2010 歐洲之旅 - 荷蘭 Day 3 (25/9) Part I

由於要趕火車同check-out o既關係, 我地o既荷蘭之旅, 只係得返今日半朝早留o向阿姆斯特丹喇. 所以, 又要一早出發喇. 出門前, 我地要先執好晒d行李, 等行完街街返o黎, 就可以即刻拖o急走人check-out. 今日早餐, 又係好似尋日咁, 一人一杯cup soup, 另外加多一個月餅呀, 我就食由香港帶o黎應節o既半島奶黃月餅, 小倫就食飛機上派o既美心迷你月餅.

第一站, 我地去Bloemenmarkt 辛格花市, 話就話係花市, 實際上只係一條街, 有廿幾間舖, 感覺有d 似香港o既花墟. 每間舖都係賣同花有關o既o野, 有d 賣種子, 有d 賣鮮花, 有d 賣屈金香o既bulbs. 可能我係太早o既關係, 唔係好多人, 係咁易我地就行完喇.

行返出街口, 就會見到鑄幣塔 (Munttoren).

嘩, 突然間藍天變烏雲喎, 就係咁, 所以有彩虹出現呀!!!! 差d連相機都拎唔切呀.....我地梗係把握時間即刻影低條彩虹啦...我地真好彩!!!彩虹真係好靚呀!

(10分鐘前仲係藍天, 當拎完部相機出o黎, 就變天喇....話變就變)

見仲有時間剩, 我地行去喜力啤酒廠影下相, 到此一遊. (因為時間太早, 啤酒廠未開門, 無得入去參觀) 上網睇人地o既blog話有機會見到以前負責運送啤酒o既馬車o架......原來, 彩虹都唔能夠為我地帶來好運, 我地等o左一陣都見唔到馬車呀!!!

於是, 我地行返去Hobbemastraat, 坐tram 返酒店check-out 喇.

Check-out o既手續好簡單, 俾埋o個少少city tax 就可以走人lu. 好在大把時間, 推住兩個大o急行出去tram-stop 都幾索氣. 

等等下tram, 見到有架巴士喎, final stop 都係Centraal Station, 反正未o向荷蘭坐過巴士, 不如就試下啦…我地兩個就係咁傻下傻下上o左車喇. 開頭, 架巴士行o既路同tram 一樣o既, 無幾耐, 巴士就走o左入另一區喇…..死火, 好驚呀!!!架巴士已經行出o左我手上o既地圖範圍喇……愈坐愈驚之際, 哈哈哈, 已經到站喇!!!!

落車後, on 居居拎住我地兩張pre-print tickets 去counter 問人, 駛唔駛換飛, 或者要做乜手續啦. 實在太方便喇, 原來我地坐Thalys, 乜都唔駛搞, 直接上月台等就得. 於是, 我地幫襯車站o既 supermarket, 買o左盒沙律, ham 同埋sandwich 就上月台等火車, 出發去巴黎喇..

Thalys 好準時就到喇, 上到車, 搵返自己坐o既coach & seat. 計劃周詳o既我, 一早已經o向香港上網買定飛啦, 一來可以慳唔少, 二來又可以確保一定有位坐. 眼見呢一班車都幾多人呀, 我地呢個coach 坐到 full 晒.

一開車, 我地就先開餐. 之後, 我就埋下數, 計下我地呢個短短o既荷蘭之旅有無out budget, 夾下數, 睇下用剩d 錢o岩唔o岩數. 搞掂晒, 就瞓下覺喇, 反正要坐3個幾鐘頭先到巴黎.

無幾耐有人check 火車飛喇, 其實所謂check,都只係望下我張pre-print tickets, 再o向上面吸個印仔. 路過Belgium o既Antwerpen 同Brussel, 天氣好差唔呀, 希望去到巴黎唔係咁啦. 成個天都灰濛濛, 有時仲落雨o添.

好彩, 瞓多一陣, 去到法國d 天氣完全唔同晒, 見返藍天白雲喇….準備落車lu.