工欲善其事, 必先利其器 (下篇) - 象印麵包

放o左兩日假, 一返工又掛住吹下水啦, 熱門話題梗係又講下大家o個部麵包機啦.....正當我呢個發起人都仲未知我個新歡幾時肯入宮之際, 事關我負責關其他同事碌卡買麵包機, 而我另外搵敏敏幫我搵supplier 直接攞貨, 所以我d同事已經收到機, 而我未有喇. 將近放工o既時候, 敏敏whatsapp 我, 話我部都麵包機已經送到喇......

於是, 我梗係以9秒9 o既時間執o野, 一夠鐘放工就即刻閃人啦~~~~~
拿拿聲趕去迎接我部新o既麵包機呀!!!!話機雖然俾上次部kenwood 輕少少, 但係, 講真真係幾重, 好在唔駛行好遠就到巴士站喇.......而且, 對我好好o既小倫, 亦都o向巴士站接我, 等我唔駛自己一個女仔拎住部機行返屋企!!!!!



知我者, 莫過於小倫也, 知道我心急, 一定要今晚即晚就試機. 但係, 屋企無晒高筋粉, 雖然拎住部機咁重, 依然陪我去百佳走粉, 可惜平時去開o個間大百佳無貨, 累佢白行一趟.

大家一齊返屋企先, 跟住佢負責煮飯, 我再去另一間百佳買麵粉, 今次我醒喇, 一次過買兩包, total 3kg, 唔駛驚無貨, 要停機.

於是, 快快手食完飯洗完碗, 就開箱試機喇!!!!!

第一機梗係back to basic, 跟機食譜整白麵包啦.......雖然已經好攰, 但係好想見證第一個製成品o既出現, 所以唔敢瞓, 全程望實部機o既動靜. 先唔好比較象印o既麵包與kenwood o既麵包o既quality, 單係部機開動時o既聲浪, 我覺得已經值回票價喇!!!!! 象印呢部真係好靜好靜, 如果我唔係望住佢, 根本就唔知部機郁緊, 至於上次用o既kenwood BM250, 好鬼死嘈, 試過有次小倫返屋企, 未開門, 隔住大門都聽到部機郁緊.

另外, 象印麵包機搓粉確實俾Kenwood BM250 出色, 佢o既動作幅度比較全面, 而kenwood 有時係會睇唔過眼, 要自己用孤寒嫂幫佢刮下側邊d 粉.

到最後係製成品o既比較, 我同小倫都覺得象印o既出產, 組織係比較細緻, 雖然kenwood o既出產, 亦都好柔軟, 但係, 一同象印比較, 真係無得比呀!!!!第二日, 我拎d 包包返公司俾我d 同事試食, 佢地個個都大讚象印o既包包, 大家都覺得texture 比較好呀!!!!

(唔知係乜o野關係, 今次已經用o左另一樽新買o既酵母, 但係個包包都係唔高 >.<)

雖然比較結果明顯, 但係, 我真係好多謝上次借部kenwood  機俾我玩o既同事呀, 如果我從來無比較過, 我一定個心會籮籮鬈, 就算買o左部象印都會有d唔舒服o既感覺!!!!!

今次真係無投資錯喇......而且, 又可以以全城最平o既價錢買到, 真係好開心, 今勻真係可以做到"遲買平幾舊"喇!!!!

另外, 尋日同小倫去行街, 終於俾我搵到平到爛o既電子磅喇, 只係$45 !!!!!此外, 仲買o左支溫度計同埋碌碌棒呀!!!!家下d 架生差唔多齊喇, 仲差個吐司模咋!!!!!hohoho

有o左電子磅, 以後呢個簡陋o既磅就可以光榮引退喇!!!!!