志明與春嬌

我毫無興趣o既世界盃終於都曲終人散喇, 加上各大歐洲球賽又抖暑, 所以, 小倫終於唔駛再俾個波霸住喇.

星期日晚o既電視比平時更加悶, 所以又走去睇下有無新戲睇, 租下碟返屋企喇. 終於等到”志明與春嬌” 出碟喇, 呢套戲我想睇好耐喇, 上戲院時又無時間去睇喎, 咁o岩今個星期新出, 又無人租喎, (唔知係唔係因為三級o既關係呢?)



估唔到呢個由一班煙鏟打邊爐開始o既故事又幾好睇喎, 導演同編劇確實唔錯, 實在太寫實喇! 雖然我唔食煙, 亦都超級討厭人地食煙, 但係, 我覺得呢套戲又真係好能夠反映到依家d 人成日圍埋一齊叉電o既情況. 而且, 故事入面o既志明同春嬌o既生活, 其他角色o既對白, 又同我地一樣, despite 入面夾雜好多”助語詞”.

戲入面男女主角淡淡然o既愛情感覺拍得非常好, 佢地當中發生o既事情好似好平淡, 但係又十分吸引喎. 普通到就好似我地o既日常生活咁, 例如女主角對男主角有d o野啦, 人地要閃, 又跟人地閃, 又send 埋d 無聊sms 俾人. 楊千嬅同余文樂亦做得好好. 一直我對余文樂都無乜好感, 但係睇完呢套戲之後, 我又有少少鍾意o左佢喎......

加上, 呢套戲o既英文名 “Love in a Puff”, 改得非常浪漫, 及貼題, 總比中文戲名, 兩個帶d 娘o既名字好得多.

總括o黎講, 呢套戲都係值得一看o架…