故事就要由上個星期三講起......
話說, 我上星期三o向飯堂食完飯之後, 一直都好似個胃脹住咁, 我根本唔覺得肚餓, 連有同事請食下午茶都無胃口, 只係食o左咖哩魚蛋同燒賣, 杯凍華田都只係飲o左幾啖就無再飲喇, 跟住連做o野都無乜心機, 拿拿聲做好晒D o野, 一到夠鐘就同阿姐講, 我唔舒服想走先.....
雖然真係有o的唔舒服, 但係我同小倫都係去o左旺角Nelson 度剪頭髮先, 因為如果我而家唔剪, 要到8月中至有時間剪o架喇....
剪完頭髮之後, 無乜胃口, 所以都只係去o左朗豪坊食o左碗粥, 然後就返屋企...大約九點幾鐘, 因為開始好唔舒服, 於是就立刻返上床o訓覺....
結果, 成晚都好熱, 我估我又係成晚發燒, 加上成個肚都好痛, 我就以為自己梗係又係感冒菌入腸啦, 所以決定星期四上晝唔返工, 打算睇完醫生下晝至返工啦, 因為星期四晚分分鐘鐘都可能要開OT.
星期四(26/7/2007) 我一早就打電話去周振軍度掛號啦, 因為佢係公司醫生,而且佢間診所大間o的, 或者可以影ultrasound, 所以今次就試下睇佢啦, 點知要排到12點至到我, 我見自己應該都頂得住, 就叫媽咪去打麻將啦, 唔洗陪我去睇醫生喇....不過我地一齊去周明園食早餐, 可惜我都係無乜胃口, 只係食o左兩啖, 真係只有兩啖米線同幾粒白魚蛋就算喇....我諗住早少少去到醫務所或者可以早D睇完, 早D返公司啦, 點知, 我已經辛苦到死, 都仲要等到差唔多到十二點九至到我睇...
終於到我喇, 一入到去, 我就梗係講話我個肚好痛, 都未問醫生係唔係感冒菌入腸, 醫生就叫我埋床, 按下我個肚, 就話我可能會盲腸炎又可能驚我係輸卵管有事, 叫我不如入院照電腦掃瞄, 我叫佢等等, 不如等我打電話, check 下我有會住院保險先啦, 真麻煩, 手提電話又無電, 又撞o岩lunch hour 公司無人, 所以唯有答醫生不如去化驗所做ultrasound 啦, 咁醫生就幫我抽血, 係抽血呀!!!
我生平最怕就係打針o架喇! 由於我要4點出入佐敦做checking, 所以小倫就立即請假返大埔陪我去...去到香港體檢, 填好form就等照ultrasound, 其實都照o左幾耐o架, 個姐姐話你條盲腸都幾大條喎, 跟住就不停問我你唔會有o左嘛, 我梗係答無啦, 因為根本無可能會有......之後, 佢仲要叫醫生入o黎照, 我已經開始好驚喇......
醫生照完之後, 仲未完, 佢地仲話唔收錢幫我再影幾張電腦掃瞄, 死啦, 如果無事就唔會搞咁多o野啦, 都出晒所有reports都已經六點, 同時間又收到周振軍醫生o既電話叫我七點前返去, 我地就立刻飛的返大埔啦.............
返到大埔見醫生, 佢立即叫我要即刻入院, 叫姑娘打電話去浸會幫我book 床, 如果夜晚做手術唔駛加錢就即刻做, otherwise,就聽朝做, 仲幫我約埋九點鐘見醫生.......我當時其實真係好驚好驚, 因為我從來都未試過....
我地就即刻返屋企話俾媽咪知, 然後執少少日常品 (其實我都唔知帶o的乜入院), 再食o左少少粥水, 因為我全日都無食過o野, 好肚餓.......
跟住小倫就同我搭的士去浸會醫生辦入院手續, 亦都見o左幫我做手術o既醫生--湯偉聰醫生, 佢睇完我o的報告之後就解釋我地知, 應該都會係盲腸炎, 佢會幫我做微創手術, 即係o向個肚度開3個小孔, 不過如果都有可能會開肚做, 因為我條盲腸好大條, 又或者唔係盲腸炎, 而係輸卵管有事就要開肚喇....
佢會安排我聽朝(i.e. 27/7/2007)儘早幫我做, 佢會一早七點半幫我去手術室排隊.
終於大約10點就上到病房, 我今次入住o既坐6樓B601病房B床, 這是一間8人房, 小小房間內有一部電視, 每人都有一個小櫃, 原本護士叫我由而家開始唔好食o野, 但係我好肚餓, 所以小倫就幫我o向canteen ordered 一碗白粥俾我, 食完之後, 就有護士o黎幫我又抽血, 係又抽血呀, 跟住仲有要吊鹽水呀, 姑娘幫我嘗試打針, 唔知係我郁定係搵唔到我o的血管, 搞到到再係右手打過, 原來吊鹽水真係好痛好痛o架, 我立刻就大叫, 又喊, 要返屋企, 吊鹽水都咁痛, 做手術咁點算呀, 我不停咁流眼淚, 原本探病時間只係到10點,但係小倫都陪我到12點幾至走, 可惜我o訓唔著, 因為我真係好驚好驚做手術...........
沒有留言:
張貼留言