墟街市食豬扒麵後, 照舊行去吉之島巡視業務. 最後, 租o左隻VCD - 每當變幻時, 返去小倫屋企睇.