財源滾滾年初一

今日一早起身, 好凍呀!!!真係唔想出門口呀......

雖然話今年唔可以去拜年, 但係都要一早出去小倫o既婆婆屋企見下佢囉...但係, 就唔會有利是收, 亦都唔駛派利是.....去完土瓜灣, 下一站就去油塘, 小倫伯娘屋企, 坐o左一陣就走lu.....

跟住, 我地兩個就去o左APM, 原先想睇赤壁, o向行去戲院途中, 竟然見到阿sa, 婧婧佢地一家人呀! 原來佢地同埋Kenneth Daddy Mummy去拜年呀!!!見到可愛o既婧婧梗係要照張相先啦~~~

最終我地都無睇戲呀, 因為只係得返第一行有位, 實在太近喇, 唯有放棄啦...見到戲院隔離有間叫HotPot, 好似幾得意, 又無乜人, 就試下啦...

我地一人叫o左一窩(我係芫茜皮蛋湯, 小倫係沙爹湯), 餸菜都幾豐富o架, 有蝦同珊瑚蚌, quality 好過大家樂o個d 火窩呀!!!!包埋drink, 都只係$52, 仲唔駛加一, 今日埋單後, 仲有一人一封十蚊利是送呀!!!

食飽飽就返大埔lu, 因為今晚敏敏同堅堅都會返o黎食飯, 咁我地就早d 打下麻雀先啦.....嘩, 好耐未試過d 麻雀咁靚喇...差d 就一家贏三家呀!!!!

到o左食飯前, 又出演我地每年o既必備節目, 就係叫小倫爸爸sponsor o既抽利是遊戲喇.....最大由5百蚊一封開始........3, 2, 1 抽喇......

今年中大利是o既就係我喇!!!! 牛年一開始, 有咁好o既財運都唔錯喎...希望之後, 能夠繼續啦...

花開富貴迎新年

今日又o訓到一點先起身喇....

起身之後, 小倫煎o左d 蘿蔔糕, 年糕做lunch, 跟住, 等佢洗埋個toilet, 我再執下間屋, 就落樓下行下, 因為小倫仲未買衫過年呀...終於, o向Double Park 買o左兩件衫就算lu....

今晚, 去o左翔龍灣同小倫婆婆團年呀!!!唔知係唔係金融海潚o既影響呢, 食飯都唔覺有好多人, 迫爆酒樓o既感覺o既.....門口亦都唔見有排長龍o既現象呀!!!

食飽飽, 見時間尚早, 不如出花墟行下啦....

嘩, o向呢度真係feel 到乜o野叫做海潚價喇....

我地去到都未夠九點, 繽紛已經做緊八折喇, 行多一陣, 到九點, 仲過份, 半價喎......咁我地都買o左少少花返屋企插下啦, 花開富貴丫嘛....

往年好貴o既劍蘭, 今年最平廿蚊一束都有交易喎.....估唔到咁早已經開始劈價......

行行下, 竟然又遇到Pingu 同運動人兩公婆喎.....哈哈哈, 又真係成日都會大家同一時間o向附近出現喎...最後, 我地仲一齊搭火車返屋企o添.....

家務日

 因為媽咪同妹妹兩個去o左越南旅行, 所以今朝無人同一早嘈醒我, 咁我就可以好舒服咁o訓到十點幾先起身喇!!!

起身之後, 我好乖呀, 做o左好多家務 : 洗o左兩機衫, 換o左床單, 被袋, 掃地, 吸塵, 拖地, 執屋呀!!!!heehee, 留番個toilet 俾小倫洗! Yeah!

搞掂晒差唔多兩點, 就出門口去旺角join 埋小倫啦...今日輪到陪佢去shopping 呀!!!!

不過, 有d 失望呀!!!往年會有大d discount, 今年最多都只得八折咋, 唔係咁抵, 而且又睇唔o岩, 最後, 小倫只係買o左一對波鞋咋...聽日再行過先....

今晚, 我地又無出街食呀, 我返o左屋企偷o左媽咪事先買o左o既鰻魚呀!!!我地拎返去整鰻魚烏冬...費事等佢過幾日返o黎先食啦...順手, 仲拎o左棵水仙去, 唔知到年初一開花未呢??呢幾日咁凍....

是日晚餐: 燒鰻魚 + 墨丸烏冬

最紅星期五

我地o向沙田同Pingu & 運動人食完飯, 就搭火車返屋企啦.

落o左shuttle bus, 見到百佳仲未收工喎, 就拿拿林入去掃貨啦....呢個時候, 已經十一點喇, 所以入面無乜人, 仲正, 可以慢慢計, 慢慢買......

用HSBC 信用卡簽卡有10% 回贈喎, 梗係要買夠4百蚊啦.....

買下買下, 終於夠數喇, 埋單啦..嘩, 大家去百佳買o野真係要小心d 呀!!!

因為佢地d 收銀機有d 價錢唔o岩o架, 我地見條數唔o岩, 所以要同個cashier 逐樣o野對價錢呀!!!!真係有幾樣o野唔o岩, 收貴o左我呀!!!大家以後買o野, 記住要對價錢呀!!!

不過, 值得一讚o既係個supervisor, 佢好有耐性, 慢慢同我check, 仲可以俾我o向12點之前先look card, 計多o左o野就俾cash 我呀!!!!仲叫我返屋企再計過, 唔o岩數再返去搵佢呀!!!!

呢度究竟有幾多o野???哈哈....全部都係無營養o既食物呀!!!!有檸檬茶4打, 果汁先生4支, 杯麵8個, 出前一丁10個, 叮叮食品6packs, 益力多2排....仲有好多其他零食....唔知要食幾耐先食得完呢....

突然飯聚 - 小南國 (沙田)

今日係年廿八, 日日都趕收爐, 但係我又無乜心機工作喎, 畫個organization chart 都畫o左一個下晝呀, 分明係唔想做, 等放工啦...哈哈...

做做下o野之際, 見到Pingu online, 就問下佢地今晚有乜做啦, 傾傾下就約不如一齊食飯啦, 我地都好耐無一齊食飯喇......

一放工, 先去旺角join o左小倫先, 因為早排去聯合睇中o左件褸, 但又唔捨得買, 小倫話, 反正佢公司仲有雙糧出, 就買俾我啦, 點知, 已經買晒lu....唯有遲下再睇啦..不過, 我都唔覺意又買多一條裙呀...

買完就要快快腳入沙田lu....

我地今晚去小南國食, 我好鍾意食小南國o架, 質素有保證!!!!