刷牙洗面之後, 我地決定出去晨運下至煮早餐.
Heehee, 所謂O既晨運, 其實都只不過係行去對面街O個間1011 supermarket 買O野. 1011 係除O左粉紅豬豬Bonus 之外, 另外一間大型super, 佢O既價錢稍為較Bonus 高DD, 可能同佢係24小時營業有關. 呢一間1011 規模明顯無之前幫襯過O個間Bonus 咁大.....正當我O向店入面搞搞震四圍影相之際, 有位staff 同我講, 話no photos, Oh, sorry! 唔知道原來唔俾影相O添......不過, 人地係好有禮貌咁講, 所以, 唯有乖乖聽話啦.
跟住, 又返去 apartment, 小倫負責煮早餐, 我負責收拾行裝, 因為今日我地要展開冰島環島遊喇.
(仲有豬扒未食晒, 所以是日早餐, 又係食豬扒呀.....今次係豬扒蝦子麵)
嘩, 今日有D 凍呀, 得3度咋......唔怪得車上面O既玻璃結O左霜啦...要等架車warm up 下至可以開車. Apartment K 都幾方便, 門外就已經可以泊車喇, 唔駛行好遠. 唔知我地下次再返O黎, 會唔會都係住返呢個block 呢? 定係要住第二邊呢?!
今日我地上午O既目的地係位於冰島西南部O既Reykjanes Peninsula. 呢度同樣係火山活躍O既地帶, 所以會見到大遍lava fields, 仲會有地熱區O添.
左搞右搞, 終於都搞到10點鐘至出發. 由Reykjavik 揸車去位於Reykjanesbaer 的第一個景點: Stekkjarkot, 大約要45分鐘, 唔算太遠.
(又係一出O左城, 四周景物又變返荒蕪, 四野無人, 間中先會有車經過)
呢度有乜好睇???
就係要睇下以前冰島人O既房屋係點O架喇. 以前O既冰島屋主要係鋪晒草皮O架, 因為要保暖, 而且又唔可以起得高, 要擋風丫嘛.....鬼叫冰島成日都咁大風.
根據資料話, 呢度1855-1857年已經有人住O架喇, 即係一百五十幾年前, 不過, 30年後就被人棄置喇. 呢個site 自1993年開始對外開放, 俾人參觀, 仲唔駛錢O添....
(今日O既天氣實在太好喇.......非常感恩...O係香港, 好少有機會見到咁藍O既天空, 同埋咁廣闊O既草原)睇完屋仔, 我地就順道探埋附近O既維京船. O係好耐好耐好耐以前, 冰島都有維京人住O架. 所以, 呢度有隻維京船O既標本睇下. 話佢係標本真係講得無錯O架, 呢個館起到成個玻璃箱咁O架. 不過, 要入去睇船就要交入場費喇.....所以, 我地探完個washroom 就走喇喇.
維京船外面仲有個戶外文化村, 展示以前O既村落係點O既.
唔覺唔覺, 又差唔多12點喇. 見附近有隻豬, 又要去探下佢先, 唔覺意又擺得O左千幾蚊喇 (1336 ISK), 呢度駛錢真容易!!!
跟住就要向第二個景點 --- Leif the Lucky Bridge, 又名 Bridge between Two Continents 進發喇. 呢個景點有D 難搵, GPS 搵唔到exact location. 好在之前O係tourist information centre 拎O左一大堆maps 同埋leaflets, 當中有一個Reykjanes map, 可以大約指示呢條橋O既所在地. 簡單O黎講, 沿住Route 44 再轉Route 425 就會見到O架喇. 今次, 愈行愈見唔到草地喇, 只係剩低灰灰黑黑O既lava field.
呢度有乜咁特別? 事關呢度係另一處歐亞版塊同美洲版塊相遇O既地方. 呢度可以講話係寸草不生喎, 因為呢度係highly active volcanic zone, 地殼活動非常活躍, 而且敏感. 企O係呢度, 襯埋灰黑色O既火山灰, 感覺猶如置身月球表面一樣.
影飽相, 再向另一目的地出發. 今個景點同樣係同火山有關, 就係要去地熱區, geothermal area. 呢度叫做Gunnuhver, 點知自己到O左未? 好簡單, 只要見到多好白煙就係O架喇....
冰島人好環保, 既然地底有咁大O既熱能噴出O黎, 就梗係唔好浪費啦.....於是, 就係呢度起O左間地熱廠. 所以, 凡係見到地熱廠O係左近, 就知道O個度一定係地殼運動活躍帶喇.
行到O黎呢一度, 唔就無咁好行O架喇, 變成石仔路, 所以唔好揸咁快,要小心行車.
停好車, 我地就行入煙霧當中, 感覺唔多好, 充滿硫磺O既味道, 而且, 好熱, 仲要伸手不見五指, 雖然可以沿繩而行, 但係真係好驚呀........係驚到差唔多喊O個種感覺. 從來未試過......所以, 行O左一陣, 就要走喇.
(真係伸手不見五指O架.....好驚~~~~)
沒有留言:
張貼留言