早有預謀的香蕉牛奶包

今日再試用象印麵包機整第二款包包, 就係香蕉包包喇.....點解呢個叫做早有預謀香蕉包呢, 因為要事先留起一隻香蕉, 等佢熟, 起點先可以整呀!! 對於喜好食比較生o既香蕉o既我o黎講, 要留起隻蕉係有d難度o架......我為食丫嘛....通常買香蕉返o黎, 好快就比我食晒o架喇!!!! wakaka.... 懶到出汁o既我地, 香蕉基本上係我地屋企出現最多o既生果喇....香蕉有營養, 而且方便, 唔駛切又唔駛洗, 方便快捷.



今晚我跟機食譜照整香蕉包, 雖然係soft mode, 但係屋企只有高筋粉, 低筋粉用晒, 所以recipe 上話要加2 tbsp all purpose flour 唯有照用高筋粉啦.

早o左開機, 今晚唔駛等到4點鐘, 包包出爐喇!!!!好開心呀, 今次個包包好高呀!!!! 仲係新手o既我, 唔能夠每次都整到包包高高大大, 究竟係乜o野原因呢??? 要研究下先.....

放涼之後, 叫醒小倫幫我切好一片片, 我就負責入盒同善後.

今次呢一機包我無帶返公司俾同事試味呀, 只係預備俾自己同小倫做早餐, 同埋另外留起一份送俾好朋友Pingu 同運動人. 不過, 大頭蝦o既我, 唔記得o左Pingu 唔可以食香蕉呀, 結果, 就益晒運動人喇........哈哈哈....

試味之後, 我覺得香蕉味唔夠濃, 下次應該加重香蕉o既份量, 應該會更加出色!!!