跟住就等埋Maggie一齊去油麻地二仔記上堂, 我地兩個盲毛, 無睇清楚就跟人搭lift 上, 上o左去8樓門市部, 嘩, 駛唔駛咁多人呀!!!
好似淪陷咁, d人多到迫都迫唔到入去. 原來上堂學整cake 係上10樓喎.我地兩個算早到, 所以揀o左第一排o黎坐, 近d望得清楚d丫嘛!!!!kekeke.....差唔多人齊就開始喇!!!
首先, 就係做個蛋白蛋糕, 所以要打蛋白. miss 介紹話用一隻o野叫做SP, 即係乳化油/乳化劑, 話加o左呢隻o野落去打蛋白, 就會萬無一失. 但係心中有疑問, 係唔係應該唔好加好d 呢????始終係化學o野咁丫嘛. 之但係, 加o左又真係好快就可以將d蛋白打起lu wor~~~~~打好蛋白, 加埋d低筋粉攪勻, 就可以倒入一個可甩底o既模入爐喇.
o向焗緊蛋白蛋糕o既同時, 我地又要預備另一樣材料喇. 就係將d朱古力餅碎, 加埋牛油搓勻, 用o黎做個餅底. 食譜上話用oreo 餅, 但係原來唔係o既, miss 話佢地呢度有得賣現成o既朱古力餅碎, 唔知點解, 感覺唔係幾好咁, 好似oreo 好味d 喎. 跟足miss o既份量整, 但係個餅底做得非常差呀, 佢聲稱個餅底要鬆鬆地先好食, 但係都無理由會散囉. 將d牛油同餅碎撈好, 就用保鮮紙包好, 放入雪櫃雪一陣.
與此同時, 個蛋白蛋糕應該夠鐘出爐, 拎出o黎之後, 將個餅連模倒轉放o向放涼架攤凍, 跟住, 就可以脫模, 同埋將個餅打橫好似鋸樹咁前後拉鋸一開二, 哈, 估唔到今次我又幾成功喎, 做得靚過Maggie, 可以分到大約一半, 無切斜喎!!!!
第三個步驟, 就係做個朱古力軟心喇, 朱古力o既份量同whipping cream o既份量係1:1, 再隨意加5-15g o既榛子醬, 增加香味. 咁我問, 可唔可以買現成supermarket o個款榛子醬mix 又得唔得, miss 又話唔得, 硬係話要買呢度有得賣o個隻喎, 幾hardsell. 食譜上面寫就話要將d cream 煮滾, 再倒入d chocolate button 同榛子醬搞成軟心, 但係, 佢今晚教另一個方法, 就係先坐溶d朱古力同埋榛子醬, 再加入由雪櫃拎出o黎o既cream, 再極快手攪勻至滑身. 但係, 因為事先預備好o既朱古力未夠熱, 所以每個同學都遇上好大困難, d朱古力漿凝固返. 終於叫做攪到d朱古力軟心似模似樣咁, 就要快快手每一層都搽上朱古力軟心. 如果有剩, 最好連個蛋糕邊都搽埋朱古力啦, 好味d丫嘛!!!! 等到d朱古力面變成瓦色就ok 喇. 呢個朱古力軟心, 同時亦都可以做melty kiss 呢款形o既朱古力o架!!!
最後, 就再打蛋白同糖, 打到企身, 令面, 就好收手喇. 跟住, 就將d蛋白一pat pat 咁撻o向個蛋糕面, 直到完全遮住d朱古力. 不過, 要有技巧, 唔可以好似搽cream 咁掃平, 要起勾, 如果唔係就唔立體, 唔靚o架喇!!1呢個step Maggie 做得比我好, 又一次証明我係一個毫無美術天份o既人喇!!!!呢個step 亦都係整個蛋糕最有難度o既地方, 亦都最考功夫喇. 一直上堂掛住傾計o既我地, 再加上我呢個美術0分o既人, 就更加整得肉鬼酸!!!!hahaha
不過, 用火槍上色之後, 又靚o左好多喎!!!!kekeke
整完蛋糕, 同Maggie 去附近o既茶餐廳, 原先打算快快脆脆食碗粉就返屋企. 點知, 我地兩個一坐低就雞啄唔斷咁不停傾計, 傾傾下就差唔多12點先至捨得走咋.....哈哈哈. 鬼咩, 年幾無見, 梗係有好多計要傾啦....今晚傾唔夠, 下星期放假再出o黎繼續傾~~~~
總括o黎講, 俾得錢上堂, 基本上學整cake o既失敗機會係非常低o既, 事關份量同時間, miss 已經控制好, 到自己落手落腳做o既部份, 又甚少會出錯. 我份人孤寒, 好少肯俾錢出街學整cake, 加上又無伴. 單比較二仔記同towngas, 我個人比較鍾意towngas上堂, 一分錢一分貨, towngas個kitchen整齊企理好多, 光鮮好多, 二仔記有d up dup, 坐又唔坐得舒服, 地方又比較迫. 如果比較導師的話, 我覺得好似我公司join o既cooking class o個個導師教得好少少, 仔細好多. 不過, 我都係懶o架喇, 查實我唔多鍾意出去上堂, 鍾意一放工就即刻返屋企hea, 無乜必要都唔想放工放假留低小倫一個人o向屋企, 我單獨出去玩.....
沒有留言:
張貼留言