晴晴半歲了~~~

眨下眼, 我寶貝O既bebe 豬已經半歲喇.....

所以, 我地又要簡簡單單咁同佢慶祝下, 其實都只不過係買個蛋糕返O黎, 我地一家人切下咁O者.....

6個月O既晴晴已經大個O左好多喇, 有少少唔捨得佢大得咁快O添........

半歲大O既佢, 最鍾意就係食佢自己隻手指公 同埋牙膠, 百厭O左, 識得四圍爬, 亦都開始試食米糊喇, 亦都同之前一樣, 都係唔多鍾意食奶奶, 一口氣唔會飲得完一支奶. 總括O黎講, 暫時都仲係屬於好湊, 未會認人, 唔會成日喊.

另外, 好在, 直到依家, 佢都仲好痴我, 唔知再大個D O既時候, 仲肯唔肯痴住我玩呢???

新玩具 - 壓麵機

今日又係永安大減價, 所以趁 lunch hour 去熱鬧下.

每次永安大減價都人山人海, 迫迫迫, 但係, 我總係覺得人迫迫, 好似好熱鬧咁, 好好氣氛, 所謂 "唔買, 都睇下丫嘛", 所以, 我咁寒, 都會去趁下墟.

基本上, 每次永安減價o既特價品都係大同小異O架喇, 所以我好小會專登大量入貨.

今次, 俾我發掘到新O野!!!!

就係 ---  壓麵機喇!!!!

早一排, 睇上一季"煮角" O既時候, 煮角們有教D 小煮角整pasta, 好似好易整呀, 睇到我心癢癢, 又好想學喇.

之前格過其他shops, City Super 都有得賣, 都係貴呀.

估唔到, 今次永安大減價, $498咋!!!! 仲送曬麵架O添呀!!!呢個爛鬼曬麵架, 無電影框O既時候, 賣成$159 O架.....至於部壓麵機, 要$798 O架....

伯爵奶茶包包 - 1st attempt

自從bb出世之後, 大部份O既時間都俾O左佢, 加上近半年O既workload大O左好多, 令到個人好攰, 而且又搬屋, 所以停O左好耐工, 無開機整包包喇.

終於今晚"的"起心肝開機, 諗O左好耐都諗唔到新口味, 突然小倫提議不如試用伯爵茶啦, 反正屋企有咁多earl grey teabags, good idea!!!俾個"叻"佢先. 一言驚醒夢中人.

心血來潮台北遊 2012

公司個個同事都plan緊Easter 去邊度旅行, 聽到我又心郁郁喇.

估唔到連小倫都話想去個short trip,日本唔去得喇, Bangkok 舊年又去O左, 去Phuket 啦, 機票又唔平, 我睇中o既resort 又貴到飛起, 於是, 不如去台北啦, 反正我地十年無去過台北喇.

就係咁, 距離出發只有兩星期, 我地要拿拿臨book機票同酒店喇.

要成行, 咁就一定要有機票先飛得啦, 唔通游水去咩!!!於是, 小倫立即call 我地O既agent 好友Sharon幫我地搵機票喇. 真係要俾個叻Sharon, 話咁快, 就confirm到機位喇, 時間仲唔錯O添.

跟手, 就到揀酒店喇. 去台北, 我無要求O架喇, 但求乾淨企理, 無鬼, 又方便就得O架喇.

經公司同事, 阿仔, 介紹, just sleep 唔錯, 簡簡單單, 又平又抵住, 一於就just sleep啦....

好O野, 我地O既十年一度重遊台北可以出發lu.....

不過, 都要買本旅遊書旁下身先!!!!哈哈哈~~~~

小寶貝百日宴

O岩O岩忙完個result announcment, 日日仲O向公司忙對稿, 做到一頭煙, 另外仲要忙搬屋O既O野, 晚晚要pack 箱. 不過, 今晚我特別申請O左準時放工, 因為今晚係bebe 豬O既百日宴.

原來應該係早兩個星期食O架喇, 不過, 因為我根本無可能predicted 到我幾多點放工, 所以, 唯有delay到今晚至食啦.

其實, 今晚O既所謂百日宴只係我地一家人一齊出街食餐好O架咋, 我地認為始終bebe仲係細, 要佢面對咁多對佢O黎講係陌生人O既人唔多好, 而且, 為一個咁細O既人仔搞party, 佢都唔知O架啦, 純粹為O左大人O既交際應酬, 好似唔多好. 因此我地就決定唔搞呢D 門面O野喇.

由於堅堅入O左M-dinning, 所以我地去美麗華集團旗下O既餐廳都有折, 我地就揀O左The Mira O既Yamm 食buffet 喇, 其他credit card 呢間都無discount, 只有M-dinning members 先有八折.

準時6點半我地就去到喇.....今晚O既theme 係海膽同帶子, 所以, 有好多菜式都係用呢款食物做材料.

我食得最多O既就係生蠔喇, 食O左差唔多兩打呀. 另外, 海膽都好好味呀!!!鵝肝就比較細舊喇, 不過, 都好, 因為我唔多鍾意食foie gras O既. 除O左凍盤, 其他熱葷都唔少O架, 不過, 我已經掛住食, 唔記得影相lu......甜品O既款式都唔少, 有chocolate fondue, 仲有macarons.


當然唔少得舅母同O爹O爹bebe啦.....