中秋日 - Kiki肥牛大喜之日

今年中秋hit 爆金句就一定係 "家好月圓慶中秋", 今日唔只係家好月圓呀,仲係良辰吉日 Kiki 同肥牛o既結婚好日子o添呀!!!

一早起身, 我同小倫早餐都無食, 就出發去大會堂觀禮喇!!!十二點未夠, 我地已經去到大會堂喇...(好少有咁準時 :p) 仲打電話俾Pingu 問佢同運動人點解遲到咁失敗o添.... 不過, 點解呢樹水靜河飛呢?? 等o左5分鐘, 發覺唔對路喎, 無理由佢地未o黎做手續o架?! 突然俾我醒起, 原來傻Ron 又出事!!!

記錯地點呀!!!係紅棉道至真!!!於是, 我同小倫即刻飛的過金鐘啦, 好彩, 趕得切, 未遲到咋.... 仲有機會o向Kiki未做牛太前一齊影張相o添!!!

今日真係好熱呀! 見到肥牛成頭大汗...佢讀誓詞時, 仲要抹一把汗, 真搞笑!!!
歷史性一刻, 情深o既一吻!!

成個儀式都o向一片歡樂o既氣氛下完成呀!!!途中仲有小插曲, 就係突然有人手提電話o向, 鈴聲仲要係"上海灘"呀!!!大家不禁細細聲講, 唔通許文強o黎o左?! 究竟呢段係唔係主人家o向到開小玩笑呢? 睇怕要問肥牛先知喇...哈哈

我地影完大合影都走Lu....