每當變幻時

琴日, 因為天氣唔好, 而且星期六又已經行o左尖沙咀同旺角, 所以我地無出街. 只係留番o係大埔.

去o左大埔墟街市食豬扒麵後, 照舊行去吉之島巡視業務. 最後, 租o左隻VCD - 每當變幻時, 返去小倫屋企睇.



呢套戲講一個女仔叫阿妙, 27歲到37歲中間十年發生過o既事. 佢o既人生目標係要30歲o既時候還清所有阿爸欠落o既債, 同埋要搵一個值得嫁o既人.

都唔知係好彩定唔好彩, 佢真係可以o係30歲清晒所有債, 因為佢阿爸突然心臟病死, 債主waive 晒佢所有o既債. 而其實佢身邊一直都有一個男人對佢好好, 有意思認真同佢一齊, 可惜, 阿妙o個時覺得佢唔可以揀呢個男人, 因為佢唔想自己一世都係o係個街市渡過, even 佢自己都對呢個男人有意思.

終於到o左10年後, 阿妙有o左自己o既事業, 成功擺脫o左街市妹o既身份, 此時又重遇番呢個男人, 當佢以為自己可以同呢個男人有進一步發展o既時候, 發現呢個男人已經有自己o既家庭. 又係好老土o既timing 問題.

呢個結局係一個好合理o既結局, 但係唔開心. 我鍾意大團圓結局, 而家有遺憾. 不過事實就永遠都係咁, 魚與熊掌, 兩者唔可以兼得, 一定要取捨.