學校9點鐘集合, 所以都唔可以瞓晏d, 叫醒埋小倫, 一齊返去同晴晴食早餐先返學校. 今日係晴晴第一次參加學校旅行呀!!!!同平時一樣, 即使今日去旅行, 慣o左夜瞓o既晴晴, 都唔見得醒神o左去邊, 依家都係未瞓醒, 食早餐o既時候, 依然係懵下懵下.....
返到學校, 我地先入去班房點名, 同埋等出發, 好搞笑, 等緊出發o既時候, 晴晴問我: 姑丈 (即係小倫), 係唔係o向學校外面等呀??? 佢呢個傻瓜以為小倫會同埋佢一齊去旅行喎....哈哈哈.......
終於等到夠鐘出發喇!!!第一站, 我地去荃灣, 參觀鴻福堂涼茶館....呢個行程好搵笨呀!!!!都唔知有乜目的.....大家行入去一個好細o既地方, 入面有幾塊展版, 約略講d有關涼茶o既資料, 跟住就行去另一間房, sell 涼茶券同龜岺膏券, o向呢樹打完個白鴒轉就出發去下一站喇!!!!
途中, 坐o向我地附近o既家長, 明顯地佢地幾個係friends, 佢地早有預備, 分派d小零食俾小朋友呀....唉, 我地乜鬼都無, 搞到好肉酸o添....失禮死人!!!!
第二站, 我地去到流浮山! 由於未夠鐘午膳, 所以先放羊....大家行下o個條又窄又無乜特色o既海味街囉......終於hea到夠鐘食飯喇. 呢d咁o既 standard 一日遊行程, 食o既午餐梗係又係standard 一日遊o既餸菜啦....不過, 超古怪, 幼稚園去旅行, 竟然有鮑魚食喎.....小朋友咁細, 又點食鮑魚呢......老師們究竟有無用腦諗過o架???呢d旅行o岩小朋友咩??!!
食完lunch, 我地再上返旅遊巴, 去元朗大棠荔枝山莊.
途中收到敏敏Whatsapp message, 話唔舒服, 不過, 無人陪佢睇醫生呀!!!!搞到我好擔心o添, 如果佢早一步通知我, 我就可以唔上旅遊巴, 自己坐返車出去陪佢睇醫生啦.....唉, 唯有即刻打電話俾小倫, 睇下佢有無辦法早d放工啦.....
嘩, 果然11月係各學校去旅行o既好時節, 呢度最少有4間學校o既學生o向樹呀!!!簡直人多過旺角, 熱鬧非常!!!第一個節目, 就係小朋友影下團體相. 跟住就跳一個敬拜操, 好搞笑, 帶領老師有帶領老師做動作, 小朋友有小朋友亂跳一通. 仲以為跟住會再有集體遊戲o添...點知, 老師又再慳水慳力, 大家各自自由活動喎!!!!
出發前, 學校派俾小朋友一人一支番皂泡, 所以, 我地o向空地玩o左一陣. 其實都係我負責吹, 晴晴負責追d泡泡, 拍下泡泡咁. 之後, 我地去睇下d小動物, 呢度有孔雀, 野豬, 山羊, 駝鳥, 金魚, 白兔.....
睇o左一輪動物, 晴晴話想坐牛拉車喎, 咁好啦, 我地咪俾40蚊買一set套票啦.......(簡直搶錢呀!!!!)一set 套票有3張飛, 每1張飛可以for1個人坐一次牛拉車, 餵金魚, 換玩具之類.....咁我地揀o左3個數人一齊坐牛拉車啦....我地坐住架由牛拉住o既車繞住個湖行一個圈, 5分鐘咋, 咁就玩完lu~~~~
坐完車, 我地去睇錦鯉....晴晴見有小朋友餵錦鯉, 又韶想餵魚魚喎. 咁無理由又再買套票o架嘛....縱壞晒....佢已經比以前扭計o左好多o架喇....唔可以小朋友有乜要求都答應o架嘛. 於是, 我叫佢執返起地下, 人地跌落地o既魚糧餵魚魚咪得囉!!!小朋友過下手癮o者. 餵完魚, 仲有時間剩, 我地再四圍行下, 行到去馬廝, 哈, 都有幾匹馬睇下喎, 仲幾靚仔o添喎. 唔係d老弱殘兵. 不過, 又唔見有小朋友騎, 叫晴晴行近d同馬馬影下相啦, 無膽鬼, 見馬馬咁大隻, 驚喎, 唔敢行近.
終於hea到時間差唔多, 我地行返出去等集合啦...呢個時候, 晴晴見到小朋友拎住d玩具弓箭, 扭計想買喎....我梗係唔肯啦!!!!氹極佢都唔肯, 唯有等佢爸爸出手拉佢走啦.....結果, 佢含住d眼淚上巴士喇! 真係難搞呀...明明好開心去旅行, 又要搞到唔開心咁離開.
好在o向巴士上, 導遊姐姐玩問答遊戲, 晴晴答中問題, 得到一份小禮物, 跟住媽咪又幫佢答中多一條問題, 最後佢有兩份小禮物, 先至開心返少少咋......
之後, 佢就跟爸爸返屋企, 我同媽媽就去大家樂嘆個下午茶返屋企.....
夜晚, 小倫返到o黎, 話敏敏無乜大礙喇, 不過, 有早產跡象囉, 所以, 入o左港安打針, 之後返o左屋企休息喇......真係俾佢嚇死呀!!!阿b, 你要乖乖地呀!!!!唔好咁百厭呀, 唔好咁早出o黎呀!!!
沒有留言:
張貼留言