入伙宴 - 1 : Free Units & Friends

我地以極速完成晒我地o既睇樓, 租屋, 入伙....

星期日先校埋Now TV, 今日就約齊腳一屋人打邊爐喇.....哈哈, 我地又大熱天時打邊爐....
我同小倫先去街市買海鮮同凍肉, 仲有針板, 返屋企預備....

無幾耐, 各路人馬都齊集我地o既新屋, 玩o左一陣PS3, 同埋睇埋我地d 婚紗相, 就開始食食食喇!!!

開餐前, 先影張大合照先......
我地o既食物:

 好在有個side bench 可以放部份食物咋....

 開估喇, 呢架係一架餐車, 最o岩用o黎打邊爐用, 平時好用過茶几好多, 唔要佢o既時候又可以摺埋, 我地d 朋友都話good!
唔覺唔覺, 我地叫六點幾食到十點幾先可以食晒所有o野呀.......
真係唔好話我平時買得多碗碟, 今日先發現, 原來都只係勉強夠用咋....下次再買多d 食物都唔知點算好喇.....

最後, 要多謝大家送俾我地o既PS 3 呀....

  大家11點就散喇,因為聽日都仲要返工, 佢地又個個都住青衣, 最遠仲要去到屯門o添....

小倫送佢地時, 我就以極速洗晒所有碗同倒垃圾呀, 係唔係好乖呢?! 因為我非常討厭食飽飽唔立即洗碗o架!!!

 做o左成日, 攰到木無表情, 死o左一樣o既小Ron

Home Sweet Home - 4

見到呢個topic, 係唔係好悶呢? 又講新屋, 無錯, 係仲要繼續講呀!!!

因為直到今日為止, 都仲未可以叫做完全搞掂間屋, 真係煩!!!

今日, 等o左成朝, 終於等地Now 上o黎校Now TV 喇, 事關小倫無波睇, 會悶死佢o架! 哈哈....

搞掂晒, 出得門口, 又四點幾喇, 拿拿聲出去又一城Franc Franc 添置傢俱呀!

因為時間o既關係, 我地等唔切Franc Franc 安排星期五送貨, 所以我地決定唔買白色, 要黑色 (因為shop 有現貨), 即場碌卡走人, 正, SCB 白金卡仲有9折, 又慳返幾十蚊!!!!

跟住, 我地拎住呢盒o野搭地鐵去美孚搵阿羊拎埋個三十幾litre o既大焗爐, 嘩, 又真係好大個呀, 我屋企o個個都無咁大!!!

 黑色襯晒我呀!!!不過, 好似同間屋唔多襯喎.....放o向客廳梳化隔離, o岩o岩好...

 全相 登登登櫈......呢張o野o既神奇地方o黎喇!!!!就係佢可以摺o架, 唔用o既時候將佢摺埋, 慳唔少位o架, 絕對o岩晒我呢d 住o向蚊滋咁大o既單位!!!

  究竟我地買呢張o野o黎做乜呢?????我唔講住, 等你地估下先....
明天就會開估o架喇!!!

Home Sweet Home - 3

經過一番o既努力, 我地o既新居終於似一個屋企喇.......

星期二: 早上 :GOD 送貨，　我地張餐枱呀!!!

 哈哈, o向我力爭下, 間屋終於有一樣o野係黑色o架喇!!!

仲有, 好無聊o既電動垃圾桶呀!!!我地懶到連用手打開垃圾桶蓋都唔會呀!!!只要o向佢上面郁下, 佢就會自動開蓋o架喇!!!

下晝, 仲有百老滙送雪櫃o黎.....撞鬼佢丫, 竟然話我地個廚房門太細, 佢推唔到部雪櫃入廚房, 結果, 我同小倫放工返到去, 一度就知入到啦, 小倫一個人都推到入去, 一定係個送貨哥哥懶惰.....
.

是日要特別鳴謝小倫媽咪幫我地o向新屋等送貨, 我地可以慳番一日假....

星期三: 是日休息, 因為日日係咁放工去新屋抺抺抺, 好攰...而且我又約o左Priscilla 同花師奶食我o既Birthday Dinner!!!

星期四: 先去Muji 買兩個雜物箱,  俾佢放佢d 林沈o野, 跟住又返新屋繼續幫小倫unpack 佢d o野....

星期五: 搬寬頻...明明約o左夜晚8至10, 可能因為今日成日都落大雨, 所以d 師傅遲大到, 差唔多十點先o黎, 不過, 佢地 (無錯, 係佢地呀, 一共有3個師傅上o黎幫我地整) 一搞就搞到11點半先搞掂, 我餓到暈低咁濟....因為未食晚飯呀!!!!!所以, 我地12點人地食宵夜o既時候, 先去食晚飯.........

星期六 : 最後一樣傢俬都送埋o黎喇!!!!仲以為今日黑雨唔會送貨o添.....張梳化都算ok, 之前俾足吋訂o既時候仲以為會好大張, 點知, 一放o向廳就覺得應該可以再大張d, 因為可以舒服d 嘛......

生日飯局 ~ 1

好開心呀!!!咁快就食我第一餐o既生日飯, 經過一輪篩選, 是次飯局地點係海運金牛苑!!!!

正! 有無敵大海景view!!!!呢間餐廳好搞笑o架, 原來有d dishes 係無list on the menu 呀!!!

今晚同我食飯o既有我city U 讀master O既書友仔: Priscilla & 花師奶! 我地鍾意同佢地玩o架, 因為可以乜都講一餐, 我地一傾計就成日都要好似嗌交咁, 哈哈!!!!所以, 我地唔可以去d 高級餐廳食飯o架, 會嘈到其他人.....

今日我地唔係叫o左好多餸咋, 只有蒜容炒雜菜 (including 芥蘭, 蜜糖豆, 西蘭花), 蝦肉酸湯 (類似冬蔭公), 咖哩牛腩煲, 春卷, 同埋蒜容飽!!!!但係, 我地都食得好飽呀!!!

我地一致認為咖哩牛腩煲好正!!!不過, 個蝦肉酸湯就麻麻地喇, 又夠香同辣.....

都叫o左佢地兩個唔駛o徙錢買o野送俾我啦, 有人記得我生日, 同我食飯我已經好開心o架喇, 佢地送o左一對my favourite brand -- Agnes B o既耳環俾我呀!!!!真開心!!!!多謝晒佢地呀!!!

跟住, 我地去埋滿記食糖水就各自返屋企lu...

Home Sweet Home - 2

自從上星期日收o左鎖匙之後, 我同小倫就一直都無停過, 每日都無約人去街, 點解咁乖?

咪就係因為我地晚晚放工都趕返大埔, 食完飯就去新屋做清潔囉......間屋唔係話好污糟, 不過, 我地覺得始終好似由自己親手抺過, 消下毒好似安心d 囉.....

除o左要做清潔之外, 仲要四圍去睇傢俬喎, 雖然新屋係已經包o左傢俬, 但係我地唔鍾意原有o既梳化同餐枱嘛, 我地掉o左業主俾我地o既梳化同餐枱, 所以咪要睇下囉....反正呢兩樣o野第時搬屋都容易d 帶走....

經過一星期o既努力, 間屋o既所有清潔工夫已經搞掂喇!!!!我地好認真咁逐寸逐寸抺o架, 都咪話唔辛苦呀!!!

已完成o既items:
1) Samsung 40吋電視

 多謝敏敏送俾我地o既入伙 & 結婚禮物

2) 客廳窗廉

 cheap o野 o黎咋, from IKEA

3) 床褥

 史路狗真識嘆, 一去到新屋就要o訓番個晏覺先!!!

4) 雪櫃 (下星期二送貨)
5) 餐枱 & 櫈 (下星期二送貨)
6) 梳化 (下星期六送貨)
今日小倫仲搬o左大部份o既o野 過o黎喇!!! 我o個d 就只係搬o左大口仔同埋所有婚紗相咋....

 你地睇下, 呢到大大大部份o既o野都係小倫o架, 佢仲多o野過我呀.....

 好在妹妹出動佢o既晴天公仔咋, 如果落雨就麻煩喇

 除o左史路狗, 大口仔係我地第一個住客.....大家係唔係好奇怪點解唔見我o既至愛黑仔呢?? 原因好簡單, 黑仔主人, i.e. 我, 都未搬, 佢就梗係要陪住我先啦....哈哈.....