2007年的最後一夜

今日由一返工, 就要勤力工作, 慕求準時放工, 因為今晚係除夕呀!!!

其實, 原先都諗住放工之後, 返屋企睇電視, 而且又咁凍....但係, 小倫又想出街玩, 所以拿拿林打電話book 位食飯...終於俾我諗到喇, 我地決定去早幾晚經過o既海員俱樂部食buffet..一搭正5:55分, 我就沖o左落樓, 小倫已經o向我公司樓下等我喇, 因為佢3點半放o左工喇!!!



我地就搭地鐵去尖沙咀食飯, 因為我已經好肚餓喇!!點知, 一上到去, 就話full booking, 但係我下晝打o左電話o黎訂枱喎, 算啦, 佢地都好好, 立即俾枱我地喇.... 以價錢o黎講, 唔算貴, 尤其是今晚係除夕, 去邊到食都貴o架啦, 食物o既quality 係唔錯o既, 三文魚刺身好新鮮, 其他食物好味, 不過, 款式就太少喇.....

最值得一讚就係呢個waiters o既services, 無得頂, 我地兩個人坐o既地方好靜, 但係我一放低隻碟, 就已經有人入o黎幫我換碟喇........

一人仲有一份小禮物o添呀!!!

你睇佢幾惡!!

係唔係唔認得我呢?! 哈哈!!! 由於唔想咁早落街同人迫, 我地坐到十點先埋單走呀!!原先仲以為呢到會好有氣氛啦, 點知就......最有氣氛就係我地兩個喇, 哈哈!!!

一落到街就不得了喇, D人多到呢, 想死呀.....不過, 小倫想行下, 我地就預算去海旁行下啦, 行o左無幾耐就有警察叔叔封路喇....我地只好留o向Sheraton 附近等夠鐘睇IFC 噴火呀!!終於等到夠鐘喇, 年紀大, 真係唔多襟企呀, 企o左個幾兩個鐘對腳麻痺晒....

不過, 真係好好睇呀, 好靚呀, 因為好近呀!!!可惜, 我地今晚無帶相機, 影唔到d 煙火噦, 只可以用手機影住先咋..好過無啦!

2008年第一張合照呀!!由2008年開始, 就係我最後o既單身日子喇....唔知, o黎緊呢一年會係點呢???? 希望大家都開開心心, 身體健康啦! ^ V ^