結婚一週年 -- 下集

今日我地兩個繼續偷懶, 放多一日假, 休息下....

所以, 起身後, 打俾阿媽, 叫埋媽咪一齊飲茶....我地兩隻慢吞吞人, 梗係又係阿媽到先, 搵埋位我地先到啦

飲完茶, 我地返上樓計劃下今日去邊度玩好啦.....

原先想去南生圍影相呀!!!哈哈哈.....天真o既小倫, 原來以為南生圍係一個公園喎...見多識廣o既我, 就解釋俾佢知, 南生圍只係一個好小o既地方o架咋....

加上, 今日天色麻麻地, 多雲, 未必會影到日落, 不如改地點啦, 下晝先入南丫島, 去到都天黑啦, 又係o徙氣.....左諗右諗之後, 不如就去西九海濱長廊啦!!!!

坐車去到九龍站落, 我地先上o左去影下d 靚樓先.......嘩, 真係唔知要打幾多世工, 先夠錢買一個單位呀!!!!

8完一輪, 我地又再搵路行去西九海濱長廊喇...都搵苯o既, 附近都係明確o既指示路牌, 真係搵鬼去喇....

好唔容易, 見到目的地啦......

車...............呢個地方真係不值一去呀!!!乜都無得睇, 設計又簡陋, 附近又多地盤, 去一次乜都夠喇...唔會有第二次囉!!!!

行完先黑, 我地行返入去Elements 啦.....呢d 有好多貴o既舖頭, 但都唔覺有人會行o既....如果我係遊客/有錢人, 都寧願行IFC  啦...

我地見未肚餓, 於是去o左哈仔, 食o左個好豐富o既high tea set 就返歸lu....

結婚一週年 -- 上集

眨下眼, 咁快就一年喇......

舊年o既今日仲記憶猶新.

今日我地無乜特別o既慶祝活動呀, 因為小倫一早就要出去美孚幫阿羊搬屋, 朋友叫到無計啦, 上次我地搬屋阿羊都有o黎幫手..不過, 無估到咁o既, 上個月o既拍拖求婚婉念日要幫阿餅搬屋, 今日結婚週年就到阿羊......唔知幾時又到我再搬屋呢???

就係咁, 我日頭有好多時間可以陪下阿媽喇, 又或者係叫阿媽陪下我啦....

小倫四點幾就返到大埔喇, 休息一陣, 梳洗下, 我地就出發去食飯喇...因為舊年擺完酒有張餐券送, 所以我地專登留返今晚去食, 慳返餐. 之前openrice 都知, Marco Polo o既buffet 唔多好食, 不過, 唔駛另外俾錢就算啦.....

開飯前, 我地先去Swaroski買我地o既週年禮物 -- 水晶Bear Bear, 我地決定以後每年買一樣水晶bear bear 做禮物, 慳返唔少腦汁, 唔駛每年係咁諗買d 乜做禮物好...

結果, 搞到遲o左半個鐘先去到o添....好在, 都無蝕底到, 反正都無乜好o野食, 都只係一般o既酒店自助餐咁囉, 有長腳蟹, 有生蠔, 翡翠螺, 但係唔算得上多款式, 叫做樣樣都有少少咁, 但係總算新鮮, 食食下, 有waiter拎o左碟鮑魚俾我地, 話一人有一隻o架!!!!既然呢餐只係自己補少少錢, 都算過得去,但係, 如果要我full pay, 就一定唔會揀呢間囉, 三百幾蚊一餐有好多好選擇...

(食物款式真係唔算多, 但起碼都係新鮮o既......至於熱食o既東風螺同花甲就唔駛自己等, 埋去counter order, 過一陣就會有人拎埋o黎)

(我對熱葷無乜興趣, 只係永其食少少......食食下, 大人拎個大包過來, 原來係每枱都有o既organic bread, 真係唔該晒, 咁細心驚我唔飽俾佢包我食. 無幾耐又有人拎兩隻鮑魚過o黎, 又係一人一隻free o架喎......味道都ok, 起碼無我最憎o既果皮味)

食飽飽之後, 我地去玩舊年重遊喇....由一樓o既Cafe Marco 落返去地下o既百年廳, 回味一下一年前o既今日o既時光....估唔到今晚無人擺酒喎, 所以可以o向度留耐d, 影下相喇....哈哈哈~~~~
一週年o既結婚紀念日就係咁平平淡淡過o左喇......不過, 都算好開心.....而呢一年都總算過得好開心!!!

Dinner @ Deluxe Wine

今晚約o左幾個以前一齊o向灣仔返工o既舊同事飯聚, 地點當然係我地o既地點 -- 灣仔啦.....

地點 : Deluxe Wine@J Senses

秋風起, 大閘蟹, 正正正!!!

原本, 我地plan o左今日去南生圍影相, 作為我地結婚一週年o既慶祝活動第一浪, 但係, 懶懶病o既發作, 加上又怕星期日會人多, 都係改期下星期先去啦.......

於是, 下晝無所事是, 我地兩個又o向書房打機之際, 有個大忙人未做完功課就撩我地去街喎.....於是, 我地梗係一口答應啦...叫佢做好功課, 可以出街就call 我啦...

反正都未confirm 有無街去, 不如就落街買材料整 cookies 啦...去到翠屏賣蛋糕材料o既公司, 想買低筋麵粉啦, 可惜, 賣晒, 要聽日先返貨, 唉..............仲想試下"懶" sweet 咁一齊整cookies o添...都唔成功...於是, 返上屋企繼續打機....

打打下, Pingu 終於打o黎話做好功課喇.....好快就決定今晚去沙田打邊爐啦.....Yeah...

呂宅喬遷之喜 暨 拍拖週年及求婚週年紀念

琴晚玩到凌晨四點先返到屋企, 所以今朝o向無人騷擾之下, 我地可以放任地大o訓特o訓....

但係, o訓到差唔多十二點, 小倫電話響喎, 邊個呢? 原來係一早set o既alert, 今日要去做螞蟻呀!!!大鑊!!!!

即刻打俾阿餅同阿miu 問下情況先....佢地已經搬得七七八八喇....唔好理咁多, 我地以9秒9 o既速度執返個樣, 出發去荃灣!!!!

去到荃灣, 佢地已經放飯喇. 我地就去樂悠居樓下o既皇潮滙食lunch, 飲飽食醉之後, 大家繼續開工!!!!

小倫同林哥哥負責幫阿餅佢地砌返好個大衣櫃, 其他人就返過去H-Cube 繼續執埋d 林沈o野. 我就負責幫頭幫尾, 做d無乜建議性o既o野.所謂人多好辦事, 唔駛幾耐, 已經砌好個大櫃, 其他o野又已經由H-cube 搬晒過o黎新呂宅喇!!!!

講下間屋先.....論價錢, 呢邊樂悠居只係俾H-Cube 貴一百蚊. 論實用性, 我地覺得樂悠居呢邊好好多, 起碼無o左個呂字房, 有返似樣正常o既兩房. 主人房好大, 放o左個大衣櫃同床之外, 仲有好多位剩. 另外o個間書房暨雜物房亦都好闊落, 放得落一張單人床, 書枱同埋衣櫃. 至於toilet 同kitchen就兩邊都差唔多啦. 不過, 係個廳較H-Cube 細少少囉......

搞掂之後, 我地去Citywalk 下行, 話晒今日都叫做拍拖週年, 係咁易都要行下街啦. 其實, 我地都只係行下必到o既Franc Franc 同Uniqlo. Uniqlo 無o野睇中, 反而o向Franc Franc 就睇乜都鍾意, 最後, 我地買o左對我鍾意o左好耐, 但又唔捨得買o既杯, 作為我地o既拍拖暨求婚週年紀念禮物喇!
夜晚,我地返屋企煮牛扒慶祝喇!!!!

就係咁, 平平淡淡地過o左我地o既週年紀念lu......