綠茶紅豆麵包

尋日整完黑芝麻包之後, 我o既捧場客之一o既同事, (即係上次好有心咁送o左張百佳coupon 俾我sponor 我買粉o個個), 話好耐無食茶紅豆包, 所以, 今晚雖然好鬼死攰, 但係都要整呢款包氹下佢啦.......

放工返到屋企攰到無力呀, 所以要先小睡一陣先, 9點幾至起身, 食完飯返到屋企, 即刻煮紅豆, 好在小倫放工返到屋企事先已經幫我浸定d紅豆, 不過, 都係唔夠時間, 所以, 要煮好耐, 差唔多煮o左5分鐘d紅豆先至開始軟身.



搞好d紅豆, 就要快快手開機喇!!!今次係我第一次用象印呢部麵包機整呢款包, 所以份量都要重新試過, 我照用basic white bread, 不過就自己加多2 tsp 綠茶粉. 每次整包, 我都會記低自己additional 加多d o左乜o野材料同份量, 因為我自問無人地咁叻, 隨意落份量都可以整到好味o既包, 我無天份, 一定要記低.

另外, 我比較古怪, 唔鍾意等到咇咇聲響先加additional 材料, 落完yeast, 我就會加綠茶粉, 到搓到咁上下, 大約10分鐘, 再逐少逐少加紅豆, 目的係想d紅豆分佈得平均dd.

校好鬧鐘, 4點幾個包包出爐就要起身拎佢出o黎, 我唔鍾意keep warm 到天光, 怕有水氣焗住, 個包唔好食. 不過, 再校30分鐘後起身切包, 就真係力有不逮喇. 我同小倫都起唔到身, 唯有6點半起身切包, 切好入盒, 極速洗o野, 仲有15分可以瞓一瞓先起身返工. :p

今次呢個綠茶紅豆包o既反應都唔錯, 大家都話綠茶味夠香, 不過唔夠街買o個d咁綠色, 下次等我試下買上次小高介紹俾我o個隻綠茶粉, 睇下味道同顏色會唔會好d先.

每次o向公司見到d同事鍾意食我整o既麵包, 真係好開心o架!!!尤其係當其他都有呢部機o既同事都讚, 話我整d包好食過佢地自己整之後, 就更加開心喇!!!